Read Thado Chin Semtilbu 40 Bible Online

Semtilbu 40 - Thado Chin bible

Semtilbu 40

¹Chuin chucheng thil jouse nungin ahitin ahi, Egypt lengpa jukhon dompa le changlhah sempa chun a-pakaiyu, Egypt lengpa chu alung phatmosah lhontan ahi.

²Chuin Pharoah noija pipu teni, jukhon dom pipu le changlhah sem pipu chunga alunghang tan ahi.

³Chuin aman Joseph kihenna songkul ngah ho lamkaipa in, kihenna mun'a chun amani chu akhumtai.

⁴Chuin ngahtup ho lamkaipa chun amani vetup dingin Joseph chu akoijin, chule aman amani chu ajenletan ahi. Chule kihenna munna chun amani phat chomkhat a-umlhontan ahi.

⁵Chuin songkul'a um Egypt lengpa jukhon dompa le changlhah kangpa mang amat lhonin, anilhona jan khatna aneicheh lhon ahin, chule anilhonin aledohna to amangmat tha cheh lhonin ahi.

⁶Chuin Joseph chu jingkah-in amani henga ahungin, amani chu aven ahile, veuvin amani anguichet jeng lhonin ahi.

⁷Chuin aman a-pakaipa indan khatna aumpi Pharaoh vaipo teni chu adongin, Ibola nangni tunia hi hiti nguichet jeng nahi lhonham? ati.

⁸Chuin amanin ahengah, Keinin mang kamat lhonin, ahinla hichu aledohding koima aumpoi, atilhone. Chuin Joseph'in amani hengah, Aledoh nachu Pathen'a um hilouham? Kahenga neiseipeh lhonin tia katao ahi, ati.

⁹Chuin juhai dom pipu chun amang chu ahilin, ajah-a, Kamangin, veuvin, kamasanga lengpigui khat anaumin;

¹⁰Chule lengpiguija chun abah thum aumin; chule hichu amum hung kisem bangin aumin, apah ho ahung sohdoh-in, chule apahboh hochun lengpiga minho chu ahinsodoh tan ahi.

¹¹Chuin Pharaoh khon chu kakhutna hin anaumin; chule keiman lengpiga chu kanalan, Pharaoh khonsunga kana mehlhan, chuin keiman khon chu Pharaoh khutna kanapen ahi, ati.

¹²Chuin Joseph'in ahenga, Hiche hi aledohna chu ahi: Abah thum hochu nithum ahi.

¹³Nithum sunga Pharaoh'in nangma nalhadoh-a, natoh mun'a napansah kitding ahi. Chule masanga nangma ajukhon doma napan laija banga, Pharaoh khonchu akhutna napeh kitding ahi.

¹⁴Ahin nangma dinga thil aphatsoh phatle keima neihin geldoh inlang, kachunga hin lungsetna neihin musah-in, chule Pharaoh henga kaumchan hinseijin lang, hiche in'a konhin neihung puidoh teijin.

¹⁵Ajehchu tahbeh-a keima hi Hebrew mite gamsunga kona eikigudoh ahin; chule hikom jenga jong hi hiche gimbolna mun'a eikikhum nathei khopma ima katohset umlou ahi, ati.

¹⁶Chuin changlhah sem pipu chun aledohna chu aphalam ahi ti amuphatnin, Joseph henga, Keiman jong mangkhat kana matnin, chule veuvin, changlhah lothum kalu chunga kathopton ahi.

¹⁷Chuin achung nungpen lo-a chun Pharaoh dinga kihon nehthei namkim aumin; chuin kalu chunga lo-a konchun vachaten hichu aneuvin ahi, ati.

¹⁸Chuin Joseph'in adonbutnin, ahenga, Hiche hi aledoh nachu ahi: Lo thum chu nithum ahin;

¹⁹Nithum sunga Pharaoh'in nangma nalhadoh-a thingchunga nakhai ding; chule vachaten nasa anehdiu ahi, ati.

²⁰Chuin nithum chanin ahitin ahi, hichu Pharaoh pen nikho ahin, aman asohte jouse din golvah abolin ahi. Chuin aman jukhon dom pipu le changlhah sem pipu chu asohte lah-a apuidoh tan ahi.

²¹Chuin aman jukhon dom pipu chu ajukhon dopna mun'a apansah kitnin; chuin aman khon chu Pharaoh khutna apekit tan ahi.

²²Ahivangin aman changlhah sem pipu chu Joseph'in aheng lhona aledoh bangchun, akhailih tan ahi.

²³Ahinla jukhon dom pipu chun Joseph ageldoh tapon, amachu asumiltan ahi.