Read Thado Chin Semtilbu 49 Bible Online

Semtilbu 49 - Thado Chin bible

Semtilbu 49

¹Chuin Jacob'in achapate chu akouvin, ahenguva, Ninunung nile nachung uva ipi hung chuding ham tichu kaseipeh theina dingun, hung kikhom khomun, ati.

²Nangho Jacob chapate, hung kikhom khomun lang ngaijun; napau Israel thusei hi ngai phaovin.

³Reuben nangma kachapa lenpen nahin, kathilbol theina, chule kathahat kipatna, kichoisang na chungnung pen le thahatna chungnung pen chu nahi.

⁴Twisih banga dingdetlou nahin, nangma achung nungpen nahilou ding ahi, ajehchu nangma napa jalkhuna nakaldoh-in, nasuboh-in ahi: ama kalupna-a akaldoh-in ahi.

⁵Simeon le Levi ucha ahilhonin; hunam galvon ho chu amani chena-a aumin ahi.

⁶Vo kalhagao, nangma amani thuguh-a chun hunglut hih-in; vo kaloupina, amani kiloikhomna-a chun lha hih-in. Ijeh inem itile alunghan nalam lhonin mi athat lhonin, chule a-engset nalam lhonin bongchal ho asatbai lhonin ahi.

⁷Alunghana lhon chu kichat umtah ahijeh le, alungsatna lhon chu phaloutah ahijehchun gaosap hihen. Keiman amani Jacob sunga homkhen ningting, Israel lah-a kathecheh ding ahi.

⁸Judah nangma nasopiten avahchoi dingu chu nahi; nakhut chu namelmate ngonga umding; napa chate chu na angsunga kundiu ahi.

⁹ Judah hi keipi bahkai nou ahi; kachapa nasamat na-a konin nakaltou tan ahi. Ama abohmat depmin, keipi bahkai bangle keipi bahkai teh bangin akolin ahi; koiham asuthou dinga?

¹⁰Lal tenggol chu Judah'a konin kichon mang pontin, chule danpe- jong akeng kah-a konin kichon mang ponte, Shiloh ahung masangsen; chule ama henga namtin kikhop khomna umding ahi.

¹¹Asangan lengpi guija ahenin, asangan nou chu lengpigui phatah-a ahenin, aman avonho chu lengpitwija asopmin, chule apon chu lengpitwi thisanin asopmin ahi.

¹²Amit chu lengpitwi sangin asan jon, chule aha chu bongnoi sangin abang jon ahi.

¹³Zebulun chu twikhanglen kama chengding; chule amachu kongho dinga ngahmun hung hiding; chule agamgi chu Sidon toh kijopmat ding ahi.

¹⁴Issachar hi sangan hattah, pohgih tah ni kah-a boh ahi.

¹⁵Chule aman acholngah namun chu aphan, chule gamchu anome, ti amun; hijeh chun aman thilgih pudingin alengkou anemsah-in, hunama natohna mun'a soh ahung hitan ahi.

¹⁶Dan hin Israel phung ho lah-a khat banga amite chu vai ahom ding ahi.

¹⁷Dan hi lampi pama gul, lampi laija gulse, achunga toupa akinung lelhahna khopma sakol nungkeng chua hiding ahi.

¹⁸Vo Pakai, nami huhhingna chu kangah jinge.

¹⁹Gad hi gal mihon ajoding ahin; ahivangin akhon nale aman ale joding ahi.

²⁰Asher'a kona aneh phading ahin, chule aman lengho anneh tuitah tahho aso sah ding ahi.

²¹Naphtali hi sajuhpi kilhaso ahin; aman thupha tah ho aseijin ahi.

²²Joseph hi aga phatah thingbah chu ahin, twikhuh panga aga phatah thingbah ngei chu ahi; abahho chun bang ajamkhup mun ahi.

²³Thalpi kap ho chun ama nasatah-in asugentheijun, akap uvin, chule ahotbolun ahi.

²⁴Ahivangin athalpi chu long louvin athahat jingin, chule akhut banthaho chu imajouse bolthei Jacob Pathen'in ahatsah-in, (Chua kon chun Kelngoi ching, Israel songpi chu hung uma ahi:)

²⁵Nakithopi dinga napa Pathen, chule phatthei naboh ding imajouse bolthei hat chungnung chun, chung van'a kona phattheina ho-a, noilanga thutah-a um phattheina ho, chule ang le naobu phattheina ho-a nahatsah ahi.

²⁶Napa phattheina ho hin kapu kapate phatthei naho chu tonsot lhangho khodong geijin akhupjon ahi. Hiho chu Joseph luchunga umding, chule asopite-a kona kikhendohpa lujanga chu umding ahi.

²⁷Benjamin ngei banga nehpap ahin: jingkah le asamat chu aneh-a, chule nilhah le athilchom chu ahopkhen ding ahi, ati.

²⁸Hicheng jouse hi Israel phung som le phung ni chu ahiuve. Chule hiche hi apauvin amaho phatthei aboh-a, ahenguva aseichu ahin; amatoh kitoh phatthei bohna-a khatcheh-a phatthei aboh ahi.

²⁹Chuin aman amaho chu athulhah-in ahenguva, Kamite toh puikhoma umding kahitai. Hit mi Ephron louva songkoa chun kapu kapate lah-a neivuijun;

³⁰ Hiche songko chu Canaan gama Mamre koma Machpelah louva um ahin, alou muntoh goma Abraham'in Hit mi Ephron'a kona kivuina mun'a neidinga ana choh ahi.

³¹ Chukoma chun amahon Abraham le a-inneipi Sarah chu anavuijun, Isaac le a-inneipi Rebekah jong avuijun; chule chua chun keiman Leah kana vuijin ahi.

³²Aloumun le asunga um songko chu Heth chate ho-a kona ana kichoa ahi, ati.

³³ Chuin Jacob'in achapate chu athupeh jouvin, akeng jalkhuna asep doh in, alhagao alhan, chule amite toh gopkhomin aumtan ahi.