Read Thado Chin Semtilbu 17 Bible Online

Semtilbu 17 - Thado Chin bible

Semtilbu 17

¹Chuin Abram kum somko le kumko alhinin, ahenga Pakai ahung kilah-in, ajah-a, Keima hat chungnung Pathen kahi, kamasanga kitah tah-in lamlhan lang, nangma chamkimin.

²Chule keiman keimale nangma kah-a kakitepna kasemdoh ding, chule nangma hapuna kapunsah ding nahi, ati.

³Chuin Abram'in tolla amai asulut tan ahi. Chuin Pathen'in amachu akihoupin, ajah-a,

⁴Keima thudol vang, ven, kakitepna chu nakoma aume, chule nangma nam tamtah pa nahi ding ahi.

⁵ Namin jong Abram tia kikou talou ding, amavang namin Abraham tia kikou ding ahitai; ajehchu nangma namtin pa-a kasem nahitai.

⁶Chule keiman nangma hapuna kapunsah ding, chule nangma-a kona nam ho kasemdoh-a, chule nangma-a kona lengho hungdoh ding ahi.

⁷ Keima nangma le nanunga nachilhah te-a dinga Pathen kahina dingin, keima le nangma kah-a, chule khonunga nachilhah te akhang akhanguva tonsot kitepna-a dinga kakitepna kaphudoh ding ahi.

⁸ Chule keiman nakholjinna Kanaan gam pumpi hi, nangma le khonunga nachilhahte henga tonsotna nalo diuva kapeh ding; chule keima amaho Pathen kahiding ahi, ati.

⁹Chuin Pathen'in Abraham jah-a, Nangman kakitepna hi nanitding, nangma le khonunga nachilhah ten akhang akhanguva anit diu ahi.

¹⁰ Keima le nangma chule nanunga nachilhahte kah-a nanitdiu kakitepna chu hiche hi ahi: Nalah uva pasal tapou chun chep atan cheh ding ahi.

¹¹Chule nanghon natahsao nachep vunnu chu natan dingu; hichu keima le nangho kah-a kitepna melchihna hiding ahi.

¹²Chule nalah uva mi niget lhing tapou, nason nachilhah-a pasal tapou, na-in'a peng hihen, nachilhah hilou gamdang mi nasuma nachoh hijongle, pasal tapou chu chep kitan cheh ding ahi.

¹³Na-in'a peng hihen lang, nasuma nachoh hijong leh chep kitan teiding ahi; chule kakitepna chu tonsot kitepna-a dinga natahsaova umding ahi.

¹⁴Koi hijongle cheptan lou pasal chapang atahsa-a achepvun cheptan lou chu, chuche mipa chu amite lah-a kona paidoh-a umding ahi; amachun kakitepna asuhkeh ahi, ati.

¹⁵Chuin Pathen'in Abraham jah-a, Na-inneipi Sarai thudol vang, Nangman amin Sarai nati tahlou ding; amavang amin Sarah hijoding ahitai.

¹⁶Chule keiman amanu chu phatthei kabohding, chule tahbeh-a keiman nangma amanu-a kona chapa khat jong kapeh ding nahi. Keiman amanu phatthei kabohding, chule amanu namtin nu hung hiding; chule amanu-a kona mihemte lengho hungdoh ding ahi, ati.

¹⁷Chuin Abraham'in tolla amai asulutnin, anuijin ahi, chule alungthimin, kum jakhat mi-a dinga cha peng ding ham? Chule kum somko mi Sarah'in cha ahin nahlai ding ham? ati.

¹⁸Chuin Abraham'in Pathen henga, aw! Ishmael chu namitmu-a hingding hingta vele, ati.

¹⁹Chuin Pathen'in, Na-inneipi Sarah'in tahbeh-a nangma chapa khat nahin peh ding, chule nangman amin Isaac nasah ding ahi. Chule kakitepna chu amale ama nunga achilhahte dinga tonsot kitepna hidinga kasuhdet ding ahi.

²⁰Chule Ishmael thudol vang, keiman nathu kangaipeh ahitai: Ven keiman ama phatthei kaboh ahitan; chule achilhah tamtah kahisah-a, hapuna kapunsah ding ahi. Aman vaipi somleni ahin ding, chule keiman ama nam lentah-a kasemding ahi.

²¹Ahin kakitepna vang chu Sarah'in khovei tuphat teng ahinding Isaac toh kasuhdet ding ahi.

²²Chuin amatoh akihou chai phatnin, Abraham koma konin Pathen achetoutan ahi.

²³Chuin Abraham'in achapa Ishmael, chule a-insung peng jouse, chule suma achohtho jouse, Abraham'in a-insunga pasal tapou chu apuijin, Pathen'in ahenga aseibangin chuche ni lele chun atahsao achep vunu atanpeh tan ahi.

²⁴Chule Abraham chu atahsa achepvun akitan chun kum somko le ko alhingtai.

²⁵Chule achapa Ishmael chu atahsa achepvun akitan chun kum somlethum ahitai.

²⁶Chuche nilele chun Abraham le achapa Ishmael'in chep atan lhon tan ahi.

²⁷Chule a-insunga pasal jouse, a-in'a pengho le gamdang mi suma kichoho jong chun amatoh chep atan cheh-un ahi.