Read Thado Chin Semtilbu 47 Bible Online

Semtilbu 47 - Thado Chin bible

Semtilbu 47

¹Chujouvin Joseph chu ahungin Pharaoh henga, Kapa le kasopite ho akelngoi hon nutoh, agancha hon nutoh, chule anei chengseutoh Canaan gama konin ahunguvin; chule, vetan, amaho Goshen gama aumuve, ati.

²Chuin aman asopite lah-a konin mi nga apuijin, Pharaoh henga, aphongdoh-in ahi.

³Chuin Pharaoh'in asopite henga chun, Nangho ipi natong mi nahiuvem? ati. Chuin amahon Pharaoh henga, Nasohte hi, keiho le kapu kapateu jong kelngoi ching mi kahiuve, atiuve.

⁴Hicheng chungchon chun amahon Pharaoh henga, Hiche gama pemdinga hunga kahiuve; ajehchu Canaan gam kel akhoh behset jeh-in, nasohte kelngoihon nehding hampa aumtapoi: hijeh chun tun nasohte hi Goshen Gama neichen sah-un, tia nahenga kataovu ahi, atiuve.

⁵Chuin Pharaoh'in Joseph henga, Napa le nasopite nahenga ahunguvin;

⁶Chule Egypt gam hi namasanga aume; napa le nasopite hi gampha pentah-a chensah in; Goshen gama chun chenguhen. Chule alah uva mi natong theitah nahet le, kagancha ho chunga thuneidin koijin, ati.

⁷Chuin Joseph'in apa Jacob ahin puilutnin, Pharaoh anga adinsah-in ahi. Chuin Jacob'in Pharaoh chu phatthei aboh-in ahi.

⁸Chuin Pharaoh'in Jacob henga, Kum ijat nahitah em? ati.

⁹Chuin Jacob'in Pharaoh henga, Kahinkho kakholjinna nikho hohi kum jakhat le kum somthum ahitai. Kadamsung kumhi lhomcha le hahsatah ahin, kapu kapate hinkho kholjin laisung kum ho jong aphajoupoi, atin ahi.

¹⁰Chuin Jacob'in Pharaoh phatthei aboh-in, Pharaoh angsunga konin achedohtan ahi.

¹¹Chuin Joseph'in apa le asopite chu achensah-in, Pharaoh thupeh dungjuijin Egypt gamsunga, Rameses gam sunga mun phapen chu alodiuvin apetan ahi.

¹²Chuin Joseph'in apa le asopite, chule apa insung mite jouse chu a-inko pumpiuvin changlhah in avahtan ahi.

¹³Chuin gamsung pumpi-a chun nehding him him aumtapoi; ajehchu kelhah chu akhoh behseh jengtan, Egypt gam le Canaan gam pumpi-a chu keljeh chun alhasam lheh tan ahi.

¹⁴Chuin Joseph'in achang chohnao man chun Egypt gam le Canaan gama um sum jouse chu akhomsoh heltan ahi. Chuin Joseph'in sum chu Pharaoh in'a achoi luttan ahi.

¹⁵Chuin Egypt gam le Canaan gama sum jouse chu akiman chaisoh phatnin, Egypt mite jouse chu Joseph henga ahungun, ajah-a, Nehding neipeuvin, ajehchu namitmu-a hi ipidinga kathi jeng dingu ham? ajehchu ka sum jouseu abeisoh heltai, atiuve.

¹⁶Chuin Joseph'in, nasum'u abeitah-a ahile na gancha hou neipeuvin, chule keiman nangho na gancha hou khelin nehding napenao vinge, ati.

¹⁷Chuin amahon agancha hou Joseph henga ahinpuijun: Joseph'in amaho chu sakol ho, kelngoiho, bongho chule sangan ho khel chun nehding apen ahi. Chuche kum chun agancha hou jouse man chun nehding apen avahtan ahi.

¹⁸Chuin chuche kum chu akichai phatnin, ama henga chun akum nina-in ahungun, ajah-a, Ka sum hou iti kaman chaiju ahi ka-pakaiya konin impou vinge; chule kagancha hou jouse jong ka-pakaiya ahitai. Katahsao leh kagam'u tilouvin, ka pakai mitmun imacha khen aumtapoi.

¹⁹Ipidinga namitmu-a keiho le kagam uhi kamantha jeng dingu ham? Nangman nehman dingin keiho le kagam'u hi neicho taovin, chule keiho le kagam uhi Pharaoh soh-in pang taovinge. Keiho thilouva kahin theina dingu le gamhi agohkeova aumlouna dingin muchi neipeuvin, ahungtiuve.

²⁰Chuin Joseph'in Egypt gam pumpi chu Pharaoh dingin achotan ahi; ajehchu achunguva kel khohbeh seh tahjeh chun, Egypt mite jousen aloucheh-u ajohdoh taovin ahi. Chutichun gam chu Pharaoh'a ahisoh tan ahi.

²¹Chule miho vangchu, aman amaho chu Egypt gam ningkhat lama konin ning langkhat na um khopi ho-a chun akichon lutsah tan ahi.

²²Aman thempuho gam chubou achopon ahi; ajehchu thempuho chun Pharaoh'a konin chantum aneijun, chule Pharaoh'in apeh-u chan chu aneh-u ahi. Hijeh chun amahon agamu chu akijoh pouvin ahi.

²³Chujouvin Joseph'in miho henga chun, Veuvin, tunia hi keiman nangho le nagamu hi Pharaoh dinga kachohdoh ahitai. Veovin, hikomahin nangho ding muchi aumin, chule nanghon hichu leija natu dingu ahi.

²⁴Chule chang atphat teng hitiding ahi, hopnga-a hopkhat chu Pharaoh napeh uva, hopnga-a hopli chu nangho nachan diu, hichu louva muchiding, nangho le na-insung miteu nehding le, nachasen hou dinga nehding hiding ahi, ati.

²⁵Chuin amahon, Nangman kahinkhou nahuhhing ahitai; ka pakai mitmun lungsetna neimusah-un, chule keiho Pharaoh soh hitaovinge, atiuvin ahi.

²⁶Chuin Joseph'in, Pharaoh'in hopnga-a hopkhat achandinga dan asem chu Egypt gama dingin tunichan geihin chona danin aumtan ahi. Thempuho gam bouchu Pharaoh'a ahipon ahi.

²⁷Chuin Israel chu Egypt gamsung, Goshen gama chun achengtan; chule hia chun amahon gou akholdoh-un, chi tamtah akhaijun, nasatah-in apung taovin ahi.

²⁸Chuin Jacob Egypt gama chun kum som le kum sagi ahingin ahi. Chuti chun Jacob damsung hinkho chu kum jakhat le kum somli le kum sagi ahi.

²⁹ Chuin Israel thina ding phat ahung naitan ahi. Chuin aman achapa Joseph chu akouvin, ajah-a, Tuahi namitmu-a lungsetna kachana ahile, nahenga katao ahi, nakhut chu kapheipi noija hinkoijin lang, lungset le thutah-in kachunga natongin; katao ahi, Egypt gama hin neihin vuihih-in.

³⁰Ahin kapu kapate toh neilupkhom sah-in; Egypt gama kona hin neipuidoh inlang, akivuinao mun'a chun neivuijin, ati. Chuin aman, Nasei banga kabol ding ahi, ati.

³¹Chuin aman, Kahenga kihahsel in, ati. Chuin ama ahenga akihahseltai. Chuin Israel ajalkhun lulhunna chun akunin ahi.