Read Thado Chin Semtilbu 27 Bible Online

Semtilbu 27 - Thado Chin bible

Semtilbu 27

¹Chuin ahitin ahi, Isaac chu ateh-a khomutheilou khopma amit athim phatnin, achapa lenjo Esau chu akouvin, ahenga, Kachapa, atin ahile, aman adonbutnin, Ven, hikoma kaume, ati.

²Chuin aman, Tun vetan, keima katehtan, itih nikho-a kathi dingham kahepon ahi.

³Hijeh chun katao ahi, tun nagalvonho, nalivathei le nathalpi kikenin lang, gamlah-a chen, chule keimadin sa gakaptan.

⁴Chule kathi masanga kahinnan phatthei nabohthei nadingin, kadulamtah-in, tuitah-in neihon peh-in lang, kaneh dingin kahenga hinchoijin, ati.

⁵Chule Isaac'in achapa Esau henga athusei chu Rebekah'in ajatan ahi. Chuin Esau sakap ding le ahinpo dingin gamlah-a achetan ahi.

⁶Chuin Rebekah'in achapa Jacob henga, Ven, napa keiman na-upa henga,

⁷Sa gakap minlang, chule me tuitah-in neihon peh-in, chule hichu nengting, kathi masangin Pakai masanga phathei naboh inge, tia asei kajai, ati.

⁸Hijeh chun tun, kachapa, nangman kathupeh dungjuijin kathu ngaijin.

⁹Tun gan hon lah-a chenlang, alah-a kelnou phatahtah ni hinchoijin; chule keiman hichu adulam tah-in, napa dingin me tuitah honpeh-ing kate.

¹⁰Chule aman aneh-a, athi masanga phatthei naboh nadinga, hichu napa henga nachoipeh ding ahi, ati.

¹¹Chuin Jacob'in anu Rebekah henga, Ven, ka-upa Esau hi mimul ahin, keimala minam kahi ngalin,

¹²Ijemtin kapan eihin tham tale, ama dinga keima hi milhemtoh kabah ding ahin, phatthei boh hijolouvin, gaosap najoh kaki buh khum ding ahi, ati.

¹³Chuin anun ahenga, Kachapa nakigaosap nachu keima chunga chumaihen; kathuhi ngaipou pouvin, chenlang neigalah pehtan, ati.

¹⁴Chuin ama achen, agalan, hichu anu henga ahinchoitan ahi. Chuin anun apa dulamtah in me chu ahontan ahi.

¹⁵Chuin Rebekah'in achapa lenjo Esau von phaho in'a akoma umho chu alan, achapa neojo Jacob chu avonpehtan ahi.

¹⁶Chuin amanun kelnou vunho chu akhut teni le angong nam laija chun atom pehtan ahi.

¹⁷Chuin amanun ame hon tuitah le changlhah chu achapa Jacob khutna apetan ahi.

¹⁸Chuin ama apa henga ahungin, ajah-a, Hepa, atin ahile; aman, Hikoma kaume, koi nahim kachapa, ati.

¹⁹Chuin Jacob'in apa henga, Keima nachapa apeng masa Esau chu kahi; nangman neithupeh bangin kagaboltai. Katao ahi, thouvin, chule touvin lang, phatthei neibohnadin kasakap hi netan, ati.

²⁰Chuin Isaac'in achapa henga chun, kachapa, chubang loma gangtah-a nagamu jeng chu iti danham? ati. Chuin aman, Pakai na Pathen'in kahenga ahinchoijeh ahi, ati.

²¹Chuin Isaac'in Jacob henga, Katao ahi, kachapa Esau mong mong nahi nahilou katham theina dingin, hungnai temin, ati.

²²Chuin Jacob'in apa Isaac ahin naijin, chuin aman amachu achulin, A-aw hila Jacob aw ahin, ahin akhut ho hila Esau khut ahingalin, ati.

²³Akhut hochu a-upa Esau khut banga amuljeh chun, koi ahi ahekhen thei tapon ahi. Hijeh chun aman amachu phatthei aboh tan ahi.

²⁴Chuin aman, Nangma kachapa Esau nahi mong mong hinam? ati. Chuin aman adonbutnin, Kahimonge ati.

²⁵Chuin aman, Kahenga hinchoi naijin, kahinnan phatthei kaboh thei nadingin, kachapa sakap nenge, ati. Chuin aman ahinchoi naipeh-in, anetan; chuin lengpitwi jong ahin choipeh-in, adontan ahi.

²⁶Chuin apa Isaac'in ahenga, Kachapa, tun hung naijin lang, neichopmin, ati.

²⁷Chuin ama ahung naijin, achopmin; chuin aman avonho namchu anah-in, amachu phatthei aboh-in, hitin ati, Ven kachapa gimnam hi Pakai phatthei boh gam gimnam ahi.

²⁸Chuti ahijeh chun Pathen'in nangma van daitwi le leipha, chule chang le lengpitwi ninglhing setnin napehen.

²⁹Mitinin nangma najenu hen, chule namtin nangma anga kuncheh-u hen. Nasopite chunga a-pakaiyun uminlang, nanu chapate na anga kun uhen. Nangma nagaosap chanchu gaosap chang hen lang, nangma phatthei naboh chanchu phatthei boh changhen, ati.

³⁰Chuin ahitin ahi, Isaac'in Jacob phatthei aboh jou chun, Jacob apa Isaac henga konin anapotdoh man hamhamin, a-upa Esau asadela konin ahung lhung paitan ahi.

³¹Chuin aman jong me tuitah in ahonin, apa henga ahin domin; chule apa henga, Kapa, thouvin lang nahinnan phatthei neiboh nadingin, nachapa sakap hi netan, ati.

³²Chuin apa Isaac'in ahenga, Nangma koi nahim? ati. Chuin aman, Keima nachapa apeng masa Esau kahi, ati.

³³Chuin Isaac nasatah in ati akithing jengtan, koiham? Sa gakapma kahenga asa hinchoija, nahung lhun masanga kana nehjou hella, phatthei kana bohchaisa chu hoilamba hitam? Tahbeh-a amachu phattheiboh changding ahitai, ati.

³⁴Chuin Esau'in apa thusei ajah phatnin, nasatah le lhasetah in akaplutlut jengtan, apa henga, Vo hepa, phatthei neiboh-in, keimatah ngeijong hi phatthei neibohteijin, ati.

³⁵Chuin aman, nanaopa kahenga doha themtah-in ahungin, na phatthei chanding chu akilahdoh tai, ati.

³⁶Chuin aman Jacob kisah chu dih lheh hilou ham? Ajehchu aman niveijen ei dohabol ahitai. Aman ka-upat eilah peh-in, chule ven tun kaphatthei chanding eilahmang peh kit tai, ati. Chuin aman, Phattheina neikhen peh louhel hitam? ati.

³⁷Chuin Isaac'in Esau chu adonbutnin, ahenga, Vetan, amachu napakai din kasemtan, chule asopite jouse asohdin kapetan; chule ama chang le lengpitwi jin kavangboh tai. Achutile kachapa nangdinga ipi kabolpeh ding hitam? ati.

³⁸ Chuin Esau'in apa henga, Phattheina khatseh bou nanei hija ham? Vo hepa, keimahi, keima ngeijong hi phatthei neiboh teijin, ati. Chuin Esau chu hatah-in akaptan ahi.

³⁹ Chuin apa Isaac'in adonbutnin, ahenga, Vetan, nachenna ding chu leiphatna le chunga kona van daitwi umna mun hiding ahi.

⁴⁰ Chule nangma nachem jama nahina, chule nanaopa najending; chule hung hitiding ahi: nangma vaihom na nahin nei teng le, nangonga kona anamkoljon chu nasuhboh ding ahi, ati.

⁴¹Chuin apan phatthei aboh jeh chun, Esau'in Jacob ahotan ahi. Chuin Esau'in alungsunga, Kapa chunga lunghemna nikho anaitan; chujoule kanaopa Jacob hi that ning kate, ati.

⁴²Chuin achapa lenjo Esau thusei chu Rebekah chu aseipeh taovin ahi. Hichun aman achapa neojo Jacob chu akouvin, ahenga, Vetan, na-upa Esau'in nangma thading nagon, amale ama akilhamonin ahi.

⁴³Hijeh chun tun, kachapa kathu ngaijin, kipat ninlang Haran'a kasopipa Laban heng lama jamtan.

⁴⁴Chule na-upa lungsat nahi abei kahsen, ama chutoh nichom khat ga umtan.

⁴⁵Nachunga na-upa lunghan nahi abeija achunga nathilbol hi asuhmil tengleh, mi hinsoling ting, chua kon chun hung puidoh sah nange. Ipi dinga hi nikhat tah-a nani lhonna kachan ding ham? ati.

⁴⁶Chuin Rebekah'in Isaac henga, Heth chanute jal hin kahinkho ahesoh lheh jenge, Jacob hin hiche gama Heth chanute lah-a hi ji aneikit dingle, kahin hi keidinga ipi phatna ding umem? ati.