Read Thado Chin Semtilbu 50 Bible Online

Semtilbu 50 - Thado Chin bible

Semtilbu 50

¹Chuin Joseph'in apa mai le amai asuton, akapmin, achopmin ahi.

²Chuin Joseph'in apa long chu monthei louva asemna diuvin asohte louthem ho chu thu apen ahi. Chuin louthem ho chun Israel chu Amon theilou dingin asemtaovin ahi.

³Chuin ama chunga chun nisomli alutnun ahi; ajehchu amon louna dinga kisem miho ding chun ni chujatchu lutji-a ahi. Chuin Egypt mite chun amachu ni somsagi a-opmuvin ahi.

⁴Chuin ama a-opnau nikho ho chu akichai phatnin, Joseph Pharaoh insung mite henga chun, Tu-a hi namit muva lungsetna kachana ahile, lungset tah-in Pharaoh henga hitin neisei peh-un;

⁵ Kapan eikihahsel sah-in, kahenga, Vetan, keima athiding kon kahitan; Canaan gama keiman keimatah dinga kasemsa lhana chu neivuiding ahi, ati. Hijeh chun tun nahenga katao ahi, kapa vuidingin neiche tousah-in, chujouleh hungkit tange, ati, tin neisei peh-un, ati.

⁶Chuin Pharaoh'in, Aman nangma nakihahsel sah bang chun chetouvin lang, napa chu gavuitan, ati.

⁷Chuin Joseph apa vuidingin achetoutan; chule Pharaoh sohte jouse, a-insunga upaho, chule Egypt gamsunga upaho jouse ama toh alhonun,

⁸Chule Joseph insung mite jouse, asopiteho, chule apa insung miho chu amatoh achetou khomun ahi. Achasen hou, akelngoihon hou, chule abonghon ho bou Goshen gama adalhauvin ahi.

⁹Chuin amachu sakol kangtalai ho leh sakol chunga tou mihon akilhon piuvin, chule amaho chu tamtah ahiuve.

¹⁰Chuin amaho Jordan luigala Atad chang chilna pholmun alhung taovin, chule amaho chua chun lhasetah-in akapmun ahi. Chuin aman nisagi sungin apa puldouna abolin ahi.

¹¹Chuin chuche gama cheng Canaan miho chun Atad chang chilna phola thi-opna chu amuphatnun, Hiche hi Egypt mite dinga lunghemna nasatah ahi, atiuvin; hiche jehchun chuche munchu Abel-mizraim asahtaove; hichu Jordan luigala um ahi.

¹²Chuin achapate chun ama thulhah bangtah-in abolpeh taovin ahi.

¹³ Ajehchu achapaten ama chu Canaan gama apolutnun, Abraham'in kivuina dinga Hit mi Ephron koma aloumun toh achohtha, Mamre koma Machpela louva songkoa chun avuitaovin ahi.

¹⁴Chuin Joseph'in apa avuijou chun asopite toh, apa vuidinga akilhonpi chengse toh, Egypt gama akilekit taovin ahi.

¹⁵Chuin Joseph asopite chun apau thichu amuphatnun, Joseph hin ijemtin eivetdao vintin, thil gilouho achunga inabolu chu lethuhding hin ngaito theijinte, akitiuvin ahi.

¹⁶Chuin amahon Joseph henga thupokhat asolun, hitin aseijuve, Napan athi masangin hiche thulhah hi anadalhan ahi;

¹⁷Hitia hi Joseph henga nasei dingu ahi, Nahenga katao ahi, nasopite suhkhelna le achonsetnao ngaidamin; ajehchu amahon nachunga thilgilou anaboltaove, tin aseije. Chule tun nahenga kataovu ahi, Napa Pathen sohteho suhkhelna chu ngaidamtan, atiuvin ahi. Chuin amahon ahenga hichu aseiphatnun Joseph akaptan ahi.

¹⁸Chuin asopite jong chu ahungun, a-angsunga abohkhup jengun; ajah-a, Vetan, keiho hi nasohte kahiuve, atiuve.

¹⁹Chuin Joseph'in ahenguva, Kicha hih-un: ajehchu keima Pathen khela kitung kahi mongem?

²⁰Ahin nangho vangin kachunga hi thilgilou bol nagotnu anahin; ahinla hichu Pathen'in tunikho-a bang ngeija hi mitamtah hinkho huhdoh-a aumna dinga apha dinga anagot ahijoi.

²¹Hijeh chun tun, kicha hih-un; keiman nangho le nachasenhou vahnang kate, ati. Chuin aman amaho chu alhamonin, damheochan ahouvin ahi.

²²Chuin Joseph chu ama le apa inkote toh Egypt gama chun achengun ahi. Chule Joseph chu kum jakhat le kum som ahingin ahi.

²³Chule Joseph chun Ephraim chate akhang thum lhinna tuson thum chan amu manin ahi. Chule Manasseh chapa Machir chateho jong Joseph pheichunga aseilenun ahi.

²⁴Chule Joseph'in asopite henga, Kathiding ahitai; ahin Pathen'in nahungvil tei dingu ahin, hiche gama kona hi napui doh uva, Abraham, Isaac chule Jacob henga ana kihahselna gama chu napui tei dingu ahi.

²⁵ Chuin Joseph'in Israel chate chu akihahsel sah-in, Pathen'in thonlouva nahung vil dingu ahin, chutengle kagu hohi hia konahi napoh tou dingu ahi, ati.

²⁶Hitichun Joseph chu kum jakhat le kum som alhinin athitan ahi. Chuin amahon along chu amonthei louna din asemun, Egypt gamsunga thikong sunga akoitaove.