Read Thado Chin Semtilbu 39 Bible Online

Semtilbu 39 - Thado Chin bible

Semtilbu 39

¹Chuin Joseph chu Egypt gama apuisuh-un; chule Pharoah noija pipu khat, ngahtup loilah-a lamkai Egypt mi Potipher chun hinpui suh-a Ishmael miho khutna konin achotan ahi.

² Chuin Pakaiyin Joseph chu aumpin, amachu milolhing tah ahung hita; chule apu Egypt mipa in'a chun aumin ahi.

³Chuin Pakaiyin ama aumpia, atoh jouse chu Pakaiyin akhut na alolhinsah chu apupa chun amutai.

⁴Chuin Joseph apu mitmun lungsetna achangtan, amachu ajen letan ahi. Chuin ama insung vetup ding chun akoijin, aneijouse chu akhutna akoitan ahi.

⁵Chuin ahitin ahi, a-insung le anei jouse chunga avetup dinga akoi nikho-a pat chun Pakaiyin Joseph jal-in Egypt mipa insung chu phatthei aboh tan; chule Pakai phatthei bohchu a-insung alouma chule aneijouse chunga chun aumtan ahi.

⁶Chuin aman aneijouse Joseph khutna akoisohtan, chule anehding an tailou ahetding dol thiljong ahetapon ahi. Chule Joseph chu migong hoitah le melhoitah ahi.

⁷Chuin hiche nungchun ahitin ahi, apu inneipi chun Joseph chu deichat mitnin avetan, chule amanun Neiluppin, atin ahi.

⁸Ahivangin ama anompon, apu inneipi henga chun, Vetan kapun hiche insunga hi kakhutna ipipi um ahi ahepon, chule aman aneijouse kakhutna akoi ahitai.

⁹Hiche insunga hi keima sanga lenjo koima aumpon; chujongle nangma a-inneipi nahi jeh-in nangma tailou hiche insunga aman keima khutna apehdoh lou imacha umlou ahi. Chuti ahile keiman hitobang khangitlouna lentah hi iti kabola, Pathen douna-a kachonset thei ding ham? ati.

¹⁰Chuin ahitin ahi, amanun Joseph luppi ding ahiloule aumpi dinga niseh-a aseivangin, aman amanu chu lungna changin angai pehpon ahi.

¹¹Chuin chuche laiphat chun ahitin ahi, Joseph chu insunga kinbol dingin agalutnin ahile, insunga chun koimacha aumpon ahi.

¹²Chuin amanun, Neiluppin, atin amachu aponsilin amanin ahi. Chuin aman aponsil chu amanu khutna chun adalhan, ajamin, insunga kon chun apotdoh tan ahi.

¹³Chuin ahitin ahi, amanun akhutna apon adalhan, insunga konin ajamdoh tai, ti ahet phatnin,

¹⁴Amanun a-insunga miho chu akouvin, ajah uvah, Vetaovin eiho jum sahdin aman Hebrew mikhat ihenguva ahin puilutnin; eiluppi dingin amapa kahenga ahung lutnin, chuin keima hapenin kapeng jah jengin ahi.

¹⁵Chuin ahitin ahi, Aman aw sangtah-a kapenjah jengchu ahet phatnin, aponsil kakoma adalhan ajamin, insunga konin ajamdoh tan ahi, ati.

¹⁶Chuin amanun a-pakaipa in ahunglhun kahsen, aponsil chu akoma akoi jingin ahi.

¹⁷Chuin amanun chuche thu mama chu ahenga aseijin, Ihenguva nahin puilut Hebrew mi sohpa chu eisujum dingin kahenga ahung lutnin ahi.

¹⁸Chuin ahitin ahi, aw sangtah-a kapenjah phatnin, aman aponsil kakoma adalhan, ajamdoh tai, ati.

¹⁹Chuin ahitin ahi, Joseph pakaipa chun a-inneipin ahenga, Nasohpan hitihin eibole, tia aseichu ajah phatnin, alunghan akoujah jengin ahi.

²⁰Chuin a-pakaipa chun Joseph chu akaijin, lengte soh changho kihenna mun songkul'a chun akoitan; chule ama songkul'a chun aumtan ahi.

²¹ Ahivangin Pakaiyin Joseph aumpin, hepina amusah-in, chule songkul ngahpa mitmu-a lungsetna achansahtan ahi.

²²Chuin songkul ngahpa chun songkul'a um sohchangho jouse chu Joseph khutna achinsahtan; chule chumuna kibol jouse chu, Joseph mopohna ahitai.

²³Pakaiyin aumpi jeh le atoh tapou chu Pakaiyin alolhinsah jeh-in, akhut noija thil umpou pou chu songkul ngahpan adonkhoh tapon ahi.