Read Thado Chin Semtilbu 21 Bible Online

Semtilbu 21 - Thado Chin bible

Semtilbu 21

¹Chuin Pakaiyin aseibang chun Sarah avilin, phatthei aboh-in, chule aseibang chun Pakaiyin Sarah chunga amolsotan ahi.

² Hitichun Sarah'in nao avoptan, Chule Pathen'in ahenga asei phattah chun Abraham ateh nungin chapa khat ahinpehtai.

³Chuin Abraham'in adinga hung peng, Sarah'in ahinpeh achapa min chu Isaac asah tan ahi.

⁴ Chuin Pathen'in athupeh bangin Abraham'in achapa Isaac chu niget alhinin chep atan peh tan ahi.

⁵Chule achapa Isaac ahungpen chun Abraham kum jakhat alhingtan ahi..

⁶Chuin Sarah'in, Pathen'in einui sahtan, chule koihileh aja jousen einuihu dingu ahi, ati.

⁷Chuin amanun, Sarah'in naonoi hinchepsah inte, tin Abraham henga kon ana seithei jintem? Ahin ama ateh nungin keiman chapa khat kahin pehtai, ati.

⁸Chuin chapang chu ahung khang khangin anoichep abang tan ahi. Chuin Abraham'in Isaac noichep ban nikho chun golvah loupitah abolin ahi.

⁹Chuin Sarah'in Egypt mi Hagar'in Abraham ahinpeh achapa chun anuisat chu amun ahi.

¹⁰ Hijeh chun amanun Abraham henga, Hiche soh numeinu le achapa hi nodohtan; ajehchu hiche soh numeinu chapa hin kachapa Isaac toh gou alokhom theilou ding ahi, ati.

¹¹Chule achapa jalchun hichu Abraham mitmun lungnopmona tah ahitan ahi.

¹² Chuin Pathen'in Abraham jah-a, Chapang jal le soh numeinu jal chun lung nomotah-in umhih-in; ajehchu Isaac'a kona bou nachilhah kasim ding ahi.

¹³ Chule keiman nasoh numeinu chapa-a kona jong namkhat kasem doh ding ahi, ajehchu ama nangma chilhah ahi, ati.

¹⁴Chuin Abraham jingpitah-in athouvin, changlhah le twipai khat alan, Hagar chu apen, hichu alengkouva akhaipeh-in, chapang chutoh amanu asoldohtai. Chuin amanu apotdoh-in, Beersheba gamthipma avahle letan ahi.

¹⁵Chuin twipai'a twi chu ahung beitan ahile, amanun chapang chu hambohnoi khatna akoitan ahi.

¹⁶Chuin amanu achen, gamla thim tah thalpi kap phahna bepma chun agatoutan ahi: ajehchu amanun, chapang thi chu muda inge ati ahi. Chuin amanu amajonna chun atouvin, hakan akaptan ahi.

¹⁷Chuin Pathen'in chapang aw chu ajan; van'a konin Pathen vantil chun Hagar chu ahin kouvin, ajah-a, Ipi nathoh lel ham, Hagar? Kicha hih-in, ajehchu chapangpa aumna-a kon a-awgin chu Pathen'in ajatai.

¹⁸Kipat doh-in, chapang chu kaithouvin, chule nakhutna tuh-in, ajehchu keiman amachu nam lentah khatna kasem ding ahi, ati.

¹⁹Chuin Pathen'in amanu mit avahsah-in ahile, amanun twikhuh khat amutan ahi. Chuin amanu achen, twipai'a chun twi athaldim-in, chapang chu adonsah tai.

²⁰Chuin Pathen'in chapang chu aumpin; chule ama ahung khang khangin, gamthipma chun achengin, thalkap themtah ahung hitai.

²¹Chuin ama Paran gamthipma achengin; chule anun Egypt gama konin ajiding apui peh tan ahi.

²² Chuche laichun ahitin ahi, Abimelech le asepai hon lamkai Phicol chun Abraham henga, Natohna jouse-a Pathen'in nang naumpi jinge.

²³Hijeh chun tun, nangman keima le kachapate, chule kachapate chapate chunga dihlou tah-a na natoh louna ding le, keiman nangma kalungset bangahi keima chule nahung pemlutna gamhi lungsetna naneina dingin, hikoma hin Pathen minin kahenga kihahsel in, ati.

²⁴Chuin Abraham'in, Kaki hahsel ding ahi, ati.

²⁵Chuin Abimelech sohten twikhuh khat hunama alahpeh jeh uvin, Abraham'in Abimelech chu aphohtan ahi.

²⁶Chuin Abimelech'in, Keiman hiche thil bola hi koi ahi kahepoi; nangman jong neiseipeh khah pon, chule tunia kajah tilou, kajakha hihbeh-e, ati.

²⁷Chuin Abraham'in Kelngoile bongchal akaijin, Abimelech chu apen; anigel lhonin kitepna asemlhontai.

²⁸Chuin Abraham'in kelngoihon lah-a konchun kelngoinou anu sagi atumin akoidoh-in ahi.

²⁹Chuin Abimelech'in Abraham henga, Kelngoinou anu sagi atuma nakoidoh hi ipi tina ham? Ati.

³⁰Chuin aman, Hiche twikhuh hi keima lai ahi ti hettohsah nadinga hiche kelngoinou anu sagi hi kakhutna kona nakilah ding ahi, ati.

³¹Hiche jeh chun aman chuche munchu chu Beersheba asahtai; ajehchu hikoma chun amani akihahsel gel lhona ahi.

³²Chutichun amanin Beersheba mun'a chun kitepna asemlhontan ahi. Chujouvin Abimelech le asepaihon gal lamkai Phicol akipatdoh lhonin, Philistine gam lama akile lhontai.

³³Chuin Abraham'in Beersheba'a chun thingphung khat aphutnin, chua chun Pakai tonsot Pathen min chu akoutan ahi.

³⁴Chutichun Abraham Philistine gama nikho sottah akhopemin ahi.