Read Thado Chin Semtilbu 35 Bible Online

Semtilbu 35 - Thado Chin bible

Semtilbu 35

¹ Chuin Pathen'in Jacob henga, Kipat doh-in, Bethel'a chetou vinlang, chua chun gachengin; chule na-upa Esau'a kona najam mang laija nahenga hung kilah Pathen dingin chua chun maicham khat semin, ati.

²Chujouvin Jacob'in a-insung mite le aumpiho jouse henga chun, Nalah uva gamdang Pathen umho chu koidoh-un, kisuthengun, chule navonu kikhelun,

³Chule eiho kipatnu hitin, Bethel'a chetouvu hite; chua chu kahesoh laija eina donbutna, kachena lam chana eiumpi jinga Pathen dingin maicham khat kasem ding ahi, ati.

⁴Chuin amahon akhutnuva um gamdang pathen jouse le abiluva bilba jouse Jacob apetaovin; chuin Jacob'in hiho chu Shechem koma gangpi phung noija chun aselin ahi.

⁵Chuin amaho acheuvin ahile, aveluva um khopi ho jouse chunga chun Pathen'a kona tijatna achutan, chule amahon Jacob chapate chu anungdel tapouvin ahi.

⁶Chutichun Jacob chu ama le aumpi miho jouse chutoh Canaan gama Luz, hichu Bethel ahin, ahunglhung taove.

⁷Chuin aman chukoma chun maicham khat asemin, hichu El-Bethel asahtai. Ajehchu a-upa-a kona ajammang laija chumuna chu Pathen ahenga hung kilah-a ahi.

⁸Ahin Rebekah jennu Deborah athitan, chule amanu chu Bethel mun'a gangpi phung noija chun akivuitan ahi. Chule chuche minchu Allon-bacuth akisah tai.

⁹Chuin Padan-Aram'a kona ahung potdoh chun, Pathen Jacob henga ahung kilah kitnin, amachu phatthei aboh-in ahi.

¹⁰ Chuin Pathen'in ama henga, Namin hi Jacob ahin: namin hi Jacob kiti kit lou ding, amavang namin Israel kiti joding ahitai, ati. Chuin aman amin chu Israel asahtai.

¹¹ Chuin Pathen'in ahenga, Keimahi hat chungnung Pathen kahi, chi tamtah lhah inlang, hapunin pungin; nampikhat chule nam chom chom loijong nanga konin hung doh intin, chule lengho jong nanga kona hung pengdoh dingu ahi.

¹²Chule Abraham le Isaac henga kanapeh gamchu nangma pengting, chule nangma nungsanga nachilhahte jong hiche gamhi kapeh ding ahi, ati.

¹³Chuin akihoulimpi na mun'a chun Pathen ama-a konin akaltou tai.

¹⁴ Chuin akihoulimpi na mun'a chun Jacob'in khompi khat, songkhompi chu aphutnin; hiche chunga chun donding thilpeh alheilhan, chuin aman chuche chunga chun thao asungin ahi.

¹⁵Chuin Jacob'in Pathen'in ahoulim pina mun chu Bethel asah tai.

¹⁶Chuin amaho Bethel'a konin achetauvun, chuin Ephrath lhunna ding chu phabep aum nalaijin ahi. Chuin Rachel naosonat nin anatan, nasatah-in athohgim tan ahi.

¹⁷Chuin ahitin ahi, amanu athohgim behseh phatnin, nao domnu chun ahenga, Kicha hih-in, nangman hiche chapa jonghi naneiding ahi, ati.

¹⁸Chuin ahitin ahi, alha achedoh to lhonin, (ajehchu amanu thia ahitai) amanun amin Ben-oni asah-in ahi. Ahivangin apan Benjamin asah-in ahi.

¹⁹Chuin Rachel athitan, Bethlehem kiti Ephrath jotna lampia chun avuitaovin ahi.

²⁰Chuin Jacob'in alhan chunga chun songkhom aphutnin; hichu tuni geihin Rachel lhansongphu akiti jingin ahi.

²¹Chuin Israel achepeh-in, Edar insang kala chun apon in chu asongin ahi.

²² Chuin ahitin ahi, Israel chuche gama achenlai chun Reuben achen, apa thaikemnu Bilhah chu aga luppitan; chuin Israel'in hichu ahetan ahi. Tun Jacob chapate chu somleni ahiuve.

²³Leah chapate chu, Jacob chapa masapen Reuben, Simeon, Levi, Judah, Issachar chule Zebulun ahiuve.

²⁴Rachel chapate chu, Joseph le Benjamin ahilhone.

²⁵Chule Rachel sohnu Bilhah chapate chu, Dan le Naphtali ahilhone.

²⁶Chule Leah sohnu Zilpah chapate chu, Gad le Asher ahilhone. Hichenghi Jacob chapate Padan-Aram gama pengho chu ahiuve.

²⁷ Chuin Jacob Arba khopi, hichu Hebron ahin, Abraham le Isaac pemna mun Mamre'a chun apa Isaac kom ahunglhun tan ahi.

²⁸Chule Isaac damsung chu kum jakhat le kum somget ahi.

²⁹Chuin Isaac'in alhagao alhan, upatah le teh bongsetnin athitan, amite toh gopkhomin aumtan ahi. Chuin achapa teni Esau le Jacob chun avuilhon tan ahi.