Read Thado Chin Semtilbu 34 Bible Online

Semtilbu 34 - Thado Chin bible

Semtilbu 34

¹Chuin Leah'in Jacob ahinpeh achanu Dinah chu chuche gam chanute ve dingin agapotdoh-in ahi.

²Chuin Hiv mi Hamor chapa Shechem, chuche gam leng chapa chun amanu amuphatnin, apuijin, aluppin, asubohtan ahi.

³Chuin alungthim chu Jacob chanu Dinah chunga chun aumtan, chule aman nungahnu chu angailutan, amanu chu kamdam awnemin ahoupitan ahi.

⁴Chuin Shechem'in apa Hamor akihoupin, Hiche nungah nu khu kajidin neipui peh-in, ati.

⁵Chuin Jacob'in achanu Dinah Shechem'in asuhboh chu ahetai. Tun achapate gamlah-a aganchate toh uma ahiuvin, chule amaho ahung lhunkah seuchun, Jacob'in alung adejingin ahi.

⁶Chuin Shechem pa Hamor chu Jacob toh kihou dingin ahung potdoh-in ahi.

⁷Chuin Jacob chapate chun hichu ajah phatnun, gamlah-a konin ahung lhung taove. Chule aman Jacob chanu aluppia, Israel lah-a ngolhoi tah-a achona, bollou hel ding thil abol jehchun, pasal ho chu alung phamo uvin, alunghang lheh jeng taovin ahi.

⁸Chuin Hamor'in amaho chu akihoupin, Kachapa Shechem lungin nachanu alha ngaitai. Amanu hi ajidingin petaovin, tia katao ahi.

⁹Chule keihotoh kichengto uhitin, nachanu teo keiho neipeuvin lang, chule keiho chanute nangho din kilah uvin.

¹⁰Chule nangho keiho lah-a chenguvin natin, chule gamchu namasanguva umding ahi. Nangho chengunlang, hia chun kiveijun, chule nanghon gou kikholun, ati.

¹¹Chuin Shechem'in numeinu pa le asopite henga chun, Namit muva lungsetna neimusah-un, chule kahenga nasei chanu pengkate.

¹²Man le thilpeh neiha ngeh behseh hih-un, kahenga nasei dungjuijun penge. Ahinla nungah chu jidingin neipeuvin, ati.

¹³Chuin asopinu Dinah chu asuhboh jehchun, Jacob chapate chun Shechem le apa Hamor chu dohan adonbut uvin;

¹⁴Chuin amahon amani henga, Kasopinu cheptan lou khat henga pehdoh ding, hitobang thil hi keihon kabolthei pouve; ijeh inem itile hichu keiho dinga kisuhjum na ahi.

¹⁵Ahin hiche hi nabol ule vang kanop dingu ahi: nalah uva pasal jousen chep atanuva, keiho banga hi naum uva ahile;

¹⁶Chuteng le kachanuteu nangho peuvingting, chule nachanuteu keihon kakipui diu, chuleh nangho toh kachengkhom uva, namkhat ihung hidiu ahi.

¹⁷Ahinla kathuseiju nangailou uva, chep natan lou vangule; kachanu kakipui uva, kache diu ahitai, tin adonbutnuve.

¹⁸Chuin athuseiju chun Hamor le Hamor chapa Shechem chu alung lhaisah lhontan ahi.

¹⁹Chuin Jacob chanu adeijeh-in gollhangpa chun chuche thilbol ding chu ageisang sahpon ahi. Chule amachu apa insung jouse lah-a ja-um pentah hija ahi.

²⁰Chuin Hamor le achapa Shechem chu akhopiu kotpibul lah ahung lhonin, akhopiu miho chutoh akihouvun, ajah uvah,

²¹Khuche miho khu eihotoh kicham tah-in aumuve; hijeh chun hiche gama khun chengu henlang, kiveiju hen; ajehchu veuvin, gam khu amaho dingin alen khopnai; achanuteu ji dingin kipuiju hitin, chule eiho chanute amaho peuhite.

²²Namkhat ihung hina dingule eihoto achenkhomna dinguva, eihon hiche bouhi ibolu ngai ahi: Hichu amaho cheptan banga, eiho lah-a pasal jousen chep atan cheh ding hi ahi.

²³Chutile aganchahou, anei agouhou, chule asa jouseu khu eihoa hisoh keilou ding ham? Athuseiju ngaipou pouvu hite, chutile amaho ilah uva hungcheng taovinte, atilhone.

²⁴Chuin akhopi kotpi phunga hungpotdoh jouse chun Hamor leh achapa Shechem thu ajoptaovin; chuin akhopiu kotpi phunga hunglut jouse pasal tapou achep atanpeh taovin ahi.

²⁵Chuin anithum chanin ahitin ahi, amaho anat laitah-un, Jacob chapate lah-a ni, Dinah sopiteni, Simeon le Levi chun achemjam cheh akilah lhonin, khopi chu hangtah-in anokhum lhonin, pasal jouse athatgam lhontan ahi.

²⁶Chuin amanin Hamor le achapa Shechem chu chemjam hemin athatlhonin, chuin Shechem in'a konin Dinah chu apuidoh lhonin, achemang lhontai.

²⁷Jacob chapate chun thilong chunga chun lam ajotnun, asopinu asuhboh jeh-u chun, akhopiu chu achomun ahi.

²⁸Amahon akelngoi hou, abongchal hou, asangan hou, chule khopi sungle gamlah-a umjouse chu akilah taovin ahi.

²⁹Chule agou jouseu, achasen hou jouse, ajite hou jouse chu sohchangin akaijun, chule insunga um jouse chu achomun ahi.

³⁰Chuin Jacob in Simeon le Levi henga, Nangnin hiche gama cheng Canaan mite leh Perizz mite lah-a hin hotnin neiumsah lhonin, neisugim lheh lhontai; keima lhomcha kahijeh-in, amaho eidoudin hung kikhom khom untin, keima eitha diu; keima le ka-insung mite hi suhmanga kaum dingu ahi, ati.

³¹Chuin amahon, Kasopinu chu aman mijong banga abolding ham? atiuve.