Read Thado Chin Semtilbu 43 Bible Online

Semtilbu 43 - Thado Chin bible

Semtilbu 43

¹Chuin hiche gama chun kel alha nasalheh jengtan ahi.

²Chuin ahitin ahi, amahon Egypt gama kona ahinpoh-u chang chu anehjou phatnun, apauvin ahenguva, Chekitnun lang eihodin chang phabep gachouvin ati.

³Chuin Judah'in ahenga, Mipa chun, Nanaopao chu nahin kilhonpi lou uleh kamai namu louhel dingu ahi, tin nasatah-in eigih-un ahi.

⁴Nangman kanaopao hi keihotoh lhondinga nasolding vangle, keiho chesuh ungting, chang gachohpeh unge.

⁵Ahin amachu nasol louding vangleh, keiho chesuh pouvinge. Ajehchu mipa chun kahenguva, Nanaopao chu nahin kilhonpi lou uleh, kamai namu louheldiu ahi, ati ahi, tin aseije.

⁶Chuin Israel'in, Ipidinga naokhat nanei nah laiju thu chu mipa chu nahin seipehkhel kheluva, hitobanga phalou tah-a hi neibolu ham? ati.

⁷Chuin amahon, Mipa chun, napau damna laijam? Sopidang naneijum? tin keiho thudol le insung thudol eidoh doh jeng jeh uva, hiche akam chengho dungjuija chu ama kaseipeh-u ahi. Nanaopao hinpui suh-un, ati ding chu keihon ija kahet diu ham? atiuve.

⁸Chuin Judah'in apa Israel henga, Keiho le nangma, chule chapang sen hohi thilouva ahintheina diuvin chapang chu keimatoh neilhon sah-in.

⁹Keima ama dingin kitung-ing kating, keima khut ngeija amachu ngeh-in: keiman ama nahenga kahin lepui louva, namasanga hi kadinsahkit louva ahileh mona chu kumkhon pojeng ing kate.

¹⁰Ajehchu keiho khongaisot louva hileuveng, tu-a hi nivei kile kitding kahiu ahitai, ati.

¹¹Chuin apau Israel'in ahenguva, Tun hichu hiding mong ahi tah le, hiche hi bolun; nadip uva hichegam thingga phapen phabepho, thingnailou phabep, khoiju phabep, thilnamtui, myrrh, beleilut, chule jonmot posuh unlang, chule mipa chu thilpeh-in peuvin.

¹²Chule nakhut un dangka ajatnia tamin kenbeuvin, chule nadip uva dangka nahinlepoh kitnu jongchu kiken kitnuvin, mukhel jong hithei ahi.

¹³Nanaopao jong chu kipuijun, kipat doh-un lang, chuche mipa henga chun chekit taovin.

¹⁴Chule amapan nasopipa le Benjamin ahinlhadoh kit nadin, imajouse bolthei hat chungnung Pathen'in mipa masanga chun lungsetna napeu hen. Kachate chu kachantah jong leh kachan himaitante, ati.

¹⁵Chuin miho chun thilpeh chu apouvin, dangka jatni apoh beuvin, chule Benjamin jong akipuijun; akipatnun, Egypt gama achesuh-un, Joseph anga chun ading kit taove.

¹⁶Chuin Joseph'in Benjamin chu amaho chutoh amuphatnin, a-insung vetuppa henga, Hiche miho hi in'a puijin, sa thatnin lang, gotsan koijin; ajehchu miho khun sun le keima toh ankong a-umkhom dingu ahi, ati.

¹⁷Chuin mipa chun Joseph thupeh bangchun abolin; miho chu Joseph in'a apuilut tan ahi.

¹⁸Chuin Joseph in'a apuilut jehchun, miho chu akicha taovin; chule amahon iche masah uva idipmuva dangka ana kikoijeh-a chu ichunguva agomkom ahola, ichunguva chua, eiho le isangan hou hi soh-a neiding eigotnuva eipuilutnu ahi, akitiuve.

¹⁹Chuin amahon Joseph insung vetuppa chu ahin naijun, kotkhah bula chun amachu akihoulim piuvin,

²⁰Chule amahon, Vo hepu, kahung masah chungu chun keiho chang choding monga hunga kahiuve.

²¹Chuin ahitin ahi, keiho jinlhun in kalhun phatnun, kadipmuchu kahongun ahile, ka dangka cheh uchu kadipkam cheh uva chun ana umtan, ka dangkao chu agih lhingsetnin ana umtan ahi. Chule keihon hichu kahinpo kitnun ahi.

²²Chule chang choh nading dangka jong kahinpouvin, ahi. Kadip sunguva kadangkau chu kon anakoiham Kahepouve, atiuve.

²³Chuin aman, Lungmong tah-in umun, kicha hih-un; na Pathen'u chule napau Pathen chun nangho dinga nadip uva gou nakoipeh-u ahi; keiman nangho dangka kamunai, ati. Chuin Simeon chu ahenguva ahinpui doh-in ahi.

²⁴Chuin mipa chun amaho chu Joseph in'a apuilutnin, chuin amaho chu twi apen, amahon akengu akisilun; chule aman asangongsao hou jong an apen ahi.

²⁵Chuin amahon chua changlhah anehdiu chu ajataovin, sunna Joseph ahung tengle peh ding chun thilpeh hochu agongtup mun ahi.

²⁶Chuin Joseph in'a ahung phatnin, akhutnuva um thilpeh chu insunga ahin choilutnun, chuin amaho tolla aboh khupmun, ama chu chibai aboh-un ahi.

²⁷Chuin aman amaho umchan chu adongin, Nanghon aumchan naseiju napau tehse chu damnam? amachu hing nalaijam? ati.

²⁸Chuin amahon adonbut un, Nasohpa kapau chu adampet ahin, chule ahing nalainai, atiuve. Chuin amaho akunun, chibai abohkitnun ahi.

²⁹Chuin ama akhodah-in ahile, anaopa Benjamin, anu chapa chu amun; hichun aman, Hiche hi nanao-u alhumpen, aumchan kahenga naseipao chu ham? ati. Chuin aman, Kachapa, Pathen'in nalungset hen, ati.

³⁰Chuin Joseph'in anaopa chu alung ase behseh-in, kikin notah-in kana ding mun aholtan; Chuin ama a-indan sunga alutnin, chua chun agakaptan ahi.

³¹Chuin aman amai akiphetnin, apotdoh kitnin, chuin ama akikham nahnah-in, Ankong semun, ati.

³²Chuin amahon amading atumin, chule amahoding atumin, chule amatoh neh khompi Egypt miho ding chun atumin asemtaove. Ajehchu Egypt miho chun Hebrew miho toh an aneh khom ngailouvu ahi; ajehchu Egypt mite dinga hichu thet umtah ahi.

³³Chuin amaho apeng masapen chu a-upat hina dungjuijin, chule alhumpen chu achapan dungjuijin Joseph anga chun atousah taovin ahi. Chuin amaho chun kidang asalheh jengun ahi.

³⁴Chuin ama-a konchun chanho chu alan ahenguva chun ahomin; ahin Benjamin chan chu amaho khat chan sangin chan nga in atamjon ahi. Chuin amahon adonun, amato akipahkhom taovin ahi.