Read Thado Chin Semtilbu 28 Bible Online

Semtilbu 28 - Thado Chin bible

Semtilbu 28

¹Chuin Isaac'in Jacob akouvin, phatthei aboh-in, thu apen ahenga, Nangman Canaan mite chanuho naji dinga nakipui theilou ding ahi.

²Kipat in, Padan Aram lama nanu pa Bethuel in'a chen; chua kon chun nanu sopipa Laban chanute khat naji ding gakipuijin.

³Chule nangma vaipi khat nahi thei nadingin, hat chungnung Pathen'in phatthei naboh hen, nachi phatsah henlang, hapunin napunsah hen.

⁴ Chule hiche nakholjinna gam, Pathen'in Abraham henga anapehsa gamhi nalotheina din, Abraham phatthei kiboh na chu nangma le nachilhahte napeu hen, ati.

⁵Chuin Isaac'in Jacob asolmang tan ahi. Chuin ama Jacob le Esau nu Rebekah sopipa, Syria mi Bethuel chapa Laban henglam Padan Aram lama achetan ahi.

⁶Esau'in, Isaac'in Jacob phatthei aboh-a Padan-Aram'a ji kipui dingin asol le, aman amachu phatthei aboh-a, Canaan chanute nakichenpi louding ahi, tia thu apeh chu amun,

⁷Chule Jacob in anule apa thu angaija, Padan Aram-a ache chu amun;

⁸Chule Esau'in Canaan chanute chun apa Isaac alung lhaisah pouve, ti amu phatnin;

⁹Chuin Esau Ishmael henga achen, Abraham chapa, Ishmael chanu Mahalath, Nebojoth sopinu chu ji aneisaho chung chon chun akichenpi kitnin ahi.

¹⁰Chuin Jacob Beersheba'a konin akipat doh-in, Haran lam jonin achetai.

¹¹Chuin ama munkhat alhun phatnin, nisa alhumtah jehchun ageh khovahtan ahi. Chuin aman chuche munna songkhat chu alan, lukhapmin aneijin, chukoma ihmuding chun alumtan ahi.

¹² Chuin aman mang aneijin, Vetan, leiset chunga kalbilei akidon, chule hiche mong chun van aphan, chule Pathen vantil ho akumsuh akaltou chu amun ahi

¹³ Chuin vetan, chuche vuma chun Pakai adingin, Keima hi Pakai, napu Abraham Pathen, chule Isaac Pathen chu kahi; nalupna gamhi nangma le na chilhahte henga kapeh ding ahi, ati.

¹⁴ Chule nachilhahte chu leisetna leivuijat hung hintin, chule nangma lhumlam le solama, chule sahlam leh lhanglama naki thejao ding ahi. Chule nangma le nachilhahte-a kona vannoi'a namtin phattheiboh chang dingu ahi.

¹⁵Chule vetan, Keiman nangma kaumpinai, chule nachena chana kachintupma, hiche gama hi kahin nungpui kitding nahi; ajehchu nahenga kasei hi kamolso masangsen nangma dalhapong kate.

¹⁶Chuin Jacob a-ihmutna konin ahung khangdoh-in; chule aman, Hiche mun'a hin Pakai aum monge; hichu keiman kana hetlou ahi, ati.

¹⁷Chuin ama akichatan, Hiche mun hi tijat iti umtam! hikom hi Pathen in tailou adang ima ahipoi, hiche hi van kotpi phung ahi, atitai.

¹⁸Chuin Jacob jingpitah-in athouvin, lukhapma akoi song chu alan, song khom-in aphutnin, achungvuma chun thao asungin ahi.

¹⁹Chuin aman chumun chu Bethel asah tai. Ahin atila chu chuche khopi chu Luz anakisah ahi.

²⁰Chuin Jacob'in kitepna aneijin, Pathen'in eiumpia, kachena lampia hi eichintupma, nehding changlhah le kivon nading sil le chen eipeh-a,

²¹Hitia chu kapa in'a lungmong tah-a kahung kilekitna ahile, Pakai chu ka Pathen hiding ahi.

²²Chule hiche song khoma katun hi Pathen In hiding; chule nangman neipeh jouse-a kona hi somakhat thonlou hela kapeh ding nahi, ati.