Read Thado Chin Semtilbu 24 Bible Online

Semtilbu 24 - Thado Chin bible

Semtilbu 24

¹Chuin Abraham chu a-upa lhehtan, akumjong atamlheh jengtan; chule Abraham chu Pakaiyin thil jouse-a phatthei aboh-in ahi.

²Chuin Abraham'in a-insunga asoh upapen, anei jouse chunga vaihompa henga chun, Nahenga katao ahi, nakhut chu kaphei noija koijin;

³Chule Pakai, Van Pathen le lei Pathen min paning ting, kachenna Canaan mite chanute lah-ahi kachapa jiding napuipeh louna dingin nangma kihahsel sah inge.

⁴Ahin kagam lama, ka-inkote lah-a nache-a kachapa Isaac jiding nagapuijoh ding ahi, ati.

⁵Chuin sohpa chun ahenga, Ijemtin numei chun hiche gamlama hin eihin juinom tahih le, nachapa hi nahungdoh na gamlama chu kalepuikit ngai jin tem? ati.

⁶Chuin Abraham'in amapa henga, Kachapa hi chulama nalepui louna dingin nangma chingthei jin.

⁷Pakai van Pathen, kapa in'a konle ka sopite gama kona eipuidohpa, chule kahenga, Hiche gamhi nachilhahte kapeh ding ahi; tia kihahsel pachun avantil namasanga solintin, chua kona chu kachapa jiding napuipeh ding ahi.

⁸Chule ijemtia numei chun najui nomlou tah-a ahile, hiche kihahsel na-a kona hi ongdoh-a nahi; kachapa vanghi chulama chu nalepui lou ding ahi, ati.

⁹Chuin asohpa chun apu Abraham phei noija chun akhut akoijin, chule chuche thudola chun ahenga akihahseltan ahi.

¹⁰Chuin asohpa chun sangongsao ho lah-a chun sangongsao som akipuijin akipatdoh tai; ajehchu apupa neile gou jouse chu akhutna uma ahi. Chuin akipatdoh-in, Mesopotamia gam, Nahor khopi jonin achetan ahi.

¹¹Chuin nilhah lam, numei ho twi thal dinga apotdoh phat dontah chun, khopi pama twikhuh koma asangongsao hochu akolsah-in ahi.

¹²Chuin ama, Vo Pakai, kapu Abraham Pathen, nahenga katao ahi, tunin lolhinna neihinpen, chule kapu Abraham lungsetna musah-in.

¹³Vetan, twikhuh koma hin kadingin, chule hiche khopi miho chanute twithal dingin ahungdoh-ui;

¹⁴Chule hiti hi hisah-in, nungah koikom hijongleh, Katao ahi, kadon dingin atwibel hin nemsah-in, kati-a, chule amanun, Donin, chule keiman nasangongsao hojong adondiu penange, tia seipen pen chu nasoh Isaac dinga nami got chu hijenghen. Chule nangman hichea kona chu kapu chunga hepina namusah-e ti kahet ding ahi, ati.

¹⁵Chuin ahitin ahi, chuche aseijou masang chun, veuvin, Abraham naopa, Nahor inneipi Milkah chapa Bethuel chanu Rebekah chun alengkouva twibel ahinpun, ahung potdoh-in ahi.

¹⁶Chule nungah nu chu amel ahoilheh jengin, nungah theng ahin, pasal koimachan akihetpi loulai ahi. Chuin amanu twikhuh-a chun akumlhan, atwibel chu athaldim-in ahung potdoh-in ahi.

¹⁷Chuin sohpa chu amanu chutoh kimuto ding chun alhaijelin, ajah-a, Katao ahi, natwi bela twi chu themkhat neidonsah-in, ati.

¹⁸Chuin amanun, Donin, ka pakai, ati. Chuin amanun gangtah-in atwibel chu akhutnin adomlhan, amapa chu adonsah tai.

¹⁹Chuin amapa chu twi adonsah jou phatnin, amanun, Nasangongsao hon jong adonkhop kahseovin, keiman twi thalpeh nange, ati.

²⁰Chuti chun amanun atwibel chu gankonga chun asunglha loijin, twi thal dingin twikhuh lama chun alhaijel kitnin, asangongsao ho jouse ding chun athal pehtan ahi.

²¹Chuin mipa chun Pakaiyin ajina chu alolhinsah ding le alolhinsah lou ding hetna din, kidangsa tah-in amanu chu thipbeh chan avejing tan ahi.

²²Chuin ahitin ahi, Sangongsao ho chun adonkhop phatnun, mipa chun sana bilba shekel keh gih le, amanun akhutna abu ding sana chao shekel som gih aladoh-in,

²³Amanu henga, Koi chanu nahim? katao ahi, neisei peh-in; napa in'a keiho din gena ding mun umin tem? ati.

²⁴Chuin amanun ajah-a, Keima Milcah'in Nahor dinga ahinpeh achapa Bethuel chanu kahi, ati.

²⁵Chuin amanu chun ahenga aseiben, Changpol le gancha a-an ding anneh nengtah-in kaneijui, chule genading mun jong kaneijuve, ati.

²⁶Chuin mipa chu akunin, Pakai chu ahou tan ahi.

²⁷Chuin aman, Kapu chunga hepina le akitahna nungsun loupa Pakai kapu Abraham Pathen chu nunnom hen: keijeng jong hi Pakai chun lamdunga eipuijin, kapu sopite in geijin eipuilutai, ati.

²⁸Chuin nungah nuchu alhaijelin, hiche ho chu anu insung mite agahiltai.

²⁹Chule Rebekah chun sopi khat aneijin, chule amin Laban ahin; chuin Laban chu twikhuh lama mipa henga chun alhaijelin ahi.

³⁰Chuin ahitin ahi, aman bilba le asopinu khutna chaochu amu-a, chule asopinu Rebekah'in, Mipa chun kakoma hitihin thu aseije, tia asei ajah phatnin; mipa koma chun ahungin ahile; veuvin, amapa chu twikhuh koma sangongsao holah-a chun adingin ahi.

³¹Chuin aman, Hunglutnin, nangma Pakai phatthei boh changpa, iti dana pama nadin ham? Ajehchu keiman in le sangongsao ho ding mun kagotsa ahitai, ati.

³²Chuin mipa chu in'a chun ahung luttan ahi. Chuin Laban'in sangongsao thilho chu alhamlhan, sangongsao hoding changpol le gan an chu apen, chule ama keng le anungjui ho keng silna ding twi apen ahi.

³³Chuin a-anga chun nehding an aluipeh-un; ahin amapan, Kaseiding dol kasei masangin neponge, ati. Chuin aman, Seitang em, ati.

³⁴Chuin aman, Keima Abraham sohpa kahi.

³⁵Chule Pakaiyin kapu Abraham chu nasatah-in phatthei aboh-in, ama milentah ahung hitai. Chule Pakaiyin amachu kelngoi hon le bong hon, dangka le Sana, soh pasal le soh numei ho, sangongsao ho le Sangan ho apen ahi.

³⁶Chule kapu inneipi Sarah chun ateh nungin kapu dingin chapa khat ahinpeh-in; ama koma chun aman anei jouse apesoh keijin ahi.

³⁷Chule kapun keima eikihahsel sah-in, Kachenna Canaan mite chanute lah-a kona hi kachapa jiding napui lou ding ahi.

³⁸Amavang nangma kapa in lama, kasopite lah-a naga chea, kachapa jiding nagapui ding ahi, atin ahi.

³⁹Chuin keiman kapu henga, Ijemtin numei chun eihin juinom tahih le, katin ahi.

⁴⁰Ahin aman kahenga, amasanga kalamlhah jing Pakai chun avantil nalhonpi sah intin, nalampi chu alolhinsah ding; chule nangman kasopite le kapa insunga kona kachapa jiding napuiding ahi.

⁴¹Nangma kasopite heng nalhun teng le, hiche kihahsel na-a kona hi na-ondoh ding; chule amahon amanu nangma henga apehlou uva ahile, hiche kahahsel na-a kona hi na-ondoh ding ahi, atin ahi.

⁴²Chule tuni luikhuh kahung lhunin keiman, Vo Pakai kapu Abraham Pathen, nangma tu-a hi kachena lampi hi nalolhinsah dinga ahile,

⁴³Vetan, keima twikhuh kom ahin kading-e; chule hung hiti ding ahi, nungah theng chu twi thaldinga ahunga, chule keiman ahenga, Katao ahi, natwi bela twi donding themkhat neipen, kati-a,

⁴⁴Chule amanun kahenga, Donin, keiman na sangongsao ho ding jong gathal nange, tia seija amanu chu kapu chapa dinga Pakaiyin agon numei chu hihen katin ahi.

⁴⁵Chuin hichu kalung sunga kaseijou masangin, veuvin, Rebekah hin alengkouva twibel ahinpun, ahung doh-in; chule amanu twikhuh-a chun akumlhan, twi chu agathal tai. Chuin keiman ahenga, Katao ahi, twi neidon sah-in kati.

⁴⁶Chuin aman gangtah-in alengkouva twibel chu adomlhan, Donin, keiman na sangongsao ho jong donsah inge, atin ahi. Chuti chun keiman twi chu kadonin, chule aman sangongsao ho jong adonsah tai.

⁴⁷Chuin keiman ama chu kadongin, ajah-a, Koi chanu nahim? kati. Chuin amanun, Milcah'in Nahor'a dinga ahinpeh chapa Bethuel chanu kahi, ati. Chuin keiman amaija bilba kabapeh in, akhutna chao kabupeh-in ahi.

⁴⁸Chuin kakunin, Pakai chu kahouvin, kapu sopipa chanu kapu chapa ji-a puipeh dinga lamdih-a eipuija Pakai kapu Abraham Pathen chu phatthei kabohtan ahi.

⁴⁹Chule tun, jetlam ham, veilam hama kakihei thei na dingin, kapu chu lungsettah le dihtah-a naboldiu le neisei peh-un: nabol loudiu jongle neisei peh-un, ati.

⁵⁰Chuin Laban le Bethuel'in adonbut lhonin, Hiche thil hi Pakaiya kon ahin; keihon ase, apha nahenga kaseithei pouve.

⁵¹Ven, Rebekah na-angsunga aume, kipuijin lang chen, chuleh Pakaiyin aseibang chun, napu chapa jiding hitahen, atilhone.

⁵²Chuin ahitin ahi, Abraham sohpa chun athuseiju ajah phatnin, tolla aboh khupmin Pakai chu ahoutan ahi.

⁵³Chuin Sohpa chun dangka kijep na, sana-a kijepna, chule ponsil ho aladoh-in, Rebekah chu apetan ahi. Aman asopipa leh anujong thil lutahtah apen ahi.

⁵⁴Chuin amale aumpiho chun aneovin chule adonun, jankhovah keijin aumtaovin ahi. Chuin amaho jingkah-in athouvun, chule aman, Kapu henglama neisol taovin, ati.

⁵⁵Chuin asopi pa le anun, Boinu hi ni chomkhat, nisombeh kaheng uvah umtadi hen; chujouteng leh che nante, atilhonne.

⁵⁶Ahivangin amapan ahenguva, Pakaiyin kachena alolhinsah namu nungun, neikho ngaisah tahih-un; kapu henglama kache theina dingin neisoldoh taovin, ati.

⁵⁷Chuin amahon, Keihon boinu kou ungting, ama dongnao vinge, atiuve.

⁵⁸Chuin amahon Rebekah chu akouvun, ajah-a, Hichepa toh nalhonna nache ding ham? atiuve. Chuin amanun, Kache ding ahi, ati.

⁵⁹Chuin amahon anaonu Rebekah le ajenlenu, chule Abraham sohpa le aloite chu alhadoh taove.

⁶⁰Chuin amahon Rebekah chu phatthei aboh-un, ahenga, Nangma kasopinu-u nahi, nangma nelsang tamtah nu hunghin lang, chule nachilhahte chun amelmateu kotpi hinlouhen, atiuve.

⁶¹Chuin Rebekah chu asoh nungah hotoh akipat doh-un, sangongsao ho chunga chun atouvun, mipa chu ajuitaove. Chutichun sohpa chun Rebekah chu akipuijin, achetan ahi.

⁶²Chuin Isaac chu Beer-lahai-roi twikhuh lampia konchun ahungin ahi; ajehchu ama lhanglam gama chu chenga ahi.

⁶³Chuin Isaac chu nilhah lamin loujaova lunggel dingin ahung potdoh-in; chuin ama akhodah-in aven ahile, veuvin, sangongsao ho ahung kijotnun ahi.

⁶⁴Chuin Rebekah akhodah-in, chuin Isaac chu amuphatnin, sangongsao chunga konin akumlhan ahi.

⁶⁵Ajehchu amanun sohpa henga chu, loujaova eilamdot diuva hung khu koi ham? tia anadoh-a; chule sohpa chun, Kapu ahi, anati ahi. Hijeh chun aman ponlukhuh alan, akikhuh tan ahi.

⁶⁶Chuin sohpa chun athilbol jouse chu Isaac aseipeh tan ahi.

⁶⁷Chuin Isaac'in ama chu anu Sarah pon insunga chun apuilutnin, chule Rebekah chu akipuijin, chuin amanu a-inneipi ahitan; chule aman amanu chu angailu lheh-in ahi. Chuin Isaac chu anu thi nungin lhamongin aumtan ahi.