Read Thado Chin Semtilbu 38 Bible Online

Semtilbu 38 - Thado Chin bible

Semtilbu 38

¹Chuin hiche laichun ahitin ahi, Judah chu asopite lah-a konin achesuh-in, Adulam mikhat amin Hirah chu agabeltan ahi

²Chuin hia chun Judah chun amin Shua kiti Canaan mikhat chanu amutan; chule aman amanu chu akichenpin, ahenga aluttan ahi.

³Chuin amanun nao avopmin, chapa khat ahingin; chule aman amin Er asah-in ahi.

⁴Chuin amanun nao avoppai kitnin, chapa khat ahingin; aman amin Onan asah-in ahi.

⁵Chuin amanun nao avopkitnin, chapa khat ahingin; amin Shelah asah-in ahi. Amanun ama ahinna chun amapa Cherib'a aumin ahi.

⁶Chuin Judah'in achapa masa Er ding chun ji apuipeh-in, amin Tamar ahi.

⁷Chuin Judah cha masapen Er chu Pakai mitmun akhang gilou lheh-in ahile, Pakaiyin amachu athat tan ahi.

⁸Chuin Judah'in Onan henga, Na-upa inneipi henga galutnin lang, amachu kichenpin, chule na-upa dingin chi khaipeh-in, ati.

⁹Chuin Onan'in achikhai chu ama-a ahilouding chu ahen; chuin ahitin ahi, ama a-upa inneipi henga alut phatnin, a-upa dinga chi akhai pehlouna din, tolla alhi lhajin ahi.

¹⁰Chuin athilbol chun Pakai alung lhaitapon; hijeh chun amajong athattan ahi.

¹¹Chujouvin Judah'in amounu Tamar henga, Kachapa Shelah ahung khandoh kahsen, napa in'a meithaijin ana umtan, ati. Ajehchu aman, Ama jonghi a-uteni bangin thiget inte ati ahi. Chuin Tamar achen, apa in'a agachengtan ahi.

¹²Chuin phat chomkhat jouvin Shua chanu Judah inneipi chu athitan ahi; chuin Judah chu lhep lung mongin aumtan, ama le agolpa Adullam mi Hira chu Timnah'a kelngoimul vouho henga agachetou lhonin ahi.

¹³Chuin Tamar henga chun, Ven natehpu akelngoi mul voudingin Timnah'a achetouve, tin aseipeh-un ahi.

¹⁴Chuin aman ameithai vonho ahohlhan, pon lukhuh akikhuh in, akitomchah-in, Timnah jotna lampi mun onglai khatna atouvin ahi; ajehchu Shelah chu kikhan lhitna ahitan, akichenpi dinga apehlou chu amanun ahet ahi.

¹⁵Judah'in amanu chu amuphatnin, amai akhujeh chun noti hinte tin angaiton ahi.

¹⁶Chuin ama lampama amanu henglama chun akiheijin, ajah-a, Katao ahi, hungin, keima nahenga hunglut inge, ati (Ajehchu aman amounu ahilam chu ahetlou ahi.) Chuin amanun, Kahenga nahunglut dinga ahile, ipi neipeh ding ham, ati.

¹⁷Chuin aman, Keiman ganhon lah-a konin kelnou khat hinthot nange, ati. Chuin amanun, Nangman hichu nahinthot masanga, kitepna khat neipeh ding hinam? ati.

¹⁸Chuin aman, Ipi kitepna kapeh ding ham? ati. Chuin amanun, Na mahor, na chao, chule nakhutna um natenggol chu neipen, ati. Chuin aman hichu amanu apen, chule amanu henga aluttan, chule amanun amapa-a konin nao avoptan ahi.

¹⁹Chuin amanu akipatdoh-in, achemangin, aponkhu chu ahohlhan, chule ameithai von chu akivon kittan ahi.

²⁰Chuin Judah chun numeinu khutna kona akitepna thilho ladingin, agolpa Adullam mi khutna chun kelnou khat chu athotnin ahi. Ahinla aman amanu chu amujou tapon ahi.

²¹Chuin aman chuche munna miho chu adongin, Lam pama mun ong laija notinu chu hoija umtam? ati. Chuin amahon, Hiche mun'a noti koima aumpoi, atiuve.

²²Chuin ama Judah henga ahung kilen, ajah-a, Amanu chu kaga mujoupoi; chule chuche mun'a mihon jong, Hiche mun'a koima noti aumpoi, atiuve, tin aseijin ahi.

²³Chuin Judah'in thil chu amanu changden tahen, achuti loule kijumso get hite;ven, hiche kelnou hi kathotnin, amanula nagamu joupoi, ati.

²⁴Chuin ahitin ahi, lha thum jouvin, Judah henga, Namounu Tamar noti'n apangin, chukal valin jong, ven, ajon na-a konin nao avoptai, tin aseipeh-un ahi. Chuin Judah'in, Amanu chu hinpui doh-un, chule kihal lihhen, ati.

²⁵Chuin amanu ahinpuidoh phatnun, Hiche thilho neipa-a kona hi naovopma kahi, tin atehpu henga chun thu agathot tan ahi. Chuin amanun, Katao ahi, hiche mahor, chao, chule tenggol hi koija ham? vechenin, ati.

²⁶Chuin Judah'in chuche thilho chu ama-a ahi chu ahetan, Amanu keisangin achonphajon ahi; ajehchu kachapa Shelah amanu dinga kapehlou jeh ahi, ati. Chuin amanu chu akal akitimatpi kittapon ahi.

²⁷Chuin amanu naosonat phat ahunglhin phatnin ahitin ahi, veuvin, naobu sunga chun apengkop ding ni anaumin ahi.

²⁸Chule ahitin ahi, amanu anaovin ahinheh phatnin, khatnin akhut ahinsoh doh-in ahile, naodom nun, Hichehi ahung sohdoh masajo ahi tin akhut chu alan, pat sandup abupeh-in ahi.

²⁹Chuin ahitin ahi, aman akhut aloilut kit phatnin, veuvin asopipa ahungdohtan ahi. Chuin amanun, Iti nahin phut vang ham? hiche phutkeh nahi nachunga umhen, ati: hijeh chun amin Pharez asah taove.

³⁰Chuin chuche jouchun akhutna pat sandup kibua asopipa chu ahung pengtan ahi. Chuin amin Zarah asah taovin ahi.