Read Thado Chin Semtilbu 8 Bible Online

Semtilbu 8 - Thado Chin bible

Semtilbu 8

¹Chuin Pathen'in Noah le Kong innei sunga aumpi hinna nei ganhing chengse le ganchaho abonchan ageldoh-in ahi. Hichun Pathen'in vannoi leiset na hui anunsah in ahile, twi chu akemsuh tan ahi.

²Twipi thuhtah nah-ho leh van bangkot hochu akikhahtan, chule van'a kona go hungju chu atang tan ahi.

³Chuin twiho chu leisetna konin tanglouvin akemsuh-in: chule ni jakhat le nisomnga jouvin twi chu akang tan ahi.

⁴Chuin lhasagi channa, nisom le nisagi nin kong innei chu Ararat molchunga chun akingatan ahi.

⁵Chuin lhasom channa geijin twi chu tanglouvin akemsuh suh-in; lhasom channa nimasa ni chun molvum chu akimutan ahi.

⁶Chuin ahitin ahi, nisomli jouvin Noah'in asem kong innei bangkot chu ahongin;

⁷Chule va-ah khat alendoh sah-in ahile, leiset na kona twi chu akan kahsen alengle len ahi.

⁸Chuin leiset na twi chu kangtam ti hetna dingin ama-a konin vakhu khat alendoh sah kitnin ahi.

⁹Ahivangin leiset pumpi chunga twi aum nahlai jeh-in, vakhu chun akenga chuh-a kingah na ding mun amujoupon, ama heng lam Kong inneija chun ahung kile kittan ahi. Chuin aman akhut alhangdoh in vakhu chu Kong innei sunga chun alalut tai.

¹⁰Chuin ama ni sagi akhongai kitnin; chuin vakhu chu kong innei sunga konin alhadoh kitnin ahi.

¹¹Chuin nilhah lamin vakhu chu ahenga ahung kile kitnin; chule veuvin, amuh-a Olive na kiloulha thah aumin ahi. Hichun Noah'in leiset na konin twi akangtai ti ahetan ahi.

¹²Chuin ni sagima akhongai be kitnin; chuin vakhu chu alendohsah kitnin ahile, ahengah ahung kilekit tapon ahi.

¹³Chuin ahitin ahi, kum jagup le kum khat na, lhamasa, chule ni masapen nichun leiset na konin twi chu akangtan ahi. Chuin Noah'in akong innei khuna chu ahohlhan, aven ahile, veuvin, leiset chunga twi chu akang tan ahi.

¹⁴Chuin alhani channa, nisomni le ni sagi ni chun tol chu agotan ahi.

¹⁵Chuin Pathen'in Noah jah-a hitin thu aseije,

¹⁶Kong innei sunga konin nangma, na inneipi, nachapate, chule nachapate inneipi te toh potdoh taovin.

¹⁷Naumpi hinna nei jouse, ganhing namkim, vacha ho, gancha ho, chule tolla vah jouse chu leiset chunga chilhah tamtah neiding, hinpha ding, chule pungjal dingin kong'a konin hinpuidoh tan, ati.

¹⁸Hichun Noah chu achapate, a-inneipi, chule achapate inneipite toh apotdoh taovin ahi.

¹⁹Gamsa jouse, a-opma kithol ganhing jouse, vachate jouse, chule leiset na akithol jouse chu, ama ama jat dung jui cheh-in kong innei ja konin apotdoh taove.

²⁰Chuin Noah'in Pakaiya dingin maicham khat asemin; satheng jouse-a konle vacha theng jouse-a konin alan, maicham chunga govam thilton atoh tan ahi.

²¹Chuin Pakaiyin agimnam tuitah chu ajan, Pakaiyin alungthimin, keiman mihem jeh-in leiset gaosap kit taponge; ajehchu mihem lungsunga angaitona jouse hi achapana pat phaloupan ahitai; chule keiman kanabol banghin avelin hinna nei ganhing ho sumang taponge.

²²Vannoi leiset aumlai chansea, muchi tu phat le chang-at phat, dap le sat, phalbi le nipi, sun le jan tang talou ding ahi, ati.