Read Thado Chin Semtilbu 41 Bible Online

Semtilbu 41 - Thado Chin bible

Semtilbu 41

¹Chuin ahitin ahi, kumni kichaina lamin Pharaoh'in mang aneijin; chule veuvin, ama vadung panga ana dingin ahi.

²Chuin veuvin, bongpi sagi hoitah cheh le thaochet cheh vadunga konin ahung doh-un; hampa lah-a chun alhaovin ahi.

³Chuin veuvin, bongpi dang sagi melse tah le gongtah tah vadunga kon mama chun ahungdoh kitnun; vadung pam twi china-a chun bongpi dangho koma adingun ahi.

⁴Chuin bongpi melse tah le gongtah tah ho chun, bongpi hoitah le thaotah tah hochu anejou hel taovin ahi. Chuin Pharaoh ahung khangdoh tan ahi.

⁵Chuin Pharaoh a-ihmulhu kitnin, anivei channa-in mang aneikit: chule veuvin, changkung khat nahin changvui sagi lentah le phatah ahung doh-in ahi.

⁶Chuin chuche jouchun, veuvin, solam huijin asem gopsa changvui geositset sagi ahungdoh-in ahi.

⁷Chuin geositset sagi chun changvui lentah le phatah sagiho chu avallhumtan ahi. Chuin Pharaoh ahung khangin ahile, veuvin, hichu amang anahi.

⁸ Chuin ahitin ahi, jingkah ahung hi phatnin ama alungkham lheh jengtan, chuin aman mi asolin, Egypt gama mitphel doithem jouse le miching jouse akoutan ahi. Chuin Pharaoh'in amaho henga amang chu aseijin; ahivangin Pharaoh henga chun hiche ledohthei koimacha aumtapon ahi.

⁹Chujouvin jukhon dom pipu chun Pharaoh henga, Tunin kathemona khat kagel doh-e:

¹⁰Pharaoh chu asohte ni chunga alung hana, keima le changlhah sem pipu chu ngahtup ho lamkai in'a songkul'a akoi laijin,

¹¹Keima le ama chun jan khat mang kanei gel lhonin; keinin atumcheh-in aledohna um mang kanei gel lhonin ahi.

¹²Chuin chukoma chun ngahtup lama lamkaipa sohpa Hebrew khangdong khat keini toh aumkhomin ahi; chuin amachu kaseipeh lhonin ahile, aman kamanglhon chu aledoh-in; kamanglhon dungjui chun aledohna chu eiseipeh gel lhonin ahi.

¹³Chuin ahitin ahi, aman kaheng lhona aledoh bang chun, chutichun ahung guilhungin; aman keima katoh na mun'a eipansah kitnin, chule amavang chu akhailih tan ahi, ati.

¹⁴Chujouvin Pharaoh'in Joseph koudingin mi asolin, chuin amahon songkul'a konin gangtah-in ahin puidoh-un ahi. Chuin ama akivou ngimin, aponsil akikhelin, Pharaoh henga chun ahunglut tan ahi.

¹⁵Chuin Pharaoh'in Joseph henga, Keiman mangkhat kaneijin, hichu aledohthei ja koimacha aumtapoi. Chule keiman nangma chungchang thu, nangman mang ledohthem theina naneije ti mi seinan kajan ahi, ati.

¹⁶Chuin Joseph'in Pharaoh chu adonbutnin, ahenga, Hichu keima-a uma ahipoi; Pathen joh-in lungmon umtah donbutna chu Pharaoh apehding ahi, ati.

¹⁷Chuin Pharaoh'in Joseph henga, Kamangin, veovin, keima vadung panga kana dingin ahi.

¹⁸Chuin, veovin, bongpi sagi thaotah le hoitahcheh vadunga konin ahungdoh-un; hamhing lah-a chun alhaovin ahi.

¹⁹Chule veovin, bongpi sagi dang phamotah le melsetah chule gongtah tah, chutobang tah-a melse Egypt gam jouse-a jong kanamukhah louhel chu anunguva chun ahungdoh-un ahi.

²⁰Chuin bongpi gongtah le melsetah hochun bongpi sagi thaotah tah masaho chu anejouhel taovin ahi.

²¹Chuin hiho chu anehjouhel vangun, anehjouvu chu hetdoh thei ahidehpoi; ajehchu amaho chu atila bang chun amelse jing jenguvin ahi. Chuti chun keima kahung khangdohtai.

²²Chuin keiman kamangin, veuvin, changkung khatna changvui sagi dimset set le phatah tah ahungdoh kamun ahi.

²³Chuin veuvin, hiho nunga chun changvui sagi asisa le gaositset chule solam huijin asemgopsa ahungsoh kitnin ahi.

²⁴Chuin changvui geositset hochun changvui phatah tah sagiho chu avaljouhel tan ahi. Chule keiman hichu mitphel doithemho henga kaseijin; ahivangin eihilchen thei koimacha aumpon ahi, ati.

²⁵Chuin Joseph'in Pharaoh henga, Pharaoh manghi thakhat ahi, Pathen'in athil hinbol dingho chu Pharaoh henga amusah ahi, ati.

²⁶Bongpi phatah sagiho chu kum sagi ahin; chule changvui pha sagi chu kum sagima ahi. Mang chu thakhat ahi.

²⁷Chule anunga bongpi gongtahle melsetah sagi hungsoh doh hochu kum sagi ahin; chule changvui sagi asikeu, solam huijin asemgopsa chu kum sagi kel lhah ding ahi.

²⁸Keiman Pharaoh henga kaseisa chu hiche thilhi ahi. Pathen'in athil hinbolding chu Pharaoh amusah ahi.

²⁹Veovin, Egypt gam pumpi-a hi kum sagi neh nasatah-a ninglhingsetna hung lhung ding ahi.

³⁰Chule hiche jou chule kum sagi kel lhah hung lhungding; chule Egypt gama neh ning lhinna kum jouse chu suhmila hung umding; chule kel lhah chun gam chu anehchai ding;

³¹Chule kel hung lhunding jeh-a chu ninglhinna chu gamsunga hetphah louhela umding ahi; ajeh chu hichu nasalheh ding ahi.

³²Chule Pharaoh'in mang nivei nanei kopna jehchu hichehi ahi: Pathen'in thilchu asuhdet ahitan; chule hichu Pathen'in chomlouva aguilhunsah ding jeh ahi.

³³Hijeh chun tun Pharaoh'in lungelthem le miching khat holdoh henlang, amachu Egypt gam chunga vaipon tungdoh hen.

³⁴Hijeh chun Pharaoh'in tun hichehi bolhen, chule gamsunga hin vaipoho lhengdoh henlang, amaho chun neh ninglhinna kum sagi sungchun Egypt gama nehsoh hopnga-a hopkhat lakhom uhen.

³⁵Chule amahon ahung lhung ding kum phaho sunga chang jouse chu khom khomu henlang, changho chu Pharaoh khutnoija kholuhen, chule amahon khopiho-a chun chang kholuhen.

³⁶Chule keljeh-a gamhi amanthah louna dinga, Egypt gama hung chuding kelhah kum sagi sunga dinga kigina-a, chang chu hiche gama dinga hi kholkhom ding ahi, ati.

³⁷Chuin hiche thuchu Pharaoh leh asohte mitmun aphalheh jengin ahi.

³⁸Chuin Pharaoh'in asohte henga, Ama tobanga Pathen Lhagao asunga aumna mihem hi imu joumong diu hinam? ati.

³⁹Chuin Pharaoh'in Joseph henga, Pathen'in hicheho jousehi nangma namusah jeh hin, nangma banga lungelthem le miching dang aumpoi.

⁴⁰ Nangma ka-insung chunga vaipo-a napanding, chule nangma thupeh dungjuija kamite hi kivaipo diu ahi; Laltouna chungchanga hibou keima nangma sanga lenjo kahiding ahi, ati.

⁴¹Chuin Pharaoh'in Joseph henga, Ven, keiman nangma Egypt gam jouse chunga vaipo-a katun nahitai, ati.

⁴² Chuin Pharaoh'in akhutna konin khutjem chu aladoh-in, Joseph khutna abupeh-in, chule tupat ponsil hoitah-in ajemin, sana ngong'o angonga a-o peh-in;

⁴³Chule amachu akangtalai nei nilhina-a chun atousah-in; chule amasanga, Dilsuvin, tin asamun ahi. Chutichun aman Egypt gam pumpi chunga vaipon atungtan ahi.

⁴⁴Chuin Pharaoh'in Joseph henga, Keimahi Pharaoh kahin, chule nangma thulouvin Egypt gam pumpi-a hin koimachan akhut hile akeng hileh lamthei ponte, ati.

⁴⁵Chuin Pharaoh'in Joseph min chu Zaphnath-Paaneah asah in; On thempu Potiphera chanu Asenath chu aji dingin apen ahi. Chuin Joseph'in Egypt gam jouse agachonle tan ahi.

⁴⁶Joseph Egypt lengpa Pharaoh angsunga adin chun kum somthum alhingtan ahi. Chuin Joseph Pharaoh henga konin apotnin, Egypt gam pumpi agachonsoh tan ahi.

⁴⁷Chuin kum sagi neh ninglhin sung chun leijin nengtah-in an asosah-in ahi.

⁴⁸Chuin aman Egypt gamsunga kum sagi sungin chang jouse akhom khomin, khopi ho-a chun akholin ahi. Chule akimvela louho-a kona changho chu khopitina chun akhol khomin ahi.

⁴⁹Chuin Joseph'in chang chu twikhanglen'a neldi jat banghela tamin akhomin, simjouhoi ahitahlou jeh in, asimjong abang heltan ahi.

⁵⁰Chuin kel lhah kum ahunglhun masangin Joseph'in chapa ni aneijin, hichu On thempu Potiphera chanu Asenath'in ahinpeh ahi.

⁵¹Chuin Joseph'in apeng masa chu Manasseh asah-in ahi. Ajehchu Pathen'in kahahsatna jouse le kapa insung jouse eisuhmil sahtai, ati.

⁵²Chuin ani lhinna chu amin Ephraim asahtai. Ajehchu Pathen'in kathoh gimna gamahin eipunsahtai, ati.

⁵³Chuin Egypt gama neh lhinna kum sagi chu ahung kichaitai.

⁵⁴ Chule Joseph'in aseibangin kellhah kum sagi chu ahung lhungtan; ahivangin Egypt gam pumpi-a chun neh aumin ahi.

⁵⁵ Chuin Egypt gam jouse-a kel ahunglhah phatnin, miho chu Pharaoh lengpa henga neh thumin ahung tao taovin ahi. Chuin Pharaoh'in Egypt mite jouse henga chun, Joseph koma cheovin, aman naheng uva aseichu bolun, atitai.

⁵⁶Chule kel chu leiset pumpi chunga alhatan ahi. Chuin Joseph'in chang kikhol khomna in jouse chu ahong doh-in, Egypt mite henga chun ajoh in; chule kel chu Egypt gama chun akhohlheh jengin ahi.

⁵⁷Chuin kel chu gam jouse-a alhah nasat behset jeh in, gam jouse-a mihemte Egypt gama Joseph henga chun chang cho dingin ahungun ahi.