Read Thado Chin Semtilbu 30 Bible Online

Semtilbu 30 - Thado Chin bible

Semtilbu 30

¹Chuin Rachel'in Jacob cha ahinpeh lou chu amuphatnin, Rachel'in a-unu athangset tan ahi. Chuin amanun Jacob henga, Cha neipen, achuti louleh kathi ding ahi, ati.

²Chuin Jacob Rachel chunga alunghan akoujah jengin, ajah-a, Keima nanaobu khahtang-a, Pathen thalhenga uma kahim? ati.

³Chuin amanun, Ven, hikoma hin kasohnu Bilhah aume, amanu henga galut tan, chutia chu keiman jong amanu-a kona chate kaneija, chule amanun kaphei chunga cha ahinding ahi, ati.

⁴Chuin amanun asohnu Bilhah chu a-inneipi dingin apetan, chule Jacob jong amanu henga agalut tan ahi.

⁵Chuin Bilhah'in nao avopmin, Jacob chu chapa khat ahinpeh tai.

⁶Chuin Rachel'in, Pathen'in kathu atantan, chule ka aw jong ajan, chapa khat eipetai, ati. Hijeh chun amanun amin Dan asahtai.

⁷Chuin Rachel sohnu Bilhah'in nao avop kitnin, Jacob chu chapa nina ahinpehtai.

⁸Chuin Rachel'in, Kibotna nasatah-in ka-unu kabon-in, kajoutai, ati. Chuin amin Naphtali asah tai.

⁹Leah'in cha ahintah louding ahet phatnin, asohnu Zilpah chu Jacob henga apuijin, ajidin apetan ahi.

¹⁰Chuin Leah sohnu Zilpah chun Jacob chapa khat ahin peh-in ahi.

¹¹Chuin Leah'in, Kavang phalheh-e, ati. Chuin amanun amin Gad asahtan ahi.

¹²Chuin Leah sohnu Zilpah chun Jacob chu chapa nina ahinpeh-in ahi.

¹³Chuin Leah'in, Keima kakipah lheh jenge, ajehchu numei hon anunnom eitidiu ahitai, ati. Chuin amanun amin Asher asahtai.

¹⁴Chuin suhlou chang at laijin Reuben avah len ahile, hamlah-a joldei-ai ahinmun, anu Leah henga ahin choijin ahi. Chujouvin Rachel'in Leah henga, Katao ahi, nachapa joldei-ai chu neipen, ati.

¹⁵Chuin amanun ahenga, Ka-inneipu neichudoh peh jong hi thil neocha nahisah-a, kachapa joldei-ai kisan jonghi chudoh ding neigot kit ham? ati. Chuin Rachel'in, Hijeh chun nachapa joldei-ai manin aman tujan nangman luppi nan nate, ati.

¹⁶Chuin nilhah lamin, Jacob louva kona ahungphatnin, Leah alamdot dingin apotdoh-in, ahenga, Keima henga nahunglut teiding ahi; ajehchu kachapa joldei-ai ja kalodoh nahitai, ati. Chuin aman chuche jan chun amanu aluppitan ahi.

¹⁷Chuin Pathen'in Leah taona chu asangin, chule amanun nao avopmin, Jacob chu chapa nga channa ahinpeh tai.

¹⁸Chuin Leah'in, Kasohnu chu ka-inneipu kapeh jeh-a, Pathen'in kalo eipeh ahitai, ati. Chuin amin chu Issachar asahtai.

¹⁹Chuin Leah'in nao avop kitnin, Jacob chu chapa gupna ahinpeh tai.

²⁰Chuin Leah'in, Pathen'in keima thilken phatah eipetai; keiman chapa gup kahin peh tah jeh-in, tunvang ka-inneipun eichen khompi tante, ati. Chuin amin Zebulun asahtai.

²¹Chuin khonungin amanun chanu khat ahingin, amin Dinah asahtai.

²²Chuin Pathen'in Rachel ageldoh-in, ataona asanpeh-in, anaobu ahonpeh tai.

²³Chuin amanun nao avopmin, chapa khat ahingtai. Chuin amanun, Pathen'in noise-a kaumna aladohtai, ati.

²⁴Hijeh chun amin Joseph asahtai, chule amanun, Pakaiyin chapa khat eipeh beding ahi, ati.

²⁵Chuin ahitin ahi, Rachel'in Joseph ahin nungin, Jacob'in Laban henga, keima kho mong le kagam lama kache theina din neisol dohtan.

²⁶Nangma kajena kalodoh kajite le kachate neipenlang, neichesah tan. Ajehchu nangma dinga kanatoh ho chu nahenai, ati.

²⁷Chuin Laban'in ahenga, katao ahi, namitmu-a lungsetna kachana ahile, umtadin; ajehchu nangma jal-in Pakaiyin phatthei eiboh-e ti kahe doh-in ahi, ati.

²⁸Chuin aman, Nalo ding chu neisei peh-in, keiman penange, ati.

²⁹Chuin aman ahenga, Nangma iti kajena, chule nagancha te kakoma iti umam, ti nangma tah-in nahet ahi.

³⁰Ajehchu keima hung masanga chu lhomcha bou nanei ahin, tunvang tamtah-in apung taove; chule kahunga patnin Pakaiyin nangma phatthei naboh-in ahi. Ahin tun, itih leba keima insung tum ding kakingaito ding ham? ati.

³¹Chuin aman, Nangma ipi kapeh ding ham? ati. Chuin Jacob in, Nangman imacha neipeh louding ahi. Hichehi neibolpeh dinga ahileh, keiman nagancha hon vah ingting, chingkit nange.

³²Tunin nagancha hon jouse gachonsoh ingting, kengoi lah-a avompol chit chet leh apol phet phut jouse le kelngoinou asan gao jouse, chule kelcha lah-a akang polphet phut le apol chitchet jouse lhengdoh ingting, hichu katohman ding hihen.

³³Chuti chun khonungle katohman chu namai koh-a ahung kilah teng leh, kachon phatnan keima dinga donbutna apehding ahi. Kelcha ho lah-a apol chitchet le apol phetphut lou jouse le kelngoi lah-a asan gao loujouse chu kaguh-a nalah jeng ding ahi, ati.

³⁴Chuin Laban'in, vetan nasei bangchun hihen, ati.

³⁵Chuin chuche nichun aman kelchal akihalpol, apoltan le apol phet phut chule kelnu apolchit chet le apolphet phut jouse le achunga akang umjouse, chule kelngoi asan gao jouse chu alhengdoh in, achapate vettupdin apedoh tai.

³⁶Chuin aman nithum lam gamlan Jacob chu akikhenpin, chule Jacob chun Laban gancha hon dang jouse chu avah-in ahi.

³⁷Chuin Jacob'in navolthing, bulthing, chule thalthing a-eng tenggol hing asatnin, ahoh chu akhoh kangin, tenggol ho-a chun akangchu akido sah-in ahi.

³⁸Chutichun ganchaho chu twichipma ahung tengule agaipa nadiuvin, aman ahoh akho tenggol hochu gancha honnin achipnajiu twi donna ho-a chun, gancha hon twi chipma ahung tengule amasanguva chun akoijin ahi.

³⁹Chuin gancha hon chu tenggol masanga chun nou anei jiuvin, chule ganchaho chun ajinlha-a pol, apoltan, apol chitchet chule apol phetphut ahing jiuvin ahi.

⁴⁰Chule Jacob'in Kelngoinou hochu atumin akhendoh-in, chule gancha hon chu Laban ganchahon ajinglha, apoltan ho le asan gao jouse lamchu angatsah jin ahi. Chule aman ama ganchahon chu atumin akoijin, Laban gancha hontoh akoitha pon ahi.

⁴¹Chuin ahitin ahi, ganchahon lah-a ahatdom hochu agai tengle tenggol ho lah-a agai theina diuvin, Jacob'in tenggol hochu twilonna-a chun ganchaho mitmun akoijin ahi.

⁴²Ahivangin gancha hatmodom ho ding chun hichu akoi jipoi. Chutichun ahatmo ho chu Laban'a ahijin, ahatho chu Jacob'a ahijitai.

⁴³Chuin mipa chu nasatah-in ahung haodoh tan, ganchahon tamtah, soh numei tamtah, soh pasal tamtah, chule sangongsao le sangan tamtah aneitan ahi.