Read Thado Chin Semtilbu 45 Bible Online

Semtilbu 45 - Thado Chin bible

Semtilbu 45

¹ Chujouvin Joseph akoma dingho angsunga chun ama le ama akikhamtang joutapon; chuin aman, Mijouse kakoma konin potdoh sah-un, tin asamtan ahi. Chuin Joseph ama le ama asopite henga akiphondoh chun, koimacha akoma aumpon ahi.

²Chuin ama hatah-in akaptan; chule Egypt mite le Pharaoh insung mite chun ajauvin ahi.

³Chuin Joseph'in asopite henga, keima Joseph kahi; kapa dam nalai nam? ati. Chuin asopite chun amachu adonbut thei pouvin; ajehchu amasanga chu lungdong gamu ahitai.

⁴Chuin Joseph'in asopite henga, Katao ahi, kakom hinaijun ati. Chuin amahon ahin naijun ahi. Chuin aman keima nanaopao Joseph, Egypt gama najohdoh pao chu kahi.

⁵Hijeh chun tun nanghon hikoma neinajoh jeh-uchun lungkham hih-un, ahilouleh nangho le nangho kilunghan hih un; ajehchu Pathen'in hinkho venbitna aumna dinga nangho masanga einasol ahi.

⁶Ajehchu hiche kumni sunghin hiche gamahin kel alhatai: chule kumnga aum nalaijin, hiche sunga hi lou tuh le chang-at himhim umlou ding ahi.

⁷Chule leichunga hi nachilhah teo hongbit dingle, lhatdohna loupitah-a nahinkhou hoidoh sah dinga Pathen'in nama sang uva einasol ahi.

⁸Hijeh chun tun hikoma einasola chu nangho nahipouvin, Pathen joh ahibouve. Chule aman Pharaoh pa le a-insung jouse pakai ding, chule Egypt gam pumpi-a vaihom dingin eisemtan ahi.

⁹ Kino uvin, kapa koma cheovin lang, ahenga, Nachapa Joseph'in, Pathen'in Egypt gam pumpi-a pakaiyin eitung tai; kahenga hin hungsuh-in, hung geisang hih-in.

¹⁰Chule nangma Goshen gama nachen ding, nangma le nachate, chateho, nakelngoi hon, nabonghon, chule nanei chengse puma keima kom naija naum ding ahi.

¹¹Chule keiman nangma chua chun vah-ing kate; ajehchu kumnga kel lhanalai ding ahi; achuti loule nangma le na-insung mite, chule nanei chengse vaichat na-a chugetnun nate, tin aseije gatiuvin.

¹²Chule, veuvin, keiman kakamtah-a naheng uva kasei ahi ti namit tah-u le kanao Benjamin mittah-in amutai.

¹³Chule Egypt gama kaloupina jouse le nathil mu jouseu hi kapa naseipeh dingu; chule nanghon gangtah-a kapa chu hilama nahin puisuh diu ahi, ati.

¹⁴Chuin aman anau Benjamin chu angong koijin, akaptan; chule Benjamin'in jong angong koijin akaptan ahi.

¹⁵Chuche chung chon chun asopite jouse chu achopmin, akakhumin ahi. Chujou chun asopite chun ama akihou limpi taovin ahi.

¹⁶Chuin Joseph sopite ahunguve, ti thuthang chu Pharaoh'in ajah phatnin, Pharaoh le asohte chu akipah lheh-un ahi.

¹⁷Chuin Pharaoh'in Joseph henga, Nasopite henga hitin seijin, Nanghon hitin bolun: nanghon nasangan houchu chang pohsah unlang, cheovin, Canaan gama kileuvin;

¹⁸Chule napau le na-insung miho hinpui junlang, kahenga hunguvin; keiman nangho Egypt gam phapen chu kapeh uva, chule nanghon chuche gamphapen ga chu naneh dingu ahi.

¹⁹Tun nangma thu kapeh nahin, hichehi bolun: nachasenhou dingle, na-inneipite diuvin, Egypt gama konin kangtalai ho kilah-un, chule napau hinpuijun lang, hunguvin.

²⁰Chujongleh nathilkeo hou gelkhoh hih-un; ajehchu Egypt gam pumpi-a aphapen chu nangho-a ahi, tin aseijin ahi.

²¹Chuin Israel chaten chutichun aboltauvin; chule Pharaoh kamsoh dungjuijin, Joseph'in amaho chu kangtalai ho apen, lampi-a aneh dingu an jong apen ahi.

²²Aman aboncha diuvin kikhelna ding ponsil apesoh keijin; ahin aman Benjamin vang chu dangka jathum le kikhelna ponsil to nga apen ahi.

²³Chuin aman apa henga hiche hohi athotnin ahi; Egypt gam thilphaho sangan som poh dimset le,lamjotna-a apan aneh ding chang, changlhah chule nehding sanganpi poh som dimset athotnin ahi.

²⁴Chutichun aman asopite chu asoltan, chule amaho akipatdoh taove. Chuin aman ahenguva, Lampia nakiboipa louna dingun kichih theijun, ati.

²⁵Chuin amaho Egypt gama konin achetouvun, Canaan gama apau Jacob heng ahung lhung taove,

²⁶Chuin amahon ahenga, Joseph chu ahing nalaijin, chule Egypt gam pumpi-a gamvaipon apange, atiuve. Chuin Jacob lungphut akhongaijin ahi; ajehchu amaho chu atahsan lou ahi.

²⁷Chuin amahon Joseph'in ahenguva aseithu jouse chu aseipeh taovin ahi. Chuin ama akitolna dinga Joseph'in ahinthot kangtalai ho chu amuphatnin, apau Jacob lungthim ahung haldoh kittan ahi.

²⁸Chuin Israel'in, Aphaset tai; kachapa Joseph adam nalaije. Kathi-kah in cheng ting amachu gamunge, ati.