Read Thado Chin Semtilbu 9 Bible Online

Semtilbu 9 - Thado Chin bible

Semtilbu 9

¹ Chuin Pathen'in Noah le achapate chu phatthei aboh-in, ajah uvah, Hin phaovin lang pungthei jun, chule leiset lodim soh-un.

²Chule leiset chunga gamsa jouse, vanlaijola leng vachate jouse, chule tolla vah ganhing jouse, twikhanglen na nga jouse chunga nangho ginna le kichatna umcheh ding ahi; amaho khu nangho khutna kapehdoh ahitai.

³Achatloh thei ganhing jouse nangho an ding ahi, anche louhing kapeh banga thil jouse kapeh nahiuve.

⁴ Amavang sa chu ahinna puma, hichu athisan ahin, naneh lou dingu ahi.

⁵Chule thonlouva nahinnao thisan phu chu kalah ding; gamsa jouse khutna kon le, mihem khutna kona kalah ding; mitin sopi jouse khutna kona keiman mihem hinna phu chu kalah ding ahi

⁶ Koi hile mihem thisan so-a chu ama thisan jong mihemin asoding ahi. Ajehchu aman Pathen lim banga mihem asem ahi.

⁷ Chule nangho, hinpha uvin, chule punguvin; leiset chunga hin chilhah tamtah hinguvin, chule asunga hin hapunin pungun, ati.

⁸Chuin Pathen'in Noah le aumpi achapate jah-a thu aseijin,

⁹Veuvin, keiman nangho le nangho nunga nachilhah teo toh kakitepna kaphutdetne;

¹⁰Chule nangma toh uma hinna nei ganhing jouse, vachate, ganchate, chule leisetna naumpi gamsa chengse; Kong innei sunga kona hung potdoh jouse-a kona leiset chunga gamsa jouse toh kakitepna kaphutdetnin ahi.

¹¹Chule keiman nangma toh kakitepna kaphudet ding; tahsaphe pojouse twisang letna avela kisumang kit talou ding; chule leiset sumang dinga jong twisang lenkit talou ding ahi, ati.

¹²Chuin Pathen'in, Hichehi keima le nangma chule nangma toh umkhom hinna nei ganhing jouse toh akhang akhanga dinga kakitepna melchihna ahi:

¹³Keiman ka lhagui meilah-a kakoije, hichehi keima le leiset kah-a kitepna melchihna ahi.

¹⁴Chule hitiding ahi, Keiman leiset chunga meibol kahin kaisah teng, meilah-a chu lhagui kimuding ahin;

¹⁵Chule keiman nangho le tahsaphe po hinna nei ganhing jouse toh kakitepna chu kageldoh ding; twi chu tahsaphe pojouse sumang dinga lenkit talou ding ahi.

¹⁶Chule lhagui chu meilah-a umding, Pathen le leiset chunga tahsaphe po hinna nei ganhing jouse toh tonsotna dinga kakitepna chu kageldohna dinga, hichu kahin vetding ahi, ati.

¹⁷Chuin Pathen'in Noah jah-a, hichehi keima le leiset chunga tahsaphe po jouse kikah-a kaphudoh kakitepna melchihna ahi, ati.

¹⁸Kong innei sunga kona potdoh Noah chapate chu Shem, Ham chule Japheth ahiuve: chule Ham chu Canaan pa ahi.

¹⁹Hiche hohi Noah chapate thumho chu ahiuvin; chule amaho-a kona hi leiset pumpi losoh-a uma ahi.

²⁰Chuin Noah'in loulhou mi ahunghi panin, chule lengpilei abolin ahi.

²¹Chuin aman lengpitwi adonin ahile akhamtan; apon in sunga chun pon sillouvin aumtan ahi.

²²Chuin Canaan pa Ham chun apa sagohkeu chu amun, inpo-a um asopiteni jah-a chun aseijin ahi.

²³Chuin Shem le Japheth'in pon alalhonin, alengkou gela abang lhonin, anungtoi lhonin, apao sagohkeu chu pon aga khu lhonin; chule amailhon anung ngat lhonin, apao sagohkeu chu amulhon pon ahi.

²⁴Chuin Noah alengpitwi khama konin ahung limdoh-in, achapa neojon abolna chu ahetan ahi.

²⁵Chuin aman, Canaan chungah gaosap lhunghen, asopi teni henga soh ho soh hihen, ati.

²⁶Chuin aman, Shem Pakai Pathen chu nunnom hen, chule Canaan chu asoh-in panghen.

²⁷Pathen'in Japheth khantousah hen, chule ama Shem pon in ho-a chengding; chule Canaan chu asoh hiding ahi.

²⁸Chuin twisanglet nungin Noah kum jathum le kum somnga ahing nalaijin ahi.

²⁹Chule Noah hinkho abonchan kum jakole kum somnga ahi. Chuin ama athitan ahi.