Read Thado Chin Semtilbu 25 Bible Online

Semtilbu 25 - Thado Chin bible

Semtilbu 25

¹Chuin Abraham'in ji khat akipui kitnin, amin Keturah ahi.

²Chule amanun amachu Zimran, Jokshan, Medan, Midian, Ishbak chule Shuah ahinpeh-in ahi.

³Chuin Jokshan'in Sheba le Dedan ahingin, chule Dedan chapate chu Asshurim, Lethushim chule Leummim ahiuve.

⁴Chule Midian chapate chu, Ephah, Epher Hanoch, Abidah chule Eldaah ahiuve. Hichengse hi Keturah chate ahiuve.

⁵Chuin Abraham'in anei jouse chu Isaac apetan ahi.

⁶Chule ahin laijin Abraham'in athaikem chapate hojong thilpeh apen, chuin amaho chu achapa Isaac koma konin solamsang, solam gama asolmang tan ahi.

⁷Chule Abraham hinkho kum nikho ho chu kum jakhat le kum somsagi le nga ahi.

⁸Chuin Abraham'in alhagao alhadoh-in, ateh kemset, tehsetah, chule kum lhingsetnin athin; amite toh gopkhomin aumtan ahi.

⁹Chuin achapateni Isaac le Ishmael chun Hit mi Zohar chapa Ephron loumuna, Mamre koma Machpelah songkoa chun amachu avui lhontan ahi.

¹⁰ Chuche loumun chu Abraham'in Heth chapate-a kona anachohdoh ahi. Chua chun Abraham chu a-inneipi Sarah toh akivuitan ahi.

¹¹Chuin Abraham athi nungin ahitin ahi, Pathen'in achapa, Isaac chu phatthei aboh-in; chule Isaac chu Beer-lahai-roi twikhuh koma chun achengin ahi.

¹²Tun hiche hohi Abraham chapa, Ishmael Sarah sohnu, Egypt mi Hagar'in Abraham ahinpeh chilhah ho akhanggui chu ahi.

¹³Chule hiche ho hi akhanggui dungjui cheh uva Ishmael chapate min chu ahi. Ishmael cha apeng masa pen Nebaioth ahin, Abana Kedar, Adbeel, Mibsam,

¹⁴Mishma, Dumah, Nassa,

¹⁵Hadar, Tema, Jetur, Naphish chule Kedemah ahiuve.

¹⁶Hichengse hi Ishmael chapate min chu ahin, chule hichengse hi akhopiu dungjui le akulpiu dungjuija amin; chule avaipiu dungjuijin leng som le leng ni chu ahiuve.

¹⁷Chule Ishmael hinkho kumho chu kum jakhat le kum somthum le sagi ahi. Chuin aman alhagao alhadoh-in athitan; chule amite toh gopkhomin aumtan ahi.

¹⁸Chule amaho chu Havilah'a patnin Shur geijin achengun, hichu Egypt solam Assyria jotna-a um ahi. Chuin ama asopite jouse mitmun athitan ahi.

¹⁹Chule hicheng hi Abraham chapa, Isaac khanggui hochu ahiuve: Abraham'in Isaac ahingin ahi.

²⁰Chule Isaac'in Padan Aram gama Syria mi Bethuel chanu, Syria mi Laban sopinu Rebekah aji dinga akipui chun, kum somli alhing tai.

²¹Chule a-inneipi chin jehchun Isaac'in Pakai henga ataopeh-in ahi. Chuin Pakaiyin ataona asanpeh-in, a-inneipi Rebekah chun nao avoptan ahi.

²²Chuin chapang teni chu asunga chun ahung kidel lhonin ahile, amanun, Hitiding ahi-a ahile, ibola hiti kahim? ati. Chuin amanu Pakai dong dingin achetai.

²³ Chuin Pakaiyin amanu henga, Nanaobu sunga hi nam ni uma ahin; chule na-oisunga kona hi hina chomcheh nei mini khendoh-a umding ahi; chule khatjo chu khatjoh sanga chu hatjo ding, chule a-upa johchun anaopa ajending ahi.

²⁴Chuin amanu asophat alhin phatnin, veuvin anaobu sunga chun naosen ni anaumin ahi.

²⁵Chule ahungpot masa chu asanin, samul pon bangin amulin; chule amin Esau asah-un ahi.

²⁶Chuche jouchun anaopa ahungpotnin, akhutnin Esau khotal jum ahintuh-in; chule amin Jacob asah-un ahi. Rebekah'in amani ahinpeh chun Isaac kum somgup alhingtan ahi.

²⁷Chutichun chapang teni chu ahung khangdoh lhonin; chule Esau chu sakap themtah mi gamlah mi ahin, Jacob vang chu mi-ummong pon in'a cheng ahi.

²⁸Chuin asakap sa anehji jeh-in, Isaac chun Esau angailun, Rebekah'in vang Jacob angailun ahi.

²⁹Khatvei hi Jacob'in annoi ahonin; chule Esau gama konin ahungin, agilkel lheh jengin ahi.

³⁰Chuin Esau'in Jacob henga, Katao ahi, na annoi hon san peh chu neineh sah-in, ajehchu keima kel lih paiding kahitai, ati. Hijeh-a chu amin Edom kisah ahi.

³¹Chuin Jacob'in, Na-upat chu tunin neichoh sah-in, ati.

³²Chuin Esau'in, Athipai ding kahitai, keima dinga upat hi ija phachom dingham? ati.

³³ Chuin Jacob'in, Tunin kahenga kihahsel in ati: chuin ama ahenga akihahselin, a-upat chu Jacob henga akijoh tai.

³⁴Chujouvin Jacob'in Esau chu changlhah le bechimnoi chu apen; chuin aman anen adonin, chuin akipatdoh-in, achemang tan ahi. Hitichun Esau'in a-upat na chu iman ageltapoi.