Read Thado Chin Semtilbu 44 Bible Online

Semtilbu 44 - Thado Chin bible

Semtilbu 44

¹Chuin aman a-insung vetuppa chu thu apen, ajah-a, Amahon ajo chanuva apoh diuvin adip-u khu chang sundim peh-in, chule adangka cheh-u chu adip kamuva koipeh cheh-in.

²Chule kakhon, kadangka khon chu alhumpenpa dipkama achang man dangka chutoh koithan, ati. Chuin aman Joseph'in aseibang chun aboltan ahi.

³Chuin jing kho ahungvah vah-in, miho chu asangan hou toh asoldoh taove.

⁴Chuin amaho khopi-a kona achedoh uva gamlatah agei masangun, Joseph'in neichingpa henga chun, Kipat in lang miho chu delin, chule nangman amaho chu naphah tengle, ahenguva, Ipi dinga phatna chu setna-a nalethuh uham?

⁵Hichea hi ka pakai pan adonji hilou hija, chule tahbeh-a hichehi agaochan naji chu hilouham? Hiche nabolu hi nangho nasuhkhelu ahitai, tin ahenguva gaseijin, ati.

⁶Chuin aman amaho chu adelpha tan, chule hiche thu mama chu ahenguva aseitan ahi.

⁷Chuin amahon ahenga, Ipi dinga ka pakaiyin hitobang thuhi naseiham? Nasohten chutobang aboldiu chu Pathen'in jada jenghen.

⁸Vetan, kadip kamuva kamudoh-u dangka chu Canaan gama konin nahenga kahinlepoh kitnuve; achutile napakai pa in'a kona sana le dangka keihon iti kaguh diu ham?

⁹Nasohte lah-a hin koihile namuna penpen chu, ama chu thijeng hen, chule keiho jeng jong ka pakai soh-in um jenguvinge, atiuve.

¹⁰Chuin aman, Tun nasei bangu chu himaihen: hiche kimuna penpa chu kasoh himai ding ahin; chule adangho vang themo chanda jenghen ati.

¹¹Chujouvin amaho amitakipmin adipmu chu gangtah-in tolla akoilhauvin, amitakip chun adip cheh uchu ahong taovin ahi.

¹²Chuin aman alenpena apanin, alhumpen geijin akholtan ahile, khon chu Benjamin dipma chun amudohtan ahi.

¹³Chutah-in amahon avonhou chu asattelun, chule amitakip chun apotnu asangnu apohsah kitnun, khopi lama akilekit taove.

¹⁴Chuin Judah le asopite chu Joseph'in ahung lhung taove; ajehchu ama chua chu umnalai ahi. Chuin amaho a-angsunga chun tolla abohkhup taove.

¹⁵Chuin Joseph'in amaho henga, Hiche nathilbol uhi ipi nabolnao hitam? Keitobang mihin phun asan theije ti nahet lou uham? ati.

¹⁶Chuin Judah'in ka pakai henga ipi kaseidingu hitam? keihon ipi seitaoving em? Ahilouleh keiho le keihon iti kaki seitheng diu hitam? Pathen'in nasohte khangitlouna hi amudoh ahitai. Vetan, keiho hi ka pakai sohte kahiu ahitai, keiho le khon kimudoh napa jonghi, ati.

¹⁷Chuin aman, chutobanga kaboldiu chu Pathen jahda hihen. Ahin khon akhutna kimudohna pa bouchu kasoh hiding ahin; nangho vang, lungmong tah-in kipat un lang napau henga chetaovin, ati.

¹⁸Chuin Judah'in akom ahin naijin, Vo ka pakai, nahenga katao ahi, nasoh hin ka pakai nahenga thucheng khat seijing ting, chule nalunghanna chu nasoh chunga hinkou dohsah hih-in; ajehchu nangma Pharaoh masap nahi.

¹⁹Ka pakaiyin nasohte henga, Nanghon pa ahiloule nasopiu nanei nalai uvem? tin neina dongun;

²⁰Chuin keihon ka pakai henga, Kapau tehse khat le ateh nunga ahin chapang sopi khat kaneijuve; chule a-upa vang athitan, chule anu chate lah-a amabou uma ahitan, apan amachu angailu lheh-e, kanatiuve.

²¹Chuin nangman nasohte henga, Amachu kamitna kamunadin kahenga hinpui suh-un natin, ahi.

²²Chuin keihon ka pakai henga, Chapang chun apa dalhathei ponte, ajehchu aman apa dalha taleh, apa thijeng ding ahi, kanatiuve.

²³Chuin nangman nasohte henga, Nanao lhumpenu chu nang hotoh lhona ahungsuh louva ahile, nanghon kamai namukit loudiu ahi, nati.

²⁴Chuin nasoh kapau henga kakiletou kitphatnun ahitin ahi, Keihon ka pakai thusei jouse chu kaseipeh-un ahi.

²⁵Chuin kapau vin, Chekitnun lang eihoding chang phabep gachokitnun atin ahi.

²⁶Chuin keihon, Keiho chesuhthei pouvinge, kanaopao alhumpen chutoh neilhonsah dinguleh keiho kachesuh dingu ahi: ajehchu kanaopao alhumpen chutoh kalhon lou uleh, mipa maichu kamu kitthei loudiu ahi, kanatiuve.

²⁷Chuin nasoh kapau chun kahenguva, Ka-inneipin chapa ni eihinpeh nanghon naheuve.

²⁸Chuin khatpa chun eidalhatan, chule keiman thonlouva ahal hala kimaltel hitante, kanatin; chule keiman amachu chuche-a patchun kamutapon ahi.

²⁹Chule nanghon ama jonghi keija konin puidoh unlang, achunga toset chutale, nanghon kasam kangsahi lunghem puma lhankhuh-a napuilut dingu ahi, atin ahi.

³⁰Hijeh chun tun, keima hi nasoh kapau kom kalhunteng, chapang chu keihotoh umtahih leh, ahinkho chu chapangpa hinkho toh kikan khom ahijeh chun,

³¹Hung hitiding ahi, aman chapang chu keihotoh kalhonkhom louvu chu amuteng, thitei ding ahitai. Chule nasohte hin, nasoh kapau sam kangsa chu lunghem puma lhankhuh-a kapuilut dingu ahi.

³²Ajehchu nasoh hi kapau henga chapang dinga hungkitung kahin, ahenga, Nahenga kahin lepuikit louleh, kapa henga kumkhon themona pong kate, kanati ahi.

³³Hijeh chun tun, nahenga katao ahi, chapang khelchun keimahi ka pakai dingin nasoh-in umingting, chule chapanghi asopite toh chetaohen.

³⁴Ajehchu chapang chu kalhonpi louleh, kapa koma iti kakiletou thei ding ham? Ajehchu kapa chunga hung chuding setna chu muget inge, ati.