Read Thado Chin Semtilbu 36 Bible Online

Semtilbu 36 - Thado Chin bible

Semtilbu 36

¹Tun hichengho hi Edom kiti, Esau chilhah teho chu ahiuve.

² Esau'in Canaan chanute jin akipuijin, amaho chu: Hit mi Elon chanu Adah, chule Hiv mi Zibeon chanu, Anah chanu Aholibamah,

³ Chule Nebojoth sopinu, Ishmael chanu Bashemath ahiuve.

⁴Chuin Adah'in Esau Eliphaz ahinpeh-in, chule Bashemath'in Reuel ahingin ahi.

⁵Chuin Aholibamah'in Jeush, Jaalam chule Korah ahingin ahi. Hichenghi Esau chapate Canaan gama pengho chu ahiuve.

⁶Chuin Esau'in a-inneipite, achapate, achanute, chule a-insung mite jouse, aganchaho leh agamsa jouse, chule Canaan gama alamdoh aneijouse akitolin, anaopa Jacob'a konin gamchoma achemang tai.

⁷Ajehchu amaho munkhatna achenkhom nadiuvin aneiho chu atambehseh tan, chule agancha hou jehchun apemnao gamchun adol tapouvin ahi.

⁸Chutichun Esau Seir molsanga achengtan ahi. Esau chu Edom ahi.

⁹Chule hichenghi Seir molsang mun'a Edom mite pa Esau chilhahte chu ahiuvin;

¹⁰Hichenghi Esau chapate minho chu ahi; Esau inneipi Adah chapa Eliphaz, Esau inneipi Bashemath chapa Reuel ahilhone.

¹¹Chule Eliphaz chapate chu Teman, Omar, Zepho, Gatam chule Kenaz ahiuve.

¹²Chule Timna chu Esau chapa Eliphaz thaikemnu ahin; amanun Eliphaz dingin Amalek ahinpeh-in ahi. Hichenghi Esau inneipi Adah chapate ahiuve.

¹³Chule hichenghi Reuel chapate ahiuve; Nahath, Zerah, Shammah chule Mizzah ahiuve. Hichenghi Esau inneipi Bashemath chapate ahiuve.

¹⁴Chule hichenghi Zibeon chanu, Anah chanu, Esau inneipi Aholibamah chapate ahiuve. Amanun Esau chu Jeush, Jaalam chule Korah ahinpeh-in ahi.

¹⁵Hichenghi Esau chapate lah-a apipu ho chu ahiuve: Esau chapa masapen Eliphaz chapate chu, pipu Teman, pipu Omar, pipu Zepho, pipu Kenaz,

¹⁶Pipu Korah, pipu Gatam, chule pipu Amalek ahiuve. Hicheng hi Edom gama Eliphaz'a kona pengdoh pipu hochu ahiuvin, hichenghi Adah chapate ahiuve.

¹⁷Hichenghi Esau chapa Reuel chapate ahiuve: Pipu Nahath, pipu Zerah, pipu Shammah, chule pipu Mizzah ahiuve. Hichenghi Edom gama Reuel'a kona pengdoh pipuho chu ahiuvin; hichenghi Esau inneipi Bashemath chapate ahiuve.

¹⁸Chule hicheng hi Esau inneipi Aholibamah chapate chu ahiuve: Pipu Jeush, pipu Jaalam, pipu Korah ahiuve. Hicheng ho hi Anah chanu, Esau inneipi Aholibama'a kona pengdoh pipu hochu ahiuve.

¹⁹Hichenghi Edon kiti Esau chapate ahiuvin, chule hichenghi apipuhou chu ahiuve.

²⁰Hichenghi chuche gama cheng, Hor mi Seir chapate ahiuve: Lotan, Shobal, Zibeon, Anah,

²¹Dishon, Ezer, chule Dishan ahiuve. Hichengho hi Edom gama Seir chapate, Hor mite pipuho chu ahiuve.

²²Chule Lotan chapate chu Hori le Heman ahilhonin; chuleh Lotan sopinu chu Timna ahi.

²³Chule Shobal chapate chu hicheho ahiuve: Alvan, Manahath, Ebal, Shepho, chule Onam ahiuve.

²⁴Chule hichenghi Zibeon chate chu ahiuve; Ajah chule Anah ahilhone. Hiche Anah hi ahi apa Zibeon sanganho gamthipma achinna-a sanganpi ho mudohpa chu.

²⁵Chule Anah chate chu hichenghi ahiuve; Dishon le, Anah chanu Aholibamah ahilhone.

²⁶Chule hichenghi Dishon chate chu ahiuve; Hemdan, Eshban, Ithran, chule Cheran ahiuve.

²⁷Ezer chate chu hichenghi ahiuve; Bilhan, Zaavan, chule Akan ahiuve.

²⁸Dishan chate chu hichenghi ahiuve; Uz le, Aran ahilhone.

²⁹Hicheng hi Hor mite-a kona hungpeng doh pipu hochu ahiuve: Pipu Lotan, pipu Shobal, pipu Zibeon, pipu Anah,

³⁰Pipu Dishon, pipu Ezer, chule pipu Dishan ahiuve. Hichengho hi Seir gama pipu holah-a Hor mite hung dohna pipuho chu ahiuve.

³¹Chule hichengho hi Israel chate chunga koimacha ana lengchan masanga, Edom gama analeng changa lengho chu ahiuve.

³²Beor chapa Bela chu Edom'ah ana leng changin; chule akhopi min chu Dinhabah anahi.

³³Chuin Bela chu athitan, Bozra gama Zerah chapa, Jobab chu akhelin analeng changin ahi.

³⁴Chuin Jobab chu athitan, Temani gama Husham chu amakhelin analeng changin ahi.

³⁵Chuin Husham chu athitan, Moab gamlah-a Midian thatpa Bedad chapa Hadad chu ama khelin aleng changin ahi. Chule akhopi min chu Avith ahi.

³⁶Chuin Hadad chu athitan, Mashrekah mi Samlah chu akhelin analeng change.

³⁷Chuin Samlah athitan, luipi panga Rehoboth kho-a Shaul chu ama khelin analeng changin ahi.

³⁸Chuin Shaul chu athitan, Achbor chapa Baal-hanan chu ama khelin analeng changin ahi.

³⁹Chuin Akchbor chapa Baal-hanan chu athitan, ama khelin Hadar analeng change. Chuleh akhopi min chu Pau ahin; chule a-inneipi chu Matred chanu, Mezahab chanu Mehetabel ahi.

⁴⁰Hichengho hi a-insung dungjuiju, achennao munho dungjuile, aminu dungjuija Esau'a kon hungdoh pipu hochu ahiuve; Pipu Timnah, pipu Alvah, pipu Jetheth,

⁴¹Pipu Aholibamah, pipu Elah, pipu Pinon,

⁴²Pipu Kenaz, pipu Teman, pipu Mibzar,

⁴³Pipu Magdiel, chule pipu Iram ahiuve. Hichengho hi agoulona gama achennao dungjuija Edom pipuho chu ahiuve. Amachu Edom mite pa Esau ahi.