Read Thado Chin Semtilbu 48 Bible Online

Semtilbu 48 - Thado Chin bible

Semtilbu 48

¹Chuin hicheng jouse nunghin ahitin ahi, Joseph henga, Vetan, napa anai atipeh-un ahi. Chuin aman achapa teni Manasseh le Ephraim akipuijin achetan ahi.

²Chuin Jacob henga, Vetan, nachapa Joseph nahenga ahunge, atipeh-un ahi. Chuin Israel ama le ama akiha bolin, jalkhun chunga chun atouvin ahi.

³ Chuin Jacob'in Joseph henga, Imajouse bolthei Pathen hat chungnung chu Canaan gama Luz mun'a chun kahenga ahung kilah in, phatthei eiboh-in,

⁴Chule kahenga, Vetan, keiman nangma chi tamtah khaisah ingting, kapunsah ding, chule keiman nangma vaipi tamtah kahisah ding; chule hiche gamhi nanunga nachilhahte dinga tonsotna agou dinguva kapeh ding ahi, ati.

⁵Chule tun Egypt gama nahenga kahung masanga Egypt gama nanei, nachapa teni Ephraim le Manasseh hi keija ahilhone. Reuben le Simeon keija ahibanga, amani hi keija hiding ahi.

⁶Amani nunga cha le nao nanei vang chu nangma mi hitantin, amaho chu asopite gou le minlah-a kisimtha nante.

⁷ Chule keima vang, Padan-Aram'a kona kahung chun Rachel chu Canaan gama Ephrath phah nading gamla thim avat nalaijin, lamdunga ka-angsunga athitan ahi. Chuin keiman Ephrath lamdunga chun kavuitan ahi; Hichu Bethlehem chu ahi.

⁸Chuin Israel chun Joseph chapateni chu aven, Amani hi koi hilhon ham? ati.

⁹Chuin Joseph'in apa henga, Amani hi hiche mun'a Pathen'in eipeh kachapa teni ahilhone, ati. Chuin aman nahenga katao ahi, kahenga hinpuijin, chule keiman amani vangboh ingkate, ati.

¹⁰Tun Israel chu atehjeh-in amit athimtan, kho amuthei tapon ahi. Chuin Joseph'in amani chu ahenga ahinpui naijin; chuin aman amani chu achopmin, apomtan ahi.

¹¹Chuin Israel'in Joseph henga, Namel muding kana gelphah lou ahitan; ahin vetan, Pathen'in nachilhah kisan eimusahtai, ati.

¹²Chuin Joseph'in amani chu apa pheichunga konin apuidoh'in, amatah chu tolla aboh khupmin ahi.

¹³Chuin Joseph'in anilhon chun akaijin, Ephraim chu akhut jetlamin Israel khut veilam, chule Manasseh chu akhut veilamin Israel khut jetlama ahin kaijin, ahenga ahinpui naijin ahi.

¹⁴Chuin Israel'in akhut jetlam ahin lhang doh-in, aneojopa Ephraim lu chunga chun angamin ahi, chule akhut veilama chu Manasseh lu chunga angamin, akhut chu henasan ajam pelin ahi; ajehchu Manasseh chu apeng masa ahi.

¹⁵Chuin aman Joseph chu phatthei aboh-in, kapute kapa, Abraham le Isaac namasanga anavale nalhon Pathen, kahinkho lhumkeija, tuni nikho geija eihin ching jinga Pathen,

¹⁶Thil gilou tinchenga kona eina huhdoh jing vantil chun, chapang teni hi phatthei hinboh hen; chule amani chunga hin keima min, kapu kapa Abraham le kapa Isaac min hinpu lhonhen; chujong le amani hi leiset vaipi jalah-a mipi atama tamin hung punglhon hen ati.

¹⁷Chuin Joseph'in apan akhut jetlam Ephraim luchunga angap chu amuphatnin, alung phamotan ahi. Chuin aman apa khut chu Ephraim lu-a kona Manasseh lu-a chon dingin atuh-in ahi.

¹⁸Chuin Joseph'in apa henga, Chutiponte, kapa; ajehchu hiche pahi apeng masa ahin, nakhut jetlam chu alu chunga koijin, ati.

¹⁹Chuin apa chu anom pon, Keiman kahenai, chapa, keiman kahenai; amajong namkhat hunghi ding, chule amajong lending ahinai. Amavang tahbeh-a anaopa johhi ama sanga hunglen joding, achilhahte chu nam tamtah hung hiding ahiuve, ati.

²⁰ Chuin aman chuche nichun amani chu phatthei aboh-in, Nangni min pana Israel'in Phatthei abohding, Pathen'in nangma Ephraim le Manasseh bangin nasem hen, ati dingu ahi, atin; aman Ephraim chu Manasseh masanga akoitan ahi.

²¹Chuin Israel'in Joseph henga, vetan, keima kathiding ahitai. Hijongle Pathen'in nangma naumpi jing ding, chule aman nangma napu napate gamsunga nahin lepui kitding ahi.

²²Chuche chung chon chun Amor mite-a kona kachemjam le kathalpi-a kona kaladoh chu, keiman nangma nasopite chan sangin tamin chan khat kapehben ahi ati.