Read Thado Chin Semtilbu 22 Bible Online

Semtilbu 22 - Thado Chin bible

Semtilbu 22

¹ Chuin chucheng nung chun ahitin ahi, Pathen'in Abraham chu apatepmin, ahenga, Abraham, tin akouvin ahile; aman, Ven, hikoma kaume, ati.

² Chuin aman, Nachapa, nachapa changkhatseh, nangailut tah Isaac chu puijin lang, Moriah gama chen; chule chukom achun keiman kahilding molsang khatna amachu govam thilton gatoh-in, ati.

³Chuin Abraham jingpi matah-in athouvin, asangan chu agongin, aumpi gollhang ho mi nile achapa Isaac chu apuijin, chule govam thiltona ding thing a-eh-in, chuin akipatdoh-in, Pathen'in ahilna munlam jonchun achetan ahi.

⁴Chuin, anithum chanin Abraham akhodah-in ahile, amun chu gamla tah-a agahmun ahi

⁵Chuin Abraham'in agollhang teni henga, hikoma hin nangni sangan toh ana um lhonin, keimale chapang hi khukoma khun gache lhoningting, Pathen kagahou lhonding, chuteng naheng lhona kahungkit lhonding ahi, ati.

⁶Chuin Abraham'in govam thilto ding thingchu alan, achapa Isaac aputsah-in; chule aman meile chemcha akhutna achoijin, chuin amani thakhat nin akilhon khom lhontai.

⁷Chuin Isaac'in apa Abraham henga, Hepa, atile, aman, Chapa hikoma kaume, ati. Chuin aman, Ven, mei le thing la aumnan, govam thilto ding kelngoi hoiba ham? ati.

⁸Chuin Abraham'in, Kachapa, govam thilto ding kelngoinou chu Pathen amatah-in hinpenante, ati. Chutichun amani thakhat nin achekhom lhonin ahi.

⁹ Chuin Pathen'in ama ahilna mun chu alhung lhontan; Abraham'in maicham khat atungdoh-in, chule thing chu asetoh-in, chuin achapa Isaac chu akanin, maicham chunga chun alupsahtan ahi.

¹⁰Chuin Abraham'in akhut alhangin, achapa thana ding chun chemcha chu alatan ahi.

¹¹Chuin Pakai Vantil'in van'a konin ahin samin, Abraham, Abraham, atin ahi. Chuin aman, Hikoma kaume, ati.

¹²Chuin aman, Chapang chunga chun nakhut lha hih-in, chujong le ama chu imacha lohih-in: ajehchu nangman nacha changkhat seh jong keima dinga itlouhela neipeh chu kamun, Pathen naginge ti tun kahetai, ati.

¹³Chuin Abraham akhodah-in aven ahile, anunglama chun kelngoichal khat nang lah-a aki-a oh amun ahi. Chuin Abraham achen, kelngoi chal chu agamanin, hichu achapa khelin govam thilto ding chun atohtan ahi.

¹⁴Chuin Abraham'in chumun chu Jehovah Jireh [4] asahtai: chule tuni chan geihin, Pakai molsanga hichu kipeding ahi, tin akiseijing nalaijin ahi.

¹⁵Chuin Pakai Vantil'in aniveina-in van'a konin Abraham chu ahinkou kitnin,

¹⁶ Ajah-a, Keima le keima-a kihahsel kahi, tin Pakaiyin aseije; Ajehchu nangman hiche hi nabola, chule nachapa, nachapa changkhat na-it louhel jeh-a;

¹⁷ Keiman phattheiboh na-a nangma phatthei kaboh ding, chule hapuna punsah na-a nachilhahte van'a ahsijat, twikhanglen kama neldi jat na kapunsah ding; chule nachilhahte chun amelmateu kotpiho alodingu ahi.

¹⁸ Chule nangman kathu nangai tah jeh-a, nachilhahte akona vannoi leiset chitin namtin jouse phatthei boh changding ahiuve, ati.

¹⁹Chuti chun Abraham gollhang teni henga ahung kilen; chuin amaho akipat doh-un Beersheba lam jonin thakhatnin acheuvin; chule Abraham Beersheba'a achengtan ahi.

²⁰Thil hicheng jouchun ahitin ahi, Abraham henga, Vetan, Milkah'in jong nasopipa Nahor dingin chate ahinpehtai, tin thu aseipeh-un ahi.

²¹Achapa peng masa chu Huz ahin, anaopa Buz ahin, chule Aram pa Kemuel,

²²Chule Chessad, Hazo, Pildash, Jidlaph chule Bethuel ahi.

²³Chule Bethuel'in Rebekah ahingin ahi. Hicheng get hi Milkah'in Abraham sopipa Nahor ahinpeh ahi.

²⁴Chuin athaikemnu Reumah chun Tebah, Gaham, Thahash chule Maachah ahingin ahi.