Read Thado Chin Semtilbu 2 Bible Online

Semtilbu 2 - Thado Chin bible

Semtilbu 2

¹Chuti chun vanho le leiset, chule asunga um jouse chu akisem chaitan ahi.

² Chuin ani sagi nin Pathen'in athilsem anatoh chu achaijin; chule ni sagi nin athilsem anatoh jouse-a konin akicholdon ahi.

³ Chuin Pathen'in nisagi ni chu phatthei aboh-in, asuthengtan ahi. Ajeh chu chuche nikho-a chu Pathen athilsem le athilbol anatoh jouse-a kicholdo-a ahi.

⁴Hiche hohi akisem laijuva van le leiset khanggui chu ahi; Pakai Pathen'in leiset le vanho asem nikho,

⁵Alei laija thingphung namkim leiset chunga aum masang, chule aleija hampa louhing namkim akedoh masang, (akisem laijuva van le leiset khanggui chu ahi.) Ajeh chu Pakai Pathen'in leisetna go ajuhsah hihlaijin, alei lhouding jong mi khatcha anaum hih laijin ahi.

⁶Ahin leisetna konin twimei ahungdohjin, chule leiset chung jouse achapkot jin ahi.

⁷ Chuin Pakai Pathen'in tolla leivuija konin mihem asemin, anahhom sunga chun hinna hu alhakhumin ahile, hichun mipa chu hinna nei mihing ahung hitai.

⁸Chuin Pakai Pathen'in solama Eden'a chun honkhat asemin; aman sem mipa chu hikoma chun akoi tai.

⁹ Chuin Pakai Pathen'in leisetna konin vetdinga hoitah, chule nehdinga tuitah theiphung namkim akedoh sah-in; chule honsung lailunga chun hinthing le ase apha hetna thing jong akedoh sah-in ahi.

¹⁰Chule hon chu chapkot dingin Eden'a kon chun vadunglen khat along doh-in; chule chua kon chun akikhenin vadung ka-li akiso tan ahi.

¹¹Amasa pen chu amin Pishon ahin; hichu sana umna Havilah gam kolkhumin alongin ahi.

¹²Chule chuche Gama Sana chu aphan; chukoma chu bdellium le songgel jong aumin ahi.

¹³Vadung nina chu Gihon ahin; Ethiopia gam kolkhuma longa chu hiche hi ahi.

¹⁴Athumna vadung minchu Hiddekel ahin; Assyria gam solama longa chu ahi. Chule vadung lina chu Euphrates ahi.

¹⁵Chujouvin Pakai Pathen'in mipa chu aleilhou natong dingle angah dingin Eden hona chun akoitai

¹⁶Chuin Pakai Pathen'in mipa chu thupeh apen, Nangman honsunga thingga jouse chamlhat tah-a naneh thei ahi:

¹⁷Amavang ase apha hetna thingga vang chu naneh louding ahi; ajeh chu hichu naneh ninileh thonlouva nangma nathi tei ding ahi, ati.

¹⁸Chule Pakai Pathen'in, Mipa hi achanga aum ding aphapoi, keiman ama dingin akithopi ding akilompi khat sempeh-ing kate, ati.

¹⁹Pakai Pathen'in leisetna konin gamsa jouse, chunga leng vachate jouse asemin; hicheng chu Adam'in amin asah dingin ahengah chun ahinpuijin ahi. Chuin Adam'in ganhing namkim amin asahbang cheh-in, aminu chu akisah dentai.

²⁰Hiti chun Adam'in ganchaho, vanlaijola vachate, chule gamsaho jouse chu amin asahsoh keijin; ahivangin ama kithopi ding akilompi aumpon ahi.

²¹Chuin Pakai Pathen'in Adam chu a-imutmil sah-in ahile, ama a-imutan ahi. Chuin aman anahgu holah-a khat aladoh-in, hilaimun chu aphe-in ahuh bitnin ahi.

²²Chujouvin Pakai Pathen'in mihempa-a kona alahdoh anahgu chun, numei khat asemin, amanu chu mihempa henga chun ahinpuijin ahi.

²³Chuin Adam'in, Tuvangin hichehi keima gua kona gu, chule kaphe-a kona phe ahi. Amanuhi numei kisah ding ahi, ajehchu ama pasal'a kona kiladoh ahi, ati.

²⁴ Hijeh-a chu pasal'in anu le apa adalhah-a, ajia beh ding ahi; chule amani chu tikhat hilhon ding ahi.

²⁵Chule mipa le a-inneipi chu ani lhonin sagoh keo ahilhonin, ahin ajahcha lhonpon ahi.