Read Thado Chin Semtilbu 20 Bible Online

Semtilbu 20 - Thado Chin bible

Semtilbu 20

¹Chuin Abraham chua kon chun lhanglam gamah achesuh-in, Kadesh le Shur kikah-a achengin, chujouvin Gerar gama apemlutnin ahi.

² Chuin Abraham'in a-inneipi Sarah chu kanaonu ahi atin ahi. Chuin Gerar lengpa Abimelech chun mi asolin, Sarah chu agapui sah tan ahi.

³Ahin Abimelech henga chun ajan amangin Pathen ahungin, ajah-a, Vetan nangman nakipui numeinu jehchun nangma mithisa tobang nahitai; ajehchu amanu mikhat ji ahi, ati.

⁴Ahivangin Abimelech chun amanu chu anailut loulai ahin; chuin aman, Pakai nangman nam chonpha hojong nathajeng ding ham?

⁵Aman kahenga, amanu hi kanaonu ahi, ati hilouham? Chule amanu jengin jong, amahi kasopipa ahi, ati ahi. Chule lung thengsel le khuttheng tah-a hichehi kanabol ahi, ati.

⁶Chuin Pathen'in ahenga amangin, Ahinai, hichehi lungdihtah pu-a nanabol ahi ti kahei. Ajehchu keima douna chonset nabol louna dinga keiman jong nangma kasuh tang nahi; hiche jeh-a chu keiman amanu chu katoh khah sah lou nahi.

⁷Chuti ahijeh chun tun mipa chu a-inneipi lepeh kittan; ajehchu ama themgao ahin, chule aman nangma taopeh-in natin, nangma nahinding ahi. Nangman amanu chu nalepeh kitlou vangleh, nangma thonlouva nathi teiding ahi, ti kihetnin, nangma le nenei chengse jong, atin ahi.

⁸Hiche jehchun Abimelech jingpitah-in athouvin, asohte jouse hiche thilho jouse hi aseipeh tan ahi. Chuin miho chu akichalheh jengun ahi.

⁹Chujouvin Abimelech'in Abraham chu akouvin, ajah-a, Kachunguva hi ipi bola nahi hitam? Chule nangma chunga ipi kasuhkhel uma, keima chungle kalenggam chunga chonsetna lentah hi nahin lhut lut hitam? Nangman kachunga bol louhel ding thil chu naboltai, ati.

¹⁰Chuin Abimelech'in Abraham henga, Ipi namu-a hiche thil hi nabol hitam? ati.

¹¹Chuin Abraham'in, Hiche mun'a hin Pathen ginna him him umpontin, ka-inneipi jeh hin eithat nun nate tia kagel ahi.

¹²Chujongleh atahbeh-in amanu hi kasopinu ahi ngutnai; amanu hi kapa chanu ahin, hinla kanu chanu vang ahipoi; chua amanu ka-inneipi hung hia ahitai.

¹³Chuin ahitin ahi, Pathen'in kapa in'a kona eiva lesah chun, keiman amanu henga, hichehi kadinga khotona namusahna ding chu ahi; ichena muntina, amahi kasopipa ahi neiti ding ahi, tia kanasei ahi, ati.

¹⁴Chuin Abimelech'in Kelngoi, bongchal, chule soh pasal ho leh soh numei ho apuijin, Abraham chu apen, chule a-inneipi Sarah chu alepeh kittan ahi.

¹⁵Chuin Abimelech'in, Vetan, kagam hi namasanga aume; nadeina mun mun'a chengin, ati.

¹⁶Chuin aman Sarah henga, Ven, keiman nasopipa dangka sangkhat kapen ahi; vetan, nakoma umho jouse le midang jouse lah-a amapa hi nangma dinga mitkhuna ahi, ati. Chuti chun amanu chu themchan sah-in aumtai.

¹⁷Chuti chun Abraham Pathen henga ataovin ahile, Pathen'in Abimelech, a-inneipi, chule asoh numei ho chu adamsahtan ahi. Chuin amahon chate ahing taovin ahi.

¹⁸Ajehchu Abraham inneipi Sarah jala chu Pakaiyin Abimelech insunga naobu jouse anakha ahitai.