Read Thado Chin Semtilbu 6 Bible Online

Semtilbu 6 - Thado Chin bible

Semtilbu 6

¹ Chuin ahitin ahi, leiset chunga mihemho ahung pun patnuva, amaho-a dinga chanute ahungpen phatnin,

²Pathen chapate chun mihem chanute amel hoithei lheh-u chu amuvin; chuin amahon adei deiju chu ji dingin akilah taovin ahi.

³Chuin Pakaiyin, Kalhagao a-itih-in mihemte toh boijing ponte, ajeh chu ama tahsa phe ahin; hijongle ahinkho chu kum jakhatle kum somni hiding ahi, ati.

⁴ Chuche nikho laichun leiset chunga mihat ho aumun; chule hiche nung jong chun, Pathen chapate mihem chanute koma ahung tengule, amahon amaho dingchun chate ahinpeh jiuvin; amaho chu gollui laija mihat ho, chule mi minthangho ahiuvin ahi.

⁵ Chuin Pathen'in leiset chunga mihem khan gitlouna anasalheh jenge ti le, tantih neilouva alunggil sunga athil ngaito jouse gitlouna jeng ahi chu amutan ahi.

⁶Chuin hichun Pathen'in leisetna mihem asem chu akisih sahtan; chule lungsung asuna lheh-in ahi.

⁷Chuin Pakaiyin, Keiman leiset chunga konhin kasemsa mihemhi sumanghel tange; mihem ahin, gamsa ahin, akithol tho ganhing ahin, chule vanlaijola leng vacha ahin; ajehchu amaho kanasem hi kakisih tai, ati.

⁸Ahivangin Pakai mitmun Noah chu lunglhaina ana changin ahi.

⁹ Hichehohi Noah khangguiho chu ahi: Noah chu michondih tah le khanga miho lah-a nolnabei ahin, chule Noah Pathen toh analhon len ahi.

¹⁰Chule Noah'in chapa thum, Shem, Ham chule Japheth ahingin ahi.

¹¹Leiset chu Pathen mitmun asedehtan, leiset chu hunamna-in adimset jeng tan ahi.

¹²Chuin Pathen'in leiset chu aven ahile, veuvin, hichu asedeh tan ahi; ajehchu tahsa jousen leiset chunga alampiu asuboh taovin ahi.

¹³Chuin Pathen'in Noah jah-a, Tahsaphe jouse kichaina chu ka-angsung ahung lhung tai; ajehchu amaho jeh-in leiset chunghi hunam adimtan; chule ven, keiman amahohi leiset toh kasuhmang thading ahitai.

¹⁴Nangman Gopher thingin Kong innei khat kisemin, kong sunga chun indanho semin, chule asung apo thingnaijin loijin.

¹⁵Chule hichehi nangman nasem dingdan agong chu ahi: Kong innei chu adung, tong jathum, avai tong somnga chule atun tong somthum hiding ahi.

¹⁶Nangman kong innei ja chu bangkot khat nasem ding, chule hichu achung lama kon tong khatna najoding; chule kong innei kot pi chu apanga nahon ding; chule dan noinung, dan nina, chule dan thumna nasem ding ahi.

¹⁷Chule ven, Keima, keimatah ngeijin vannoi'a hinna hunei tahsaphe jouse sumang dinga leiset chunga twisang kahin letsah ding; chule leisetna um jouse thigam ding ahi.

¹⁸Ahivangin nangma toh kakitepna kaphudoh ding; chule nangma nachapate, na inneipi, chule nachapate inneipite toh Kong'a nalut dingu ahi.

¹⁹Chule tahsaphe-a hing jouse-a kona ganhing namkim lah-a akoptocheh nangma toh hing khom dinga, Kong innei sunga chu anu khat le achal khatcheh nahinpuilut ding ahi.

²⁰Vachate amaho jat dungjuija, ganchaho ama ama jat dungjui cheh-a, chule leisetna vah ganhing ama jat dungjui cheh-a, ajat jouse akopto cheh-a vah hing dinga nahenga hung diu ahi.

²¹Chule nangman nangma dinga nehthei an jouse nalah-a, chule nakoma nakhol khom ding; chule hichu nangma le amaho dinga an hiding ahi, ati.

²² Chutichun Noah'in Pathen'in athu apeh jouse bangtah-in aboltan ahi.