Read Thado Chin Semtilbu 29 Bible Online

Semtilbu 29 - Thado Chin bible

Semtilbu 29

¹Chujouvin Jacob akholche achepeh-in, chule solam mite gam agalhungtai.

²Chuin aman agahven ahile, gamlah-a twikhuh khat amun, chule veuvin, akoma chun kelngoi honthum akolun ahi; ajehchu twikhuh-a kona chu amahon kelngoi honchu twi adonsah jiu ahi. Chule song lentah khat twikhuh kama chun akikoijin ahi.

³Chule chua chu kelngoi hon jouse kikhom khom jiuva, chule achinghon twikhuh kama kona chu song chu atahdoh jiuva, kelngoi ho chu twi adonsah jiu ahin; chujouteng, song chu twikhuh kama aum na-a chu akoikit jiu ahi.

⁴Chuin Jacob'in amaho jah-a, Kasopite, nangho hoilamkon mi nahiuvem? ati. Chuin amahon, Haran'a kon kahiuve, atiuve.

⁵Chuin aman ahenguva, Nahor chapa, Laban chu nahet uvem? ati. Chuin amahon, Kaheuve, atiuve.

⁶Chuin aman ahenguva, Amachu damnam? ati. Chuin amahon, Adamnai, chule ven, achanu Rachel'in kelngoi ahinpuijin ahunge, atiuve.

⁷Chuin aman, Veuvin, nisa khu asang lheh nalaijin, gancha puikhom phatjong ahihihlaije. Kelngoi hohi twi chipsah unlang, an ganehsah kit taovin, ati.

⁸Chuin amahon, kelngoihon jouse hung kikhop khom soh-a, twikhuh kama song akilahdoh masangsen, keiho chedoh thei pouvinge. Hiche jouteng chulebou keihon ka kelngoihou twi kadonsahjiu ahi, atiuve.

⁹Chuin ama amaho chutoh akihou nalaijin, Rachel apa kelngoi ho chutoh lhonin ahungin ahi; ajehchu aman kelngoiho chu achinji ahi.

¹⁰Chuin ahitin ahi, Jacob'in anu sopipa Laban chanu Rachel le, anu sopipa Laban kelngoi hochu amuphatnin, Jacob chu agache naijin, song chu twikhuh kama konin atangdoh-in, anu sopipa Laban kelngoihon chu twi achip sah-in ahi.

¹¹Chuin Jacob in Rachel chu achopmin hatah in akaptan ahi.

¹²Chuin Jacob'in ama amanu pa sopipa ahi le, Rebekah chapa ahichu Rachel aseipeh tan ahi. Chuin amanu alhaijelin apa agahiltan ahi.

¹³Chuin ahitin ahi, Laban'in asopinu chapa Jacob thu ajah phatnin, ama kimupi ding chun alhaijelin, amachu apomin, achopmin, a-in'a ahinpuitai. Chuin aman Laban chu thu jouse ahiltan ahi.

¹⁴Chuin Laban'in ahenga, tahbeh-in nangma kagu le kaphe mong nahi, ati. Chuin ama akoma chun lhakhat aumtan ahi.

¹⁵Chuin Laban'in Jacob henga, Nangma katupa nahimana keima mohseh-a neijen ding ham? Natoh man ipi hiding ham, neisei peh-in? ati.

¹⁶Tun Laban'in chanu ni aneijin, alen jonu minchu Leah ahin, aneo jonu minchu Rachel ahi.

¹⁷Leah chu amit agelin, Rachel vang chu mel hoitah le dei umtah ahi.

¹⁸Chuin Jacob'in Rachel chu angailun, hijeh chun aman, Keiman nachanu neojo Rachel lonan kum sagi nangma jen inge ati.

¹⁹Chuin Laban'in, Keiman amanu midang kapeh sangin, nangma kapeh ding aphajoi. Kakoma umtan ati.

²⁰Chuin Jacob'in Rachel dingin kum sagi ajenin, ahin amanu angailut jehchun hiho chu amadin ni chomkhat to abang bepmin ahi.

²¹Chuin Jacob'in Laban henga, Ahenga kalut theina dingin, ka-inneipi chu neipetan; ajehchu kanikho ho abulhing tai, ati.

²²Chuin Laban'in chuche munna mijouse akhomin golvah abolin ahi.

²³Chuin nilhah ahiphat nin ahitin ahi, aman achanu Leah chu apuijin, Jacob henga apuilut tan; chule amapa jong amanu henga aluttan ahi.

²⁴Chuin Laban'in asohnu Zilpah chu achanu Leah sohnu din apetai.

²⁵Chuin ahitin ahi, jingkah ahunghi phatnin, Veuvin, Leah ana hitai. Chuin aman Laban henga, kachunga nabol hi ipi ham? Rachel dinga nangma kajen hilou ham? Achuti le ipi dinga nei dohabol ham? ati.

²⁶Chuin Laban'in, kagam uva hi apeng masa masanga aneojo pehdoh chu kibol jilou hel ahi, ati.

²⁷Amanu hapta hi subulhitnin, chule kum sagi dang neijen kitding manin amanu jonghi nangma pekit naovinge, ati.

²⁸Chuin Jacob'in chuti chun abolin, amanu hapta chu asubulhit tai. Chuin aman achanu Rachel chu aji dingin apetan ahi.

²⁹Chuin Laban'in asohnu Bilhah chu achanu Rachel sohdin apetan ahi.

³⁰Hitichun ama Rachel henga jong alutnin, aman Rachel chu Leah sangin angailu jon, chule amachu kum sagi dang ajenbe kitnin ahi.

³¹Chuin Leah hotbola aumchu Pakaiyin amuphatnin, anaobu ahonpehtai. Ahin Rachel vangchu achingin ahi.

³²Chuin Leah'in nao avopmin chapa khat ahingin, amin Reuben asah tai. Ajehchu amanun, tahbeh-in Pakaiyin kahesohna amutan; tunvang ka-inneipun eingailu tante, ati.

³³Chuin amanun nao avop kitnin chapa khat ahingin, Pakaiyin hotna kaum ahetjeh-a, hiche chapa jong hi eipeh ahi, ati. Chuin aman amin Simeon asahtai.

³⁴Chuin amanun nao avop kitnin chapa khat ahingin, Tunvang chapa thum kahin pehtah jeh-in ka-inneipu keija beh tante, ati. Hijeh chun amin Levi asahtai.

³⁵Chuin amanun nao avopkit leuvin chapa khat ahing kitnin, chuin amanun, Tunvang keiman Pakai chu vahchoi tange, atin ahi. Hijeh chun amanun amin Judah asahtai: chujouvin amanun acha hin abangtai.