Read Thado Chin Semtilbu 7 Bible Online

Semtilbu 7 - Thado Chin bible

Semtilbu 7

¹Chuin Pakaiyin Noah jah-a, Nangma le na-insung mite nabonchaovin Kong innei sunga hunglut nun; ajehchu hiche khangmite lah-a hin kamitmun nangma michonpha nahi.

²Sa theng jouse lah-a kona anu le achal to-sagi; chule sathenglou jouse lah-a kona anule achal to-ni cheh nangma toh umkhom dinga nalah ding;

³Vanlaijola leng vachate jong leiset chung pumpi-a achilhah-u aumjing nadinga, anu le achal to-sagi nalah ding ahi.

⁴Ni sagi joule keiman leiset chunga nisomli le jan somli go kajuhsah ding; chule keiman kasemsa ahingthei jouse leisetna kona kasuhmang ding ahi, ati.

⁵Chuin Noah'in Pakaiyin thu apeh jouse bangtah chun aboltan ahi.

⁶Chule leiset chunga twisanglet chun Noah kum jagup alhingtan ahi.

⁷ Chuin Noah chu achapate toh, a-inneipi toh, chule achapate inneipiho toh twisang letding jeh chun kong innei sunga alut taovin ahi.

⁸Satheng lah-a kon, sathenglou lah-a kon, vachate lah-a kon, chule leiset na akitholtho ganhing jouse lah-a konin,

⁹Pathen'in Noah koma athupeh bangtah chun, anu le achal akopto cheh-in Noah koma kong innei sunga chun alut taovin ahi.

¹⁰Chuin ahitin ahi, ni sagi jouchun leiset chunga chun twi chu ahung lentan ahi.

¹¹ Noah hinkho kum jagup alhinna, alhani channa, nisom le nisagi ni, chuche nitah chun twipi thuhtah nah ho jouse-a ajaltan, chule van bangkot ho akihongtan ahi.

¹²Chule vannoi leiset chunga chun nisomli le jan somli go aju tan ahi.

¹³Chuche nitah chun Noah le Noah chapate Shem, Ham chule Japheth, chule Noah inneipi le achapate inneipi thum chu kong innei sunga chun alut taove.

¹⁴Amaho, chule gamsa jouse ama ama jat dungjui cheh-in, gancha jouse ama ama jat dungjui cheh-in, leiset na a-opma kitholtho ganhing jouse ama ama jat dungjui cheh, chule vacha namkim ama ama jat dung jui cheh-in alutsoh keijun ahi.

¹⁵Chuin hinnahu nei tahsaphe chengse chu akopto cheh-in, Noah henga kong innei sunga chun alut taove.

¹⁶Chuin Pathen'in ama thu apeh bangtah-in, alut chasun chu tahsaphe pojouse anu le apa akopcheh-in alutnun ahi. Chuin Pakaiyin kot chu akhah tan ahi.

¹⁷Chuin leiset chunga chun nisomli twisang alenin; chuin twi akhang cheh cheh-in, kong innei chu aletdoh-in, chule tolla konin akikhang doh tan ahi.

¹⁸Chule twi chu akhangin, chule leiset chunga chun hatah-in akhang tan; chuin kong innei chu twi chungah akitol len ahi.

¹⁹Chule leiset chunga twi chu nasatah-in akhang jengtan; chuin van noija lhangsang ho jouse chu achuptan ahi.

²⁰Mol jouse chupmin, tong som le tong nga geijin twi chu akikhang tan ahi.

²¹Hichun leiset chunga vahle tahsaphe po jouse, vachate jong, ganchaho jong, gamsa hojong, tolla a-opma kithol ganhing hojong, mihem jouse jong athigam heltan ahi.

²²Anah hom sunga hinna hunei, tolgoa umjouse athigam tan ahi.

²³Hitichun leiset na cheng ahingthei jouse, mihem, gancha, a-opma kithol jouse, chule vanlaijola vachate abonchan leisetna konin akisumang tan ahi. Noah le kong innei sunga umho bouchu ahingin aumun ahi.

²⁴Chuti chun ni jakhat le nisomnga geijin, leiset chunga twi avei denin ahi.