Read Thado Chin Semtilbu 26 Bible Online

Semtilbu 26 - Thado Chin bible

Semtilbu 26

¹Chuin chuche gama chun Abraham nikho laija kellhah masa chu hilouvin, kel ahung lhatan ahi. Chuin Isaac chu Philistine lengpa Abimelech henga Gerar mun'a agachen ahi.

²Chuin Pakai ahenga ahung kilah-in, ajah-a, Egypt gama chesuh hih-in, keiman kaseipeh ding gama chun chengin.

³Hiche gama hin khopemin, chule keiman nangma umping ting, phatthei kaboh ding nahi; ajehchu nangma le nachilhahte henga hiche gamjouse hi kapeh ding; chutia chu keiman napa Abraham henga kaki hahsel na chu kasuh bulhit ding ahi.

⁴Chule keiman nachilhahte van'a ahsi jatnin punsah ingting, chule hiche gam jouse hi nachilhahte kapeh ding; chule nachilhahte-a kona vannoi namtin jouse phatthei boh chang ding ahiuve.

⁵Ajehchu Abraham'in kathu angaijin chule kathuhil ho, kathupeh ho, kachondan ho, chule kadanthu ho anitnin ahi, ati.

⁶Chuti chun Isaac Gerar mun'a chun achengtan ahi.

⁷ Chuin chuche mun'a cheng ho chun a-inneipi thudol adongun ahile, aman, Kanaonu ahi, ati. Ajehchu amanu ahoijeh chun chuche munna miho chun Rebekah jal chun eithat getnunte, tia ageljeh-a, Ka-inneipi ahi, ati ngamlou ahi.

⁸Chuin ahitin ahi, ama chukoma sottah aumjouvin, Philistine lengpa Abimelech'in bangkotna konin ahinven ahile, Isaac'in Rebekah anoupet amun ahi.

⁹Chuin Abimelech'in Isaac chu akouvin, ahenga, Vetan, amanuhi na-inneipi ahimonge; achutile itidana, Kanaonu ahi, nati ham? ati. Chuin Isaac'in ahenga, Ajehchu keiman ajole amanu jal hin thilo getninge, tia kagel jeh ahi, ati.

¹⁰Chuin Abimelech'in, Kachunguva nathil bol hi ipi hitam? Miho lah-a khattou hin na-inneipi hi bailam tah-a aluppi jeng thei ahin, chutia chu kachunguva hi themona nahin lhunsah jengthei ahi, ati.

¹¹Chuin Abimelech'in amite jouse chu agih-in ahenguva, Koi hile mipa ahilou le, a-inneipi tongkha chan chu kithat teiding ahi, ati.

¹²Chujouvin Isaac'in chuche gama chun muchi athen ahile, chuche kum chun ajat ja a-atdoh-in ahi; chule Pakaiyin amachu phatthei aboh-in ahi.

¹³Chuin mipa chu ahung haolheh jengtan mihao nasatah ahung hi kahsen ahao tultul jengin ahi.

¹⁴Ajehchu aman kelngoihon, bonghon, chule soh tamtah aneitan ahi. Chuin Philistine mihon amitthip taovin ahi.

¹⁵Ajehchu apa Abraham hinlaija apa sohten analaiju twikhuh jouse chu Philistine mihon asuhtanguva, chule leija adipdim gamu ahitai.

¹⁶Chuin Abimelech'in Isaac henga, Keiho-a konin chemang taovin, ajehchu nangma keiho sangin gamchengin nahat tai, ati.

¹⁷Chuin Isaac chua kon chun akichonin, Gerar phaichama pon in asongin chua chun achengtai.

¹⁸Chuin Isaac'in apa Abraham hinlaija atuikhuh laiho chu alai kittan ahi; ajehchu Philistine miten Abraham thinunga anasuh tang gamu ahitai. Chule apan ana minsah bang cheh chun, amin sah cheh kittan ahi.

¹⁹Chuin Isaac sohten phaicham chu alaijun ahile, twinah put khat amutaove.

²⁰Chuin Gerar mun'a ganchingho chun, Twi hi keiho-a ahi atiuvin, Isaac ganching ho chu akinah pi taovin ahi. Chuin amahon akinahpi jeh-u chun twikhuh minchu Esek asahtai.

²¹Chujouvin amahon twikhuh chomkhat alaikitnun ahile, hiche chunga jong chun akina kit taove. Hijeh chun aman chuche minchu Sitnah asahtai.

²²Chuin ama chua konchun akichon kitnin, twikhuh khat alaikitnin ahile hiche chunga vang chun akina tapouve. Hijeh chun hiche mun chu Rehoboth asahtai; ajehchu tunvang Pakaiyin eihodin mun eipe taovin, chule hiche gamahi hatah-a ipundiu ahitai, ati.

²³Chuin hichea kon chun ama Beersheba'a achetou tan ahi.

²⁴Chuin chuche janchun ahenga Pakai ahung akilah-in, Keima hi napa Abraham Pathen chu kahi; kicha hih-in, ajehchu keiman nangma kaumpinai; chule kasoh Abraham jala nangma phatthei kaboh ding, chule nachilhah kapunsah ding ahi, ati.

²⁵Hijeh chun aman chua chun maicham khat asemin, Pakai minchu akouvin, chule chua chun apon in asongin ahi. Chuin chua chun Isaac sohte chun twikhuh khat alaijun ahi.

²⁶ Chujouvin Abimelech Gerar'a konin agolho lah-a khat Ahuzzath le, asepai lamkai Phicol toh ahenga agacheuvin ahi.

²⁷Chuin Isaac'in amaho henga, Neivetda jeh uva naheng uva kona neisol doh-u ahitan, ipi dinga kahenga hung nahiuvem? ati.

²⁸Chuin amahon, Pakaiyin, naumpi-e ti kichentah-in kamuve. Hijeh-a chu keihon, Tun eiho kah-a, keihole nangma kah ngeija kihahselna umhen lang, nangma toh kitepna neileuhen katiu ahi.

²⁹Chutia chu keihon nangma katohkhah daova, chule apha tailou imacha dang kabol daova, chule lungmong tah-a kasolmang bangu chu, nangman jong neisuhset louna dingu ahi. Tun nangma Pakai phatthei boh chang nahitai, atiuve.

³⁰Chuin aman amaho ding chun golvah abolin, chuin amahon aneuvin, adonnuvin ahi.

³¹Chuin jingkah matah in athouvun, amaho khat le khat akihahsel uvin ahi. Chuin Isaac'in amaho chu asoldoh-in, chule amaho ama-a konin lung mongin achedoh taove.

³²Chuin chuche ni mama chun ahitin ahi, Isaac sohte ahungun, atuikhuh laiju chungchang thu chu ahung seijun, ahenga, Twi kamutaove, ahung tiuve.

³³Chuin aman hichu Shebah asahtai. Hijeh chun chuche khopi minchu tu nikho geijin Beersheba ahung hitai.

³⁴Chuin Esau kum somli alhinin, Hit mi Beeri chanu Judith, chule Hit mi Elon chanu Bashemath jin aneijin ahi.

³⁵Chule amani chu Isaac le Rebekah dingin lungnatna ahi lhonin ahi.