Read Thado Chin Semtilbu 32 Bible Online

Semtilbu 32 - Thado Chin bible

Semtilbu 32

¹Chuin Jacob achepeh-in ahile, Pathen vantil ten ana kitopiuvin ahi.

²Chuin Jacob'in amaho chu amu phat nin, Hiche hi Pathen ngahmun ahi, ati. Chuin aman chuche munchu Mahanaim asahtai.

³Chuin Jacob'in Edom gamkai sunga Seir gama a-upa Esau henga chun, amasanga sottol ho asolin ahi.

⁴Chuin aman amaho chu thu apen, ahenguva, Hitia hi nanghon ka pakai Esau henga nasei dingu ahi; nasohpa Jacob'in hitin aseije, keima Laban koma kagathamin, chumuna chun tugeihin kaume.

⁵Chule keiman bongchal ho, sangan ho, kelngoi ho, soh pasal ho, chule soh numei ho kaneijin; chule namit mu-a hi lungsetna kamu theina dinga ka pakai hetsah dinga kahinsol ahi, tin gaseijun, ati.

⁶Chuin sottol hochu Jacob henga ahung kileuvin, ajah-a, Na-upa Esau heng kaga phaovin, chujongle ama nangma toh kimuto dingin mi jali toh kilhonin ahunge, atiuve.

⁷Chuphatnin Jacob hatah-in akichan chule alung gimlhehtan ahi. Chuin aman aum khompi miho, kelngoihon, bonghon, chule sangongsao ho chu loinin ahom khenin;

⁸Chule aman, Esau chu loikhat koma ahunga, atha tah-a ahijongle, adalhah loikhat chu hoidoh theijinte, atin ahi.

⁹Chuin Jacob'in, Vo kapa Abraham Pathen, chule Kapa Isaac Pathen, nagam lam le nasopite henglama kiletan, keiman nangma bolpha nange tia kahenga seija Pakai;

¹⁰Nangman nasoh chunga namusah hepina jouse le thutah jouse lah-a hi aneopen changdinga kilom kahipoi; ajehchu hiche Jordan hi ka tenggol sehtoh hung galkai ja kahin, tunvang loini hel kahung hitai.

¹¹Katao ahi, ka-upa khutna kon, Esau khut ngeija konin neihuh-in: ajehchu ajole ama hungintin, nunao chapang ho pumin eihung that get nunte, ti kakichan ahi.

¹² Chule nangman, Tahbeh-in keima nabol phang ting, chule nachilhahte atambehseh jeh-a simjoulou twikhanglen kama neldi jat banga kasem ding nahi, tin naseijin ahi, ati.

¹³Chuin ama chuche jan chun chukoma chun agehtan; chule akhutna um aneiho lah-a konin a-upa Esau thilpeh-a pehding aladoh-in;

¹⁴Kelpi jani le kelchal somni, kelngoipi jani le kelngoichal somni,

¹⁵Anoi kilhoh lai sangongsao somthum le anoute, bongpi somli le bongchal som, sanganpi somni le sangan chal som akhendoh-in ahi.

¹⁶Chuin aman hiche ho chu loitum cheh-in asoh ho khutna apedoh-in, chuin asoh ho henga, Kamasanga ana chepeh unlang, gancha loitum cheh kikah-a chun mun ong umsahcheh-un, ati.

¹⁷Chuin aman amasapen chu thu apen ahenga, ka-upa Esau'in nakimupia, nahenga, Koija nahim, hoija cheding nahim? Chule namasanga um hiche hohi koija ham? tia nadoh tengle;

¹⁸Nangman, Hiche hohi nasoh Jacob'a ahiuvin, ka pakaiyu Esau dinga thilpeh-a ahinthot ahi; chule Ven, amajong kanunguva ahunge, tia nasei dingu ahi, ati.

¹⁹Chuin aman chutobang machun anina, athumna, chule gancha hon loitum juiho henga chun, Esau namu tengule chutobangma cheh-a chu nasei dingu ahi, tin thu apei.

²⁰Chule nanghon chuche chungchon chun, Ven, nasoh Jacob jong kanunguva khun ahunge, nati dingu ahi, tin ahilcheh in ahi. Ajehchu aman, Kamasanga kisol thilpeh hin keiman alung sudamthei khat ning ting, chujouteng le amai mu nange; ijem atile aman eisangkhat nante, atin ahi.

²¹Chuti chun thilpeh ho chu amasanga asol masan; amatah vangchu chuche jan chun mihon lah-a chun agehtan ahi.

²²Chuin chuche jan chun ama athouvin, a-inneipi teni, asoh numei teni, chule achapate somlekhat chu akipuijin, Jabbok vadung agalkai taovin ahi.

²³Chuin aman amaho chu apuijin, vadunga chun asol galkaijin, chule anei chengse jong agalkaisah tai.

²⁴ Chuin Jacob achang seh-in aumtan; chuin mikhatnin amachu khovahlhah masangsen akibotpin ahi.

²⁵Chuin amapa chun Jacob athatlel ding amuphatnin, apheipi gu kisuhtona akhoipeh in ahile, akibotlhon phatnin Jacob pheipigu kisuhtona chu akikhentan ahi.

²⁶Chuin aman, Neichesah tan, ajehchu khovahlha ding ahitai, ati. Chuin aman, Phatthei neiboh louleh lhaponge ati.

²⁷Chuin aman ahenga, Namin ipiham? ati. Hichun aman, Jacob kahi, ati.

²⁸ Chuin aman, Namin Jacob kiti louding, Israel joh nakiti ding ahitai: ajehchu nangma Pathen toh mihem toh nakibonin najoutai, ati.

²⁹Chuin Jacob'in amachu adongin, Katao ahi, namin neisepeh-in, tin angehtan ahi. Chuin aman ipidinga kamin neidoh ham? ati. Chuin chua chun amachu phatthei aboh tan ahi.

³⁰Chuin Jacob'in chuche munchu Peniel asahtai: ajehchu keiman Pathen chu kimaito-in kamun, chule kahinkho hing hoijin aume, ati.

³¹Chuin aman Penuel agalkaijin nisa achunga ahung sohtan, chule ama apheipi jehchun akibaipeh-in ahi.

³²Chuti ahijeh chun tuni geihin Israel chaten pheipi gu kisuhtona thajung achomho, pheipi homa umho chu anengai pouve. Ajehchu aman Jacob pheija thagui chomho chu akhoipeh ahi.