Read Thado Chin Semtilbu 19 Bible Online

Semtilbu 19 - Thado Chin bible

Semtilbu 19

¹Chuin nilhah lamin vantil ni Sodom ahunglhung lhonin; chule Lot chu Sodom khopi kotpi bula chun anatouvin ahi. Chuin Lot'in amani chu amuphat nin alemdingin akipatdoh-in, chule tolla aboh khupmin;

²Chuin aman, Veuvin tun, ka Pakai teni, katao ahi, nasoh in'a hunglut lhonin lang, jan khovah geijin gehlhonin, chule nakeng kisil lhonin lang, jingkah teng le matah-in thoulhonin natin, chekit lhon tan nate, ati. Chuin amanin, Ahipoi, keini jan khovah keija lamlena kaum lhon ding ahi, atilhone.

³Chuin aman aha ngeh behseh jeh-in, amani akihei lhonin, a-insunga alut lhontai. Chuin aman amani golvah abolpin, cholsolou changlhah akangin, aneuvin ahi.

⁴Ahivangin amaho alup masangun, khopi sunga miho, Sodom miho tah chu alen aneo, vengtinna kona mihem jousen in chu ahin umtaovin;

⁵ Chule amahon Lot chu ahin kouvun, ajah-a, Tujana nahenga hung miteni chu hoija umlhon tam? Kahenguva hinpui doh-un, amani chu jonpiuvinge, atiuve.

⁶Chuin Lot kotna konchun amaho henga apotdoh-in, kot chu anungkha-in,

⁷Ajah uva, Sopite, naheng uva katao ahi, chuti lomin khanggilou hih-un.

⁸Tun veuvin, pasal heloulaihel chanu ni kaneije; katao ahi, namit mu uva pha nasah bangtah uva naboldiuvin amani chu naheng uva hin puidoh peh uvinge; hiche teni chunga vanghin imacha bolhih-un; ajehchu amani ka-in lhalim noija hunglut ahilhone, ati.

⁹Chuin amahon, Kinung khinin, atiuve. Chuin amahon aseikitnun, Hiche mipa hi ahung pemlutnin, thutan din akigoi; tunvang amani chunga kabol sang uva nangma chunga phalou cheh-a kaboldiu ahi, atiuve. Chuin amahon mipa, Lot chu hatah-in ahin sonnun, kotkhah chu suhhong dingin ahin naitaove.

¹⁰Ahivangin miteni chun akhut ahin lhangdoh lhonin, Lot chu amani henga dingin insunga akailut lhonin, kot chu akhah taovin ahi.

¹¹ Chuin kot bula um miho chu alen aneo abonun amitnu achotsah lhonin; chutichun amahon kotkhah chu aholdoh jou tapouvin ahi.

¹²Chuin miteni chun Lot jah-a, Nangman hikoma hi insungmi dang naneijem? Namahpate, nachapate, nachanute, chule khopi sunga koihileh naneichan chu hiche mun'a konhin puidoh-in.

¹³Ajeh chu Pakai anga apen awgin chu anasa behseh jengtan, hijeh-a chu hiche munhi kasuhmang lhonding ahi; Pakaiyin hiche sumang dinga eihinsol lhon ahi, ati lhonne.

¹⁴Chuin Lot apotdoh-in, achanute kichenpi amah-pate henga achen, ajah uva, Kipat un, hiche mun'a konhin potdoh-un, Ajehchu Pakaiyin hiche khopi hi asuhmang ding ahi, ati. Ahivangin amachu amah-pate koma totna thusei abangbep tan ahi.

¹⁵Chuin jingkho ahung vah phatnin, Vantil teni chun Lot chu akinosah-in, ajah-a, Kipatdoh-in, hikoma um na-inneipi le nachanu teni kipuijin; achuti loule hiche khopi khangitlouna-a hin mantha tha getnin nate, ati.

¹⁶ Chuin ama akhongai nalaijin, Pakaiyin ahepi jehchun miteni chun amakhut, a-inneipi khut chule achanu teni khut aman lhonin; apuidoh lhonin, khopi pamlama chun akoilhonin ahi.

¹⁷Chuin ahitin ahi, amanin amaho polama ahin puidoh honchun, ajah uva, Nakihinso nadiuvin jamun; nanung lamu vehih-un, chujongle phaicham mun khatcha ajong kingapa hih-un; molsang lama jamun, ajole mangthah getnun nate, ati.

¹⁸Chuin Lot'in amani jah-a, Ka Pakai, chuti chu hida hen.

¹⁹Vetan, namitmun nasoh hin namitmun lungsetna kachangin, chule nangman kahinkho neihuhdoh peh-in, nami khotona chu nadomsang tai; ahivangin molsang lama chun hoidohna din jamjou ponge, ajo thil gilou khatnin eihin phantin thilo getninge.

²⁰Tun ven, hiche khopi khu jamlutna dingin anaijin, chule neocha jong ahi; hilama khun neijam sah-in, (hikhu neocha hilou ham?) chutile kahinna hinghoija umding ahi, ati.

²¹Chuin aman ajah-a, Vetan, hiche thudola jonghin na-ngehna kaphal peh-in, nangman nasei hiche khopi chu sumang ponge.

²²Nangma kinonlang, khulama khun jamlut-in; ajeh chu khuchemun nalhun kahse-a imacha kabol theilou ahi, ati. Hijeh chun chuche khopi min chu Zoar akisah tai.

²³Lot chu Zoar alut chun nisa leiset chunga asohdoh tai.

²⁴ Chujouvin Pakaiyin Sodom le Gomorrah chunga Kaat le meikong van'a Pakaiya konin ajuhsah tan ahi.

²⁵Chuin aman chuche khopi teni, phaicham jouse, khopi sunga cheng jouse, chule leiset chunga kehdoh ho jouse abonchan asumangsoh keitan ahi.

²⁶ Ahivangin inneipi chun Lot nunga konin anunglam aven ahileh, chi khompi asohtan ahi.

²⁷Chuin Abraham jingpi tah-in athouvin, Pakai angsunga adinna mun'a chun achen;

²⁸Chuin Sodom le Gomorrah lam, chule phaicham gamlam jouse chu aven; chule veuvin, hiche gam meikhu chu thih kisou jolna munna meikhu bangin akitung veng vung jengin ahi

²⁹Chuin ahitin ahi, Pathen'in phaicham khopi ho asuhmang chun, Pathen'in Abraham chu ageldoh in, Lot chenna khopiho asuhmang chun Lot chu akisuhmang ho lah-a konchun asoldoh-in ahi.

³⁰Chuin Lot chu Zoar kho-a kon chun molsang lama achetouvin, achanu teni toh achengtai; ajehchu ama Zoar kho-a chending chu kicha-a ahi. Chuin ama achanu teni toh song ko-a acheng taovin ahi.

³¹Chuin apeng masa nuchun aneojonu jah-a, Ipahi atehtan, vannoi leiset dan ngaija ihenguva hung ding leisetna pasal khatcha jong aumtapoi.

³²Hungin, ipahi lengpitwi donsah hitin, chuleh ipa chilhah manglouva i-umsah theina dingin luppi hite, ati.

³³Chuin amanin chuche jan chun apalhon chu lengpitwi adonsah lhonin ahi. Chuin apeng masa nuchu ache lutnin, apa chu aluppin; ahin aman amanu itih-a ahunglup, chule itih-a athodoh ahepon ahi.

³⁴Chuin ajingin ahitin ahi, apeng masa nuchun aneojonu jah-a, Vetan janhi jan chun kapa kaluppi tai. Tujanin jong einin lengpitwi donsah hitin; chule ipa chilhah manglouva i-umsah theina dingin, nangma lutnin lang galuppin, ati.

³⁵Chuin amanin chuche jan chun apahon chu lengpitwi adonsah lhontan ahi. Chuin aneojonu chu akipatdoh-in, aga luppin; ahin aman amanu itih-a ahunglup, chule itih-a athodoh ahepon ahi.

³⁶Chuti chun Lot chanu teni chun apalhona konin nao avopgel lhontai.

³⁷Chuin apeng masa jonu chun chapa khat ahingin, amin Moab asahtai. Amachu tunikho geija Moab mite pa chu ahitai.

³⁸Chuin aneojonu jong chun chapa khat ahingin, amin Ben-Ammi asahtai. Amachu tunikho geija Ammon miho pa chu ahitai.