Read Thado Chin Semtilbu 3 Bible Online

Semtilbu 3 - Thado Chin bible

Semtilbu 3

¹ Tun Pakai Pathen thilsem gamsaho jouse lah-a chun gul ajonchih penin ahi. Chuin aman numeinu jah-a, Pathen'in honsunga thingga khatcha jong naneh lhon lou ding ahi, tia aseijem? ati.

²Hichun numei nun gul jah-a, Keinin honsunga theiga ho kanethei lhonai;

³Ahivangin hon lailunga um theiga vangkhu, Pathen'in, naneh lhon lou ding, tohjong natohkhah lhon louding ahi, achuti loule nathi lhonding ahi, tin aseije ati.

⁴Chuin gul chun numei nu jah-a, Nathi tahbeh lhon louding ahi;

⁵Ajehchu hichu naneh lhon ni nileh namitlhon hahdoh ding, Pathen toh nabah lhona, apha ase nahet lhon ding ahi chu Pathen'in ahet ahi, tin aseitai.

⁶Chuin numei nu chun theiphung chu neh dinga aphat le, mitna dinga vetnom aum, chule mikhat chihsah nadinga dei umtah ahichu amuphatnin, amanun aga chu alouvin, anetan; chule a-inneipu jong chu apen ahile, amapan jong anetai.

⁷Chuin amani amitlhon ahung hahdoh tan, chule sagohkeu ahilhon ahelhon tai; chuin amanin theichang naho akilmat lhonin, vonin akivon lhontan ahi.

⁸Chuin ni ahung daijin amanin hona chun Pakai Pathen kholhah husa gin aja lhontan; chuin Adam le a-inneipi chu Pakai Pathen umna-a kon chun honsunga thinglah-a chun akisel lhontan ahi.

⁹Chuin Pakai Pathen'in Adam chu ahin kouvin, ajah-a, Hoija um nahim? ati.

¹⁰Chuin aman, Keiman honsunga nahusagin kajan, kasagoh keo kahijeh-in kakichan, kakisel ahi, ati.

¹¹Chuin aman, Sagohkeo nahi kon naseipeh ham? Nehih-in tia kathupeh thingga chu naneh hitam? ati.

¹²Hichun mihem pan, Nangman kaumpi dinga neipeh numeinu hin thingga chu eipeh-a, kana neh ahitai, ati.

¹³ Chuin Pakai Pathen'in numeinu jah-a, Nangman nabolhi ipi hitam ati. Chuin numeinu chun, gul'in eilhepma, kana neh ahitai, ati.

¹⁴Chuin Pakai Pathen'in gul jah-a chun, Nangman hitobanghi nabol jeh hin, ganchaho jouse chungle, jaova gamsa jouse chungvuma gaosap changa nahitai; Nangman na-oija lam najot ding, chule nahinlai sungse-a leivui naneh ding ahi.

¹⁵ Chule nangma le numei nu kikah-a, chule nachilhah le amanu chilhah kah-a kidouna kakoi ding; chule aman nalu asuh chipma, nangman ama khotaljum nasuhchip ding ahi, ati.

¹⁶Aman numei nu jah-a chun, Keiman nalung gentheina le nanaovopna chu nasatah-a kapunsah ding; nangman nat thoh gim tah-a cha nahin ding; nalung ngaichat chu na inneipu-a ding hiding, chule aman nachunga vai ahomding ahi, ati.

¹⁷Chule aman Adam jah-a, Nangman na inneipi thu nangaija, nangman nanehlou ding ahi, tia kathupeh thingga chu naneh tah jehchun: Nangma jala leiset kigaosapmah ahitai; nangman nahin laisungse-a, gimtah-a na natoh-a aga naneh ding ahi.

¹⁸ Chule nangma-a dinga ling le meithai seltholing ahin kedohsah ding; chule nangman loujaova hampa louhing naneh ding ahi.

¹⁹Nangma leisetna kona kiladoh nahin, leisetna nakilekit kahse-a namaija ulsa soh-a kona anneh naneh ding ahi. Ajehchu nangma leivui nahin, leivuija nakile kitding ahi, ati.

²⁰Chuin Adam'in a-inneipi min chu Eve asahtai; ajeh chu amanu mihing jouse Nu ahi

²¹Chuin Pakai Pathen'in Adam le a-inneipi chu savunin sangkhol asempeh-in, avon pehtan ahi.

²² Chuin Pakai Pathen'in, Vetan, mihem khu eiho lah-a khat bangin ase apha ahetthei tai. Chule tun, ijemtin akhut hinlhang dohhen lang, hing thingga jongkhu hinlou henlang, netaleh, tonsotna hingding ahitai, ati.

²³Hijeh chun akilahdohna leiset chu laibot-a natong dingin, Pakai Pathen'in ama chu Eden hona konin asoldoh tan ahi.

²⁴Chuti chun mipa chu anodoh-in; chule hinthing lampi chu ngahdingin Cherubim le akipei lele meikou chemjam chu Eden hon solama akoitan ahi.