Read Thado Chin Semtilbu 4 Bible Online

Semtilbu 4 - Thado Chin bible

Semtilbu 4

¹Chuin Adam chun a-inneipi Eve chu akitimat pin ahile, amanun nao avopmin, Cain ahingin, chule amanun, Pakaiya konin pasal khat kaneitai, ati.

²Chuin amanun anaopa Abel ahing kitnin ahi. Chuin Abel chu kelngoi vah-in apangin, ahin Cain vang chu loulhou natongin apangin ahi.

³Chuin khonung phasah-in, Cain'in alhosoh alouga chu ahin choijin, Pakai henga atohtan ahi.

⁴ Chuin Abel jong chun akelngoihon asoh masapen lah-a athaopen chu ahin choijin ahi. Chuin Pakai chu Abel le athilto-a chun alung lhaijin ahi.

⁵Ahin Cain le athilto chunga vang alung lhai tapon ahi. Chuphat nin Cain chu alungsa talheh jengin, chule amai athim jengtan ahi.

⁶Chuin Pakaiyin Cain jah-a, Ibola nalungsat ham? Chule ibola namai thima ham?

⁷Nangman phatah-a nabola ahile, nangma sanlouva naum dehding ham? Ahin phatah-a nabol lou vangle, chonsetnin kot bula nachang jinge. Chule angaichat chu nangma-a ding ahin, hijongle nangman ama chunga vai nahom ding ahi, ati.

⁸ Chuin Cain'in anaopa Abel chu akihoulimpin; chuin ahitin ahi, amani gamlah-a aumpet lhonin, Cain chu anaopa Abel chunga achun, athat tai.

⁹Chuin Pakaiyin Cain jah-a, nanaopa Abel hoija umham? ati. Chuin aman, kahepoi; keima kanaopa ching beh kahim? ati.

¹⁰ Chuin aman, Ipi nabol hitam? Nanaopa thisan aw chu leisetna konin kahengah ahung pengdoh-e.

¹¹Chule tun nakhutna kona nanaopa thisan choplutna leisetna kona nangma kigaosap ma nahitai.

¹²Nangman lei nalaija na natoh tengle, nangma-a dinga ahina banga ga ahinsepdoh tahlou ding; nangma leiset chunga jamlele leh vahlele mi nahiding ahi, ati.

¹³Chuin Cain'in Pakai jah-a, Ka talen mat hi kathoh jou kal val ahitai.

¹⁴Vetan, nangman tunin leiset chunga konin neinodoh tan; chule nangma maikoh-a kona selmanga umding kahitai; chule keima leiset chunga ajamlele leh vahle-le kahiding ahitan; chule hung hiti ding ahi, keima eimu mu-a chun eithading ahitai, ati.

¹⁵Chuin Pakaiyin ajah-a, Hijeh chun koihile Cain that chan chu, ajat sagi-a achunga phu kilading ahi, ati. Chuin koiman ama amua atha louna dingin, Pakaiyin Cain chunga chun melchihna akoitan ahi.

¹⁶Chuin Cain Pakai angsunga konin apotdoh-in, Eden solama Nod Gama achengtai.

¹⁷Chuin Cain'in a-inneipi akitimatpin ahile, amanu agaijin Enoch ahingin ahi. Chuin aman khopi khat asemin, achapa min dungjuijin khopi chu Enoch asahtai

¹⁸Chuin Enoch chun Irad ahingin; Irad chun Mehujael ahingin; Mehujael'in Methushael ahingin; chule Methushael'in Lamech ahingin, ahi.

¹⁹Chuin Lamech chun jini akipuijin: khatnu min chu Adah ahin, khat joh nu min chu Zillah ahi.

²⁰Chuin Adah chun Jabal ahingin; ama chu pon in'a chenghole gancha vulteho bulpipa ahi.

²¹Chule anaopa min chu Jubal ahin; amachu saiging le gosem mut teho jouse bulpipa ahi.

²²Chule Zillah'in jong Tubal-Cain ahingin; ama chu sum-eng le thih manchah semho hila pang ahi.Chule Tubal-Cain sopinu chu Naamah ahi.

²³Chuin Lamech chun ajiteni jah-a chun, Adah le Zillah ka-aw ngai lhonin, nangni Lamech inneipi teni, kathusei ngailhonin. Ajehchu mikhat eimavo jeh-in kathatnin, chule gollhang khat eisuhkhah jeh-in kathatnin ahi.

²⁴ Cain chunga ajat sagi-a phu kilading ahile, tahbeh-a Lamech chunga sagi mun somsagi vei kilading ahi, ati.

²⁵Chuin Adam'in a-inneipi chu akitimatpi kitnin ahile, amanun chapa khat ahingin, amin Seth asahtai. Ajehchu amanun, Cain'in atha Abel khel chun, Pathen'in chikhai ding khat eipetai, ati.

²⁶Chuin Seth amatah jong chun chapa khat ahingin, amin Enosh asah tai. Hiche-a pat chun mihem ten Pakai min akoupan taovin ahi.