Read Thado Chin Semtilbu 42 Bible Online

Semtilbu 42 - Thado Chin bible

Semtilbu 42

¹Tun Jacob'in Egypt gama chang aume, ti amuphat nin, Jacob'in achapate henga, Ipi dinga nakimoh vetto jengu ham? ati.

² Chuin aman, Veuvin, Egypt gama chang aume, ti kajai; thilouva ihindoh theina diuvin chua chun gachesuh unlang, eiho dingin chang gacho taovin, ati.

³Chuin Joseph sopi somho chu Egypt gama chang cho dingin achesuh taove.

⁴Ahin Joseph naopa Benjamin vang chu Jacob'in asopiho chutoh asolthapoi; ajehchu aman, Ijemtin toset khat achunga chukhante, atin ahi.

⁵Chuin Israel chapate chu adang ahungho chutoh lhonin chang cho dingin ahungtaove. Ajehchu Canaan gama chun kel alhatan ahi.

⁶Chule Joseph chu chuche gama chu gamvaipo-a panga ahitan, chule ama chuche gam mijouse henga chu chang joh-a panga ahitai. Chuin Joseph sopite chu ahungun, chule a-angsunga tolla chun aboh khupmun ahi.

⁷Chuin Joseph'in asopite chu amun, chule amaho chu ahen; ahivangin aman amaho chu ahetlou bangin abolin, i-sah loutah-in ahouvin; chuin aman amaho henga, Hoija kona hung nahiuvem? ati. Chuin amahon, Canaan gama kona chang cho dinga hunga kahiuve, atiuvin ahi.

⁸Chule Joseph'in asopite chu ahenan, ahivangin amahon amachu ahepouve.

⁹ Chuin Joseph'in amaho chungchang thua mang anamat chu ageldoh-in, chuin ahenguva, Nangho hi gam velhi nahiuve, gam agohkeova aumhi velhi dinga hung nahiuve, ati.

¹⁰Chuin amahon ahenga, Ahipoi, ka pakai, nasohte hi changcho dinga bou hunga kahi bouvui, atiuve.

¹¹Keiho kabon chaovin mikhat chapate kahiuve; mi kitah kahiuvin, nasohte gamvelhi kahipouve.

¹²Chuin aman amaho henga, Ahipoi, hiche agoh keova aum hi velhi dinga hunga nahiuve, ati.

¹³Chuin amahon, Nasohte hi sopi somleni kahiuvin, Canaan gama mikhat chapate kahiuve; chule vetan, alhumpen chu tupet hin kapau toh aumin, khatvang aumtapoi, atiuve.

¹⁴Chuin Joseph'in ahenguva, Gamvelhi nahiuve, katichu nahiuve.

¹⁵Hichea hi nangho kipatep ding nahiuve: Nasopi pao alhumpen chu hikoma hi ahung louleh, Pharaoh mina kahahsel nahiuve, nangho hikoma kona hi napotdoh loudingu ahi.

¹⁶Nangho-a thutah aum aumlou nathusei uva kona photchet ahina dingin, nalah uva mikhat solunlang nanaopao chu hinpuihen, nangho vang songkul'a naum dingu ahi. Achuti louleh Pharaoh mina kahahsel nahiuve, nangho hi gam velhi nahi mongui, atitai.

¹⁷Chuin aman amaho chu abonchauvin thakhatnin nithum ahentan ahi.

¹⁸Chuin Joseph'in anithum chanin ahenguvah, Hichehi bolun lang hinnan neijun; ajehchu keiman Pathen kaginge, ati.

¹⁹Nangho hi mikitah nahiuleh, na-uchahou lah-a khatpen hitihin songkul'a umden hen: Nangho adangse na-in sunguva kelthohho ding chang kipoh unlang chetaovin.

²⁰Ahin nanao-u alhumpen chu kahenga hinpuijun; hitichun nathusei houchu photchetnin umintin, nangho nathiloudiu ahi, ati. Chuin amahon chutichun aboltauve.

²¹Chuin amaho khatnin khat henga, Tahbeh-in eiho inaopao thudol, aman eiho eingeh tun tun pettah uva alungsung hesoh je kimu khel khela, ingaipeh louvu chu ithemo lheh-ui, Hiche jeh-a chu hiche gentheina hi ichunguva chua ahitai, atiuve.

²² Chuin Reuben'in amaho chu adonbutnin, Chapang chunga chun chonset bolhih-un tia kaseipehsa nahilouvu ham? Ahin nanghon kathusei nangai pouve; hiche jeh-a chu veuvin, athisan phu chu kingeh-a ahitai, ati.

²³Chule akah uva Pao le aum jehchun, Joseph'in amaho thusei ahet chu amahon ahepouve.

²⁴Chuin ama amaho-a konin akihei mangin, akaptai; chuin ama ahenguva ahung kitnin, amaho chutoh akihouvin, chuin Simeon chu ahenguva konin akaijin, chuin amitmuva chun akantai.

²⁵Chujouvin Joseph'in adipmu chu chang sundimpeh dingle asum cheh-u chu adipcheh uva lekhum pehcheh dingin, chule lampi-a aneh dingu an agonpeh dingun thu apetan; chutichun amaho ding chun abolpeh tan ahi.

²⁶Chuin achang houchu asangan hou apohsah-un, akipatdoh taove.

²⁷Chuin alah uva khatnin agenau inna asangan an pedinga adipchu agah honleh, asumchu amutai; ajehchu, veovin, hichu adip kama chun ana umin ahi.

²⁸Chuin aman asopite henga, Kasum ana kilekoi kit tai; Chule veuvin, kadipsung ahin ana ume, ati. Chuin amaho alungling laovun, akicha gamtaovin, Pathen'in ichunguva abolhi ipi ahitadem? akitiuvin ahi.

²⁹Chuin amaho Canaan gama apau Jacob heng ahung lhung taovin, chule achunguva thusoh jouse chu ama chu ahilun; ahenga hitin aseijun ahi,

³⁰Mipa, agam pakaipa chun huham tah-in eina houvun, chuche gam velhi danin einalaovin ahi.

³¹Chuin keihon ahenga, Keiho mikitah tah te kahiuvin; gam velhi kahipouve,

³²Keiho sopi somleni kahiuvin, pakhat hinbou kahiuve; khatpa aumtapoi, alhumpen vang tupetnin Canaan gama kapau toh aume, katiuvin ahi.

³³Chuin chuche mipa, agam pakaipa chun kahenguva, Hichea hin nangho milungdih nahiu chu hethei jinge; nasopiteu lah-a khat kahenga dalhao vin, chule na-in sunguva kelthoh ho dingin chang kipoh unlang chetaovin.

³⁴Chule nanao-u alhumpen chu kahenga hinpuijun: chutengle nangho gam velhi nahipouvin, ahin mikitah tah te nahiuve tichu heng kate. Chuteng nasopi pao lhadohpeh ungting, chule hiche gamahi nakivei dingu ahi, eitiuve, atiuvin ahi.

³⁵Chuin amahon adip mu alheilhah phatnun, ahitin ahi, veuvin, amitakip sum chun chu adip cheh-a ana umtan ahi. Chuin amaho leh apau chun asumchun hou amuphat nun, akicha lheh taovin ahi.

³⁶Chuin apau Jacob chun ahenguva, Nangho hin kachate neichan sah-u ahitai; Joseph aumtapon, Simeon jong aumtapon, chule nanghon Benjamin jong puimang nagouve. Hicheng thil jousehin eilhunkhum ahitai, ati.

³⁷Chuin Reuben'in apa henga, Keiman amachu nakoma kahin puilutkit louleh kachapa teni hi that jengin; amachu kakhutna neipedoh-in, keiman ama chu nahenga hinle puikit nange, ati.

³⁸Chuin aman, Kachapa hi nangho toh kilhona chesuh louhel ding ahi; ajehchu a-upa thia ahitan, ama changsehbou uma ahitai. Nachenao lamdunga achungah toset chutale, kasam kangsa hi lhankhuh-a lunghem puma napuisuh dingu ahi, ati.