Read Thado Chin Semtilbu 37 Bible Online

Semtilbu 37 - Thado Chin bible

Semtilbu 37

¹Chuin Jacob apa kholjina gam, Canaan gama chun achengtan ahi.

²Hichenghi Jacob achilhah ho chu ahiuve. Joseph chu kum som le kum sagi alhinin, asopite toh ganchahon achingun; chule chapang chu apa inneipi teni Bilhah chapate le Zilpah chapate toh aumin ahi. Chuin Joseph'in agitlounau thuthang chu apa henga alhutjin ahi.

³Tun Israel'in Joseph chu atehnunga ahin achapa ahijeh chun, achapa dang jouse sangin angailun ahi. Chuin aman amachu sangkhol chol jemchom choma pol asempeh-in ahi.

⁴Chuin amachu asopiho jouse sangin apauvin angailujoi ti a-ute chun amuphatnun, amahon amachu aho taovin, kam ngeijin ahouthei tapouvin ahi.

⁵Chuin Joseph'in mang aneijin, hichu asopite henga aseipeh-in ahi. Chuin amahon amachu anahot locheh taovin ahi.

⁶Chuin aman ahenguva, Katao ahi, keiman kamangmat hiche mang hi ngaitemun,

⁷Ajehchu veuvin, eihon louva changphal inakanun, chule veuvin, keima changphal chu ahung kipatdoh-in, adingjang petnin; chuin veuvin, nangho changphal hochu ahung ding kimvelun, keima changphal chu chibai aboh-un ahi, ati.

⁸Chuin a-ute chun ahenga, Nangma kachunguva nalengchan mongding ham? Ahilouleh nangma kachunguva vaihoma napan mongding ham? atiuve. Chuin amahon amachu ahotbecheh jeng taovin ahi.

⁹Chuin aman mang chomkhat amat kitnin, chule hichu a-ute henga ahilin, ajah uvah, Veuvin keiman mang khat kanei kitnin ahi; chule veuvin, nisa, lhathah chule ahsi somlekhat nin chibai eina boh-e, ati.

¹⁰Chuin aman hichu apa leh a-ute aseipehtan ahi. Chuin apan amachu aphoh-in, ajah-a, Namang neihi ipi mang ham? Keima le nanu chule nasopite hi nangma henga tolla bohkhupma chibai boh dinga kahung mong diuham? ati.

¹¹ Chuin a-uten amachu amitthip taovin; ahin apa vangin thu kiseichu aching jingin ahi.

¹²Chuin a-ute chu apao ganchahon vah dingin Shechem'a achetauvin ahi.

¹³Chuin Israel'in Joseph henga, Na-uten gancha hon Shechem'a avah-u hilouham? Hungin, keiman nangma amaho henga solinge, ati. Chuin aman ahenga, Hikoma ka ume, ati.

¹⁴Chuin aman ahenga, Katao ahi, chenlang na-ute ho dam naovem, chule ganchahon jong dam naovem gavenlang, chule kahenga thu hinpo kitnin, ati. Chutichun aman amachu Hebron phaichama konin asolin, chuin ama Shechem aga lhungtai.

¹⁵Chuin mi koiham khatnin amachu amun, chule veuvin, ama gamlah-a avahlen ahi. Chuin mipa chun ahenga, Ipi nahol ham? tin adongin ahi.

¹⁶Chuin aman, ka-ute kahol ahi. Nahenga katao ahi, hoija aganchahon nu avah-um neisei peh-in, ati.

¹⁷Chuin mipa chun, Amaho hia konin achetauve; ajehchu amahon Dothan'a cheohite atiu kajai, ati. Chuin Joseph'in a-ute chu anungdelin, Dothan'a chun agamutan ahi.

¹⁸Chuin amahon amachu gamlatah-a agahmu phatnun, amaho lam ahungnai masangin, amahon ama tha ding thu ana kihousom taove.

¹⁹Chuin khatnin khat henga aseijin, Veuvin, mang neipa chu ahunge.

²⁰Hijeh chun tun hunguvin, amahi thatnu hitin, kokhuh khat touva seplutnu hitin, chule eihon, Gamsa hang khat touvin atha ahitai tiu hite: chule amang chu ipi ahungso ivet dingu ahi, akitiuve.

²¹Chuin Reuben'in hichu ajan, akhut nuva konchun ahuhdoh-in; chule, Eihon amahi that pou hite, atin ahi.

²²Chuin Reuben'in akhutnuva kona chudoh-a, apa henga anungsolpeh theina dingin, ajah uva, Thisan sohih beh-un, amavang gamthip laija hiche kokhuh-a khun galeh lutnuvin lang achunga vang khut lhahih-un ati.

²³Chuin ahitin ahi, Joseph chu a-ute heng ahung lhun phatnin, amahon Joseph'in aki-ah sangkhol chol, ajemchom choma pol chu asutlhah peh-un;

²⁴Chule amahon amachu apuijun, kokhuh sunga alehlut taove. Hiche kokhuh chu akeo ahin, asunga twi umlou ahi.

²⁵Chuin amaho an nedingin atou taovin ahi. Chuin amaho akhodah-un ahile, veuvin, Ishmael honkhat Gilead gama kona asangongsao houtoh thil namtui, thingnailou, chule Myrrh hinpo-a, Egypt gama posuh dinga cheho chu amuvin ahi.

²⁶Chuin Judah'in asopite henga, Eihon inaopao ithaova, athisan isouva ipi phachom ding ham?

²⁷Hungun, Ishmael mite henga johdoh-u hitin, achunga ikhutnu lhapouhite; ajehchu ama inaopao ahin, itahsa mongu ahibouve, ati. Chuin asopiten athu angai taovin ahi.

²⁸ Chuin Midian sumkol veiho chun ahinho pauvin ahile, amahon Joseph chu kokhuh-a konin akaidoh-un, Ishmael miho henga chun dangka somni dingin ajoh taovin ahi. Chuin amahon Joseph chu Egypt gama apuitaove.

²⁹Chuin Reuben kokhuh-a ahung kitnin ahile; veuvin, Joseph chu kokhuh-a ana umtapon; aman apon asattel jengin ahi.

³⁰Chuin ama asopite henga ahung kilen, ahenguva, Chapang chu aumtapoi; keima hi hoilama chetang katem? ati.

³¹Chuin amahon Joseph sangkhol chol chu alauvin, kelcha khat athatnun, athisan lah-a chun sangkhol chol chu adeuvin ahi.

³²Chuin amahon sangkhol chol jemchom choma kisem chu apau athotnun, chule amahon ahenga ahin choijun, ajah-a, Hichehi keihon kamu-u ahi: nachapa sangkhol chol ahi ahilou nahet em? atiuve.

³³Chuin aman hichu ahetan, Hichehi kachapa sangkhol chol ahi; gamsa hangin anehjou hiding hitahi; Joseph hi thonlouva ahal hala asatel hitahi, ati.

³⁴Chuin Jacob'in aponsil ho asat telin, akonga khaodip pon akichenin, nitampi achapa pul adouvin ahi.

³⁵Chuin achapate jouse le achanute jouse ama lhamon dingin akipatnun; ahivangin ama lhamon ding anompon; Ajehchu chu keima lhankhuh-a lunghem puma kachapa henga cheding kahi, ati. Chutichun apa chu ama dingin akap akapmin ahi.

³⁶Chuin Midian mihon amachu Egypt gama Pharoah noija pipu, ngahtup ho lah-a lamkai Potipher henga ajoh taovin ahi.