Read Thado Chin Semtilbu 23 Bible Online

Semtilbu 23 - Thado Chin bible

Semtilbu 23

¹Chule Sarah chu kum jakhat le kum somni le kum sagi alhingtan ahi; hicheng hi Sarah hinkho kumho chu ahi.

²Chuin Sarah chu Kirjath-Arba'a chun athitan; hichu Canaan gama Hebron chu ahi. Chuin Abraham chu Sarah op ding le ka dingin ahungin ahi.

³Chuin Abraham amithilong masanga chun adingdoh-in, Heth chapate henga chun thu aseijin,

⁴ Keimahi nalah uva um maljin le khopem bou kahi: kami thi hi kamit mu-a kona kavui doh theina dingin, gouva kanei dingin kivuina ding mun phabep khat neipeuvin, ati.

⁵Chuin Heth chapate chun Abraham adonbutnun, ajah-a,

⁶Ka pakai, nei ngaipeh temun: nangma kalah uva leng chapa loupitah nahi: kalhan hou nadei nalai tah-a namithi chu vuijengtan; namithi navuina dingin kalah uva hin koimachan kalhan nu pehdoh ding itpou vinge, atiuve.

⁷Chuin Abraham ading doh-in, chuche gam mite, Heth chapate anga chun akuntan ahi.

⁸Chuin amaho chutoh akihouvin, ajah uva, Kami thi kamitmu-a kona kavuiding nalungu ahile, neingaipeh-un, chule keima dingin Zohar chapa Ephron henga neithum peh-un,

⁹Nalah uva kivuina munna gouva kanei dingin, aman lhingset pedingin, aman anei alou bantah-a um Machpelah songko chu eipehen, ati.

¹⁰Chuin Ephron chu Heth chapate lah-a cheng ahi: chuin Hit mi Ephron chun Heth chate jahdingle khopi kul kotpi sunga lut jouse jahding chun Abraham chu adonbutnin,

¹¹Ahipoi ka pakai, ngaitemin; louchu kapeh nahitan, chule asunga um songko jong chu kapeh tha nahitai; kamite chapate masanga hi nangma kapeh nahitai: namithi chu kivuitan, ati.

¹²Chuin Abraham chuche gam mite angsunga chun aboh khupmin ahi.

¹³Chuin aman chuche gam mite jah ding chun Ephron henga, Nangman neipeh ahile katao ahi, neingaipeh-in: keiman gamman ding chun nangma sum peng kate; hichu keija konin kilah-in, chule keiman chukoma chun kami thi chu vuijing kate, ati.

¹⁴Chuin Ephron'in Abraham chu adonbutnin, ajah-a,

¹⁵Ka pakai, kasei neingaipeh-in: gam chu dangka shekel jali man bep ahin, hichu nangle kei kah-a itah ham? Hiche jehchun namithi chu kivuitan, ati.

¹⁶Chuin Abraham'in Ephron thusei chu angaipeh-in; chule Abraham'in Heth chapate hetnin Ephron'in aseijat dangka shekel jali chu, chuche laija sumkol veihon amanjiu dungjui chun Ephron chu atepeh tan ahi.

¹⁷Chuin Mamre kom Machpelah gamsunga um Ephron loumun chu, alou le asunga um songko, chule louva um thing jouse, chule alou kimvela um thing jouse chu,

¹⁸Heth chate angsung le khopi kul kotpi sunga lut jouse mitmun Abraham nei dingin pehdoh-in aumtan ahi.

¹⁹Chujouvin Abraham'in a-inneipi Sarah chu Canaan gama Mamre (hichu Hebron ahi) jona um Machpelah lou munna songkoa chun avuitan ahi.

²⁰Chuche lou munle asunga songko chu kivuina mun'a anei dingin, Abraham henga Heth chapate chun apedoh taovin ahi.