Read Thado Chin Semtilbu 18 Bible Online

Semtilbu 18 - Thado Chin bible

Semtilbu 18

¹Chuin ama Mamre gangpi kom aponbuh kotbul-ah sun nisat petna atoupet nin Pakai chu ahengah ahung kilah-in;

² Chuin ama akhodah-in avetna ahile, Veovin, akomtah-a chun mi thum ana dingun; chuin aman amaho chu amuphatnin, apon-inna konchun amaho lemdingin alhaijelin, tolla aboh khupmin, chibai aboh-in ahi.

³Chuin aman, Ka Pakai, tu-a hi namitmu-a lunglhaina kachana ahile; katao ahi, nasoh-a konin chepai hih-in.

⁴Nahenga katao ahi, twi themkhat beh hin kidomintin, chule nakengu kisilun lang, thingphung noija hin kicholdouvin,

⁵Chule nalungthimu akitha-ol theina dingin, changlhah themkhat beh nagalah peh uvinge; chujouteng nangho chepan naovin nate: ajehchu nasoh henga hunga nahi tangalun, ati. Chuin amahon, nasei bangin boltan, atiuve.

⁶Chuin Abraham pon insunga Sarah henga alhailut jel-in, ajah-a, Changbong phatah atena dimthum tenlang, hichu mehin lang, gangtah-in thuh chunga changlhah semin, ati.

⁷Chuin Abraham bonghon lama alhai jel-in, bongnou nouchet hoitah khat alan, hichu gollhang khat apen, aman hichu gangtah-in agasemin ahi.

⁸Chuin aman bongnoi ha le bongnoi chule bongnou sa asem chu achoijin, a-angsung uva aluipeh-in chule amahon anehpetnu chun, ama akomuva thingphung noija chun adingin ahi.

⁹Chuin amahon ajah-a, Na-inneipi Sarah hoija umam? atiuve. Chuin aman, Pon insunga khun aume, ati.

¹⁰ Chuin aman, Keima nahenga hinkho phat chedung juija thonlouva kahung kile kitding ahi; chule ven, Sarah na-inneipin chapa khat ahinding ahi, ati. Chule Sarah'in anunglama pon in kotna konchun hichu anajan ahi.

¹¹Tun Abraham le Sarah chu upatah le kum tamtah ahilhontan; chule numei hina ngaidol chu sarah chunga tanga ahitai.

¹² Chuti ahijeh chun Sarah chu alungthimin anuijin, katehset jounung sanga hi thanopna kanei ding ham? Ka pakai jongla tehse ahitan, ati.

¹³Chuin Pakaiyin Abraham jah-a, ibola na-inneipi Sarah'in, kitehta-a chapa kanei mongding ham? atia nuija ham?

¹⁴ Pakai dinga thil ahahsa behseh umam? Hinkho phat che dungjuija akitepsa phat tahle keima naheng-ah kahung kilekit ding, chule Sarah'in chapakhat ahinding ahi, ati.

¹⁵Chuin Sarah akichat jeh chun, akilepmin, keima kanuipoi, ati. Ahin aman, ahipoi, nanui naije, ati.

¹⁶Chuin miho chu chua konchun akipatdoh uvin, chule Sodom lam agahveuvin; chule Abraham'in amaho achenadiu lampia lhadoh dingin akilhonpin ahi.

¹⁷Chuin Pakaiyin, kathil bol ding hi Abraham koma kona ka-im dingham?

¹⁸Abraham hi nam lentah le thahat tah hung hiding, chule vannoi leiset namjouse ama-a phattheiboh changdiu ahingalin?

¹⁹Ajehchu achate le ama nunga a-insung mite chu thu apeh-a, Pakaiyin Abraham chungchanga athusei chu atohdoh nadinga, chonphatah le chondih tah-a na atoh uva, Pakai lamlhah ajui diu ahi ti keiman kahen ahi, ati.

²⁰Chuin Pakaiyin, Sodom le Gomorrah pen awgin anasat behset jeh le, achonsetnao anasat behset jeh-in;

²¹Tun keima chesuh ingting, chule apen awginu kaheng ahunglhun banga hi chonuvam, chonhih uvam gave inge; chuti ahilou jongle gahe-ing kate, ati.

²²Chuin miho chu chua kon chun akiheijun, Sodom lam jonin achetauve. Ahivangin Abraham chu Pakai masanga ading jing nalaijin ahi.

²³Chuin Abraham'in agah naijin, ahenga, michonpha ho chu migilou toh nasuhmang tha ding ham?

²⁴Ijem tin khopi sunga chun michonpha somnga umtale, hiche asunga um michonpha somnga jal chun hiche munchu khenlouvin nasumang jeng dem?

²⁵Hitobanga bolding chu nangma-a konin gamla hen; michonpha hochu migilou hotoh suhmangtha-a, michonpha hon migilou ho banga athohdiu nanga konin gamlahen; vannoi pumpi thutanpa chun adih-a thu atanlou ding ham? ati.

²⁶Chuin Pakai chun, keiman Sodom khopi sunga michonpha somnga kamuleh, amaho jalchun khopi chu hoidohsah nange, ati.

²⁷Chuin Abraham'in adonbutnin, Tun vetan, keima leivui le meivambou kahin, Pakai henga thusei dingin kana kipantai.

²⁸Ijem tin michonpha somnga lah-a chun nga lhasam taleh, mi nga alhahsam jehchun nangman khopi chu nasumang jeng dem? ati. Chuin aman, keiman chua chu michonpha somli le nga kamule, sumang ponge, ati.

²⁹Chuin aman ama jah-a, aseikitnin, Ijem tin chua chun somli kimu tale la, ati. Chuin aman, keiman somli ho jalchun sumang ponge, ati.

³⁰Chuin aman ajah-a, Ka Pakai lunghang loujenin, keiman seikit inge, Ijemtin chua chun somthum bou kimu talela, ati. Chuin aman, keiman chua chu somthum kamule sumang ponge, ati.

³¹Chuin aman, Tun vetan, keima Pakai henga thuseidin kana kipantai; Ijemtin chua chun somni bou kimu talela, ati. Chuin aman, somni jalchun keiman sumang pongkate, ati.

³²Chuin aman, aw! Pakai lunghang loujenin, khatvei seikit inge, chua chun somkhat sehbou kimu talela, ati. Chuin aman, Keiman somkhat jalchun sumang ponge, ati.

³³Chuin Pakai chu Abraham toh akihouchai phatnin achena dinga achetan; chule Abraham a-in lama ahung kile tai.