Read Thado Chin Semtilbu 46 Bible Online

Semtilbu 46 - Thado Chin bible

Semtilbu 46

¹Chuin Israel anei chengsetoh akipatnin, Beersheba ahung lhungin, chuin apa Isaac Pathen henga chun kilhaina gantha ho atoh-in ahi.

²Chuin jana mu aneina-a Pathen'in Israel chu ahin houvin, ajah-a, Jacob, Jacob, atin ahi. Chuin aman, hikoma kaume, ati.

³Chuin aman keimahi Pathen, napa Pathen chu kahi; Egypt gama chesuhding kicha hih-in: ajehchu chukoma chu keiman nangma nam lentah-a kasemding nahi.

⁴Keiman nangma Egypt gamah kilhonsuh pingting, chule nangma kahin lepuikit teiding nahi; chule Joseph'in akhut tah-a namit ahin sinsah ding ahi.

⁵Chuin Jacob Beersheba'a konin akipatdoh tai. Chuin Israel chapate chun apau Jacob chu achasen hou, chule a-inneipi teochu Pharaoh'in ama kitol nadinga ahinsol kangtalai ho-a chun atousah taovin ahi.

⁶ Chuin Jacob le achilhahte chun Canaan gama alamdoh-u aganchahou leh athilkeu hou chu akipoh-un, Egypt gam ahung lhung taovin ahi.

⁷Achapate le atupate, Achanute le atunute, chule achilhahte chengse akipuijin, Egypt gam alutpitan ahi.

⁸Chule hicheng hi Egypt gama lut, Israel chate, Jacob le achapate minho chu ahiuve; Reuben, Jacob chapa lenpen ahi.

⁹Chule Reuben chapate chu; Hanoch, Phallu, Hezron, chule Carmi ahiuve.

¹⁰Chule Simeon chapate chu; Jemuel, Jamin, Ohad, Jachin, Johar, chule Canaan numei khat chapa Shaul ahiuve.

¹¹Chule Levi chapate chu; Gershom, Kohath chule Merari ahiuve.

¹²Chule Judah chapate chu; Er, Onan, Shelah, Pharez chule Zerah ahiuvin; ahivangin Er le Onan chu Canaan gama athilhontan ahi. Chule Pharez chapate chu Hezron le Hamul ahilhone.

¹³Chule Issachar chapate chu; Tolla, Phuvah, Job, chule Shimron ahiuve.

¹⁴Chule Zebulun chapate chu; Serad, Elon, chule Jahleel ahiuve.

¹⁵Hichenghi Leah chapate, achanu Dinah toh Padan-Aram gama Jacob ahinpehho chu ahiuve. Achapate le achanute agomin somthum le thum ahiuve.

¹⁶Chule Gad chapate chu; Ziphion chule Haggi, Shuni, Ezphon, Eri, Arodi, chule Areli ahiuve.

¹⁷Chule Asher chapate chu; Jimnah, Ishuah, Ishui, Beriah, chule asopinu Sarah toh ahiuve. Chule Beriah chapateni chu Heber, Malchiel ahilhone.

¹⁸Hichenghi Laban'in achanu Leah dinga apeh Zilpah chapate ahiuvin, hicheng ho hi amanun Jacob ahinpeh ahi; agoma mi somlegup ahiuve.

¹⁹Jacob inneipi Rachel chapate chu; Joseph le Benjamin ahilhone.

²⁰ Chuin Joseph chun Egypt gama achapa Manasseh le Ephraim ahingin, hichu On kho-a thempu, Potiphera chanu Asenath'in ahinpeh ahi.

²¹Chule Benjamin chapate chu; Belah, Becher, Ashbel, Gera, Naaman, Ehi, Rosh, Muppim, Huppim chule Ard ahiuve.

²²Hicheng hi Rachel'in Jacob dinga ahinpeh chapateho chu ahiuvin, abonchauvin mi somleli ahiuve.

²³Chule Dan chapa chu; Hushim ahi.

²⁴Chule Naphtali chapate chu; Jahzeel, Guni, Jezer, chule Shillem ahiuve.

²⁵Hichengho hi Laban'in achanu Rachel dinga apeh Bilhah chapate chu ahiuvin, amanun hicheng hohi Jacob ahinpeh ahi; abonchauvin mi sagi ahiuve.

²⁶Jacob achapate inneipi teho tilouvin, Egypt gama Jacob toh lhonlut, ataiguija kondoh ho chu abonchauva mi somgup le gup ahiuve.

²⁷ Chule Egypt gama penga Joseph chapa chu mini ahilhonin, Egypt gama pemlut insung mite jouse chu somsagi hiuve.

²⁸Chuin Jacob'in Goshen gam lampi chu gahetoh dingin, Judah chu Joseph henga asolmasan; chuin amaho Goshen gam ahung lhung taovin ahi.

²⁹Chuin Joseph'in akangtalai akigotnin, Goshen gama apa Israel kimutopi dingin achetoutan, chuin ama le ama ahenga akiphongin ahi; chuin amachu angong koijin, angongkoi pumin sot thimtah akaptan ahi.

³⁰Chuin Israel'in Joseph henga, Tunvang dama nana umma, namai kamukit tahjeh-in, thi jong leng khoh kasatapoi, ati.

³¹Chuin Joseph'in asopite le apa insung mite ho henga, Keima chetou vingting, Pharaoh kimuping ting, chule ahenga, Canaan gama cheng kasopite le kapa insungmite ho kaheng ahung lhung taove;

³²Chule amaho natoh chu ganchavah ahin, chule kelngoi ching mi ahiuve; chule amahon akelngoihon uleh agancha honnu, chule anei jouseu ahinposoh keijun ahi, tin gasei ing kate.

³³Chule hung hiti ding ahi, Pharaoh'in nangho nakou uva, ipi natong mi nahiuvem? tia ahin dohteng leh,

³⁴Goshen gama nachen theina dinguva, nanghon, Nasohte hi kachapan nuva pat tuni geijahi keiho le kapateho ganchavah mi kahiuve, nati dingu, ahi. Ajehchu kelngoiching tapou chu Egypt mite dinga thet umtah ahi, tin aseije.