Read Thado Chin Semtilbu 31 Bible Online

Semtilbu 31 - Thado Chin bible

Semtilbu 31

¹Chuin Laban chapaten, Jacob'in i-pau thil jouse akilahdoh tan; chule ipauva kona hiche loupina nasatah hi akimudoh ahi, tia aseiju chu Jacob'in ajatan ahi.

²Chuin Jacob'in Laban maiso chu aven ahile, veuvin, masanga toh abang tapon ahi.

³Chuin Pakaiyin Jacob henga, Napu napate gamle nasopite henga kiletan, chule keiman nangma umpi nange, ati.

⁴Hijeh chun Jacob'in gamlah-a agancha hon umna-a chun Rachel le Leah chu agakou sah-in ahi.

⁵Chuin aman aheng lhona, Napau maiso kaven ahile, masanga bangin kachunga ahoi tapon ahi; ahivangin kapa Pathen chun eiumpi jingnai.

⁶Chule katha neina jouse-a napau kajen chu nahe lhon nai.

⁷Ahivangin napau vin dohan eihabolin, katohman chu somvei jen eina khelpeh-e; ahivangin aman eisuhset ding chu Pathen'in ana phalpoi.

⁸Aman, Apol chit chet ho chu natohman ding ahi atile, ganchahon jouse chun apol chit chet ahing jitauvin; chule aman apoltan ho chu natohman ding ahi atile, ganchaho chun apoltan jeng ahing jitauve.

⁹Chutichun Pathen'in napau ganchaho chu alamangin, hiho chu keima eipetai.

¹⁰Chuin ahung hitin ahi, Ganchaho gai phat laichun, kamangin ka khodah-in ahile, veuvin, ganchahon matna kelngoi chal hochu apoltan, apoltan chit chet chule ajem chom choma pol ngenin kamun ahi.

¹¹Chuin Pathen vantil chun kamangin kahenga, Jacob, atin; chuin keiman, Hikoma kaume, kati.

¹²Chuin aman, Tun nangma khodah inlang ven, ganchahon matna kelngoi chal jouse khu apoltan, apol chit chet chule ajem chom choma polngen ahiuve. Ajehchu Laban'in nachunga abol jouse kamutai.

¹³ Keima hi nangman songphu chunga thao nanu-a, chule ahenga kitepna naneina Bethel Pathen chu kahi. Tun kipatdoh-in, hiche gama konhin nangma potnin lang, nasopite gamlama kiletan, eitin ahi.

¹⁴Chuphatnin Rachel le Leah'in adonbut lhonin, ahenga, Kapao insunga keini chanding ahiloule kagoulo lhon ding ipi umnalai beh-em?

¹⁵Aman keini maljin bangbepma eigelhon hilouham? Ajehchu aman eikijoh honin, chule kasum hon jong anemang sohtai.

¹⁶Ajehchu Pathen'in kapauva kona alahmang gou jouse chu keini le kachateuva ahi. Achuti le tun, Pathen'in nahenga aseichan chu boltan, ati lhone.

¹⁷Chujouvin Jacob akipatnin, achapate le a-inneipi hochu sangongsao chunga atousah-in;

¹⁸Canaan gama apa Isaac henga chedingin agancha jouse, alamdoh anei jouse, chule Padan Aram gama alamdoh agancha neiho chu akitolmang soh keitan ahi.

¹⁹Chuin Laban akelngoiho mulvou dingin achedoh-in; chuin Rachel'in apa milim ho chu agutan ahi.

²⁰Chuin Jacob Syria mi Laban hetlouvin akigodoh-in, aman ajam chu anasei peh pon ahi.

²¹Chuti chun ama aneijouse toh ajam than; chule akipatnin vadung chu agalkaijin, Gilead molsang lama akiheitan ahi.

²²Chuin anithum channin Jacob ajamtai, ti chu Laban aseipeh taovin ahi.

²³Chuin aman asopite akipuijin, amachu ni sagi lama anungdelin: chuin amahon ama chu Gilead molsang chun aphapa taovin ahi.

²⁴Chuin Pathen'in Syria mi Laban henga chun ajan mangin ahungin, ajah-a, Jacob henga ase apha imacha nasei louna din kichih theijin, ati.

²⁵Chuin Laban'in Jacob chu aphapatan ahi. Tun Jacob chun apon in chu chuche molsanga chun asongin; chule Laban le asopite chun Gilead molsanga chun asongun ahi.

²⁶Chuin Laban'in Jacob henga, Ipi bola nahi-a, kahetlouva nakiguh doh-a, kachanute chu chemjam'a gal hinga kiman banga puimanga nahim? ati.

²⁷Iti dana guhthim cha najam manga, keija kona nakiguh doh-a; kipana la, khongcha, chule tumgintheito tho-a kilhahdoh nadinga neihetsah louham?

²⁸Chule katute le kachanu te kachop ding naphal lou ham? Nangman tun ngol hoitah in thil naboltai.

²⁹Nangma suhset thei na dingin tha kaneije; ahivangin napa Pathen chun janhi jan chun kahenga, nangman Jacob henga ase apha nasei lounadin kichih theijin, eitin ahi.

³⁰Chule tun nangman napa in nangai behseh jeh-a chu che tahbeh-a nahitan, ipi dinga ka pathenho chu neiguh peh ham? ati.

³¹Chuin Jacob'in Laban chu adonbutnin, ahengah, Kakichat jeh ahi; ajehchu keiman, Nachanute hi acham louvin keija konin neilah peh getnin nate kati ahi.

³²Na pathen ho namuna penpen chu koi hijongle kihinghoi louding ahi. Kasopiteu mitmu hin nathil kakoma umchu holdoh inlang kilah jengin, ati. Ajehchu Rachel'in chuche ho aguh chu Jacob'in ahetlou ahi.

³³Chuin Laban Jacob pon in'a alutnin, Leah pon in'a, chule asohnu teni pon in'a alutnin; ahin aman hiho chu amupon ahi. Chujouvin ama Leah pon in'a konin apotdoh in, Rachel pon in'a aluttan ahi.

³⁴Tun Rachel'in milim hochu analan, sangongsao pho lah-a chun akoijin, achunga chun atouvin ahi. Chuin Laban'in pon insung jouse chu amailen, ahivangin amupon ahi.

³⁵Chuin amanun apa henga, namasanga kakipatdoh theilou jeh hin, ka Pakaiyin nopmo sahihbeh hen; ajehchu numei hina ngai chu kachunga auma ahi, ati. Chuin aman ahol len, ahin limho chu amujou pon ahi.

³⁶Chuin Jacob alunghangin, Laban chu ahousen; chule Jacob'in adonbutnin, Laban henga, Kasuhkhel ipi ham? Kachonsetna ipi hija, Lungsa tah-a neihin nung del jengham?

³⁷Kathil jouse namaichai soh helin, na insung thil ipi namu em? Eini kahlah thuhi atan theina dingun, hikoma hin kasopite le nasopite anga podoh-in.

³⁸Hiche kum somni jenhi nakoma kaumtan, nakelngoipi hole nakelpi hon anou anei chavai khapouvin, chule nakelngoi hon lah-a achal hojong kanekhapoi.

³⁹Gamsa loitel ho jong nahenga kahinlhut khapon; keima tah-in amang chu kamo poh-in; suna kigumang hihen, jana kigumang hijongle, hichu keima neidit sah-in ahi.

⁴⁰Hiti hin kaumin; sun teng nisatnin, chule janteng dapmin eisugim lheh jengjin, chule ihjong ka-ihmuji pon ahi.

⁴¹Chuti chun kum somni na in'a kahung umin; nachanu teni lonan kum som le kum li nangma kana jenin, chule naganchaho lona-in nangma kumgup kajenin; chuleh nangman katoh man chu somveijen neikhel peh-in ahi.

⁴²Kapa Pathen, Abraham Pathen, chule Isaac gina chu kakoma umlou hile, thonlouva tu-a jong hi khutgoh keova neisol mang teiding ahi. Pathen'in kahesohna le kakhutna katoh gimna chu amua, janhi janna chu napho ahitai, ati.

⁴³Chuin Laban'in adonbutnin, Jacob henga, Hiche chanute hohi keima chanute ahin, hiche chate hi keima chate ahiuvin, hiche gancha ho jonghi keima gancha ho ahiuvin, chule namu jouse hi keima-a ahi. Ahin tuni hin hiche kachanu te chung le, ahinnu achateu chunga hin ipi kabolthei dingham? ati.

⁴⁴Hijeh chun tun hungin, nangma le keiman kitepna khat sem hite; hichu nangma le keima kah-a hettohsahna hihen, ati.

⁴⁵Chuin Jacob'in song khat alan, khommin aphuttan ahi.

⁴⁶Chuin Jacob'in asopite henga, song lhoh khomun, ati. Chuin amahon song alhoh khomun, alhuh-in aseuvin, chule songlhuh chunga chun an aneuvin ahi.

⁴⁷Chuin Laban'in hichu Jegar-Sahadutha asah-in; ahivangin Jacob'in hichu Gilead asah-in ahi.

⁴⁸Chuin Laban'in, Tunikhoa hi hiche kisekhom hohi nangle keima kikah-a hettohsahna ahitai, ati. Hijeh chun hiche min chun Gilead akisahtan;

⁴⁹Chule Mizpah jong akisah-in ahi; ajehchu Laban'in, Eini khat le khat ikikhen tengleh, Pakaiyin nangle kei eivetup jing lhonhen.

⁵⁰Nangman kachanu te hi nasuh genthei ja, ahilouleh kachanu te tailou jidang naneija ahile, koimacha eini koma aumhih nai; ven, Pathen chu nangle kei kah-a ahetoh ahi, atin ahi.

⁵¹Chuin Laban'in Jacob henga, Hiche song kisekhom hi venlang, nangma le keima kah-a hiche song kaphu jong hi ven.

⁵²Suhset nadinga keiman hiche songlhuh le song kiphut khela nangma henglam kahinkhel louding, chuleh nangman jong hiche songlhuh le songkiphut khela keima henglam nahin khellouna dingin, hiche songlhuh hi hettohsah hihen, chule song kiphut hi hettohsah hihen.

⁵³Abraham Pathen, Nahor Pathen, chule apatehou Pathen chun ikah hona thu tanhen, ati. Chuin apa Isaac ginna-a chun Jacob akihah seltan ahi.

⁵⁴Chujouvin Jacob'in molsang chunga chun ganlhaina atoh-in, asopite chu changlhah nedingin akouvin ahi. Chuin amahon changlhah aneuvin, molsang chunga chun ageh khovah taovin ahi.

⁵⁵Chuin jingpi matah-in Laban athouvin, achapate le achanute achopmin, chule phatthei aboh-in ahi. Chuin Laban akipatnin agam lama akiletan ahi.