Read Thado Chin 2 Samuel 1 Bible Online

2 Samuel 1 - Thado Chin bible

2 Samuel 1

¹Tun Saul thinungin ahitin ahi, David'in Amalek mite athagamma ahung kinunglekit chun; David chu Ziklag'a nini ana umin;

²Ahin anithumnin ahitin ahi, hichun veuvin mikhat apon teldehduh le alua leiset nat pumin Saul gebuh-a konin ahungdoh-in; chuin ahitin ahi, ama David kom ahunglhun phatnin tolla alhun chibai aboh tan ahi.

³Chuin David'in ajah-a, Hoija kona hunga nahim? ati. Chuin aman, Israel gebuh a kona hung hoidoh kahi, ati.

⁴Chuin David'in ajah-a, Thu iti tam? neisei peh-in, katao ahi, ati. Chuin aman adonbutnin, Miho galmuna konin ahung jamtaovin, chule mi tamtah jong alhun chule athitan; chule Saul le achapa Jonathan jong athitai, ati.

⁵Chuin David'in gollhangpa henga, Nangman Saul le achapa Jonathan athi iti nahet ham? ati.

⁶ Chuin gollhangpa chun ajah-a, Keima Gilboa molsanga kaga umkhan ahile, ven Saul chu atengcha chunga ana opmin, chule ven sakol kangtalai hole sakol chung themho chun amachu nasatah-in ahindelun ahi.

⁷Chuin aman anunglam ahin vetna ahile keima eimun, chuin eihin kouvin ahi. Chuin keiman kadonbut nin, Hikoma kaume, kati.

⁸Chuin aman kahenga, Nang koi nahim? ati. Chuin keiman kadonbut nin, Keima Amalek mi kahi, kati.

⁹Aman kahenga aseikitnin, Kachunga dingin lang neithatnin, ajehchu kachunga lunghemna ahunglhung tai; ajehchu kahinkhohi keima-a aum nalaijin ahi, ati.

¹⁰Hijeh chun keima achunga kadingin, amachu kathat tai; ajehchu ama alhuh nunga ahinjou louding chu kahet ahitai; chule keiman alu-a um alal lukhuh le abanbul ho-a chaokolho chu kagalah-a, ka pakai nangma henga kahinpohlut ahitai, ati.

¹¹Hitichun David'in avonho abotkeh-in, hitima chun amatoh um miho jouse jong chun aboluvin ahi.

¹²Chuin amaho chu alunghemun, akapmun, hitichun amahon Saul le achapa Jonathan ding, Pakai miho jouse ding le Israel insung miho jouse dingin nilhah geijin an angolun ahi. Ajehchu amaho chemjam'a louva ahiuve.

¹³Chuin David'in athuseipeh gollhangpa jah-a chun, Hoilang mi nahim? ati. Chuin aman adonbutnin, Keima gamchom mikhat chapa Amalek mi kahi, ati.

¹⁴Chuin David'in ajah-a, Iti nangman Pakaiyin thao anusa khat chunga chu kichalouhela nakhut nalhah-a nasuhmang jengham? ati.

¹⁵Chuin David'in gollhangho lah-a khatchu akouvin ajah-a, Nailutnin lang achunga chun, ati. Chuin aman ama chu athat tai.

¹⁶Chuin David'in ajah-a, Pakai thaonusa kathatne tia nakamtah-a naphon jeh-in, nangma thisan phuchu nachunga chuhen, ati.

¹⁷Chuin David'in Saul le achapa Jonathan ka-lan akachamin;

¹⁸ (Chuin aman Judah chate jongchu thalpi manje hilding ahi, tin thu apen, veuvin, hichehi Jasher lekhabua akisunin ahi).

¹⁹Israel loupina chu namunsangho-a akithat tai; i-atile ahat ho lhu-a hitam!

²⁰Gath mun'a seihih-un, Ashkelon lampi dunga phongle hih-un, achuti loule Philistine te chanuho kipah uvintin; chule cheptan louho chanute jong kichoisang getnunte.

²¹Gilbao molsang nangho, nachung uva daitwi lhahda henlang, gojong juhdahen, louhon jong aga soda hen; ajehchu mihatpa lumdal chu theng loutah-in lemangin aumin, Saul lumdal chu thao nulou bangin anaumin ahi.

²²Akithatpa thisana konle ahatpa thaova konin, Jonathan thalpi chu akile kitpon, chule Saul chemjam jong agoh keuvin ahung kilepon ahi.

²³Ahinkho sung lhonin Saul le Jonathan hi ngailut umtah le dei um pentah ahilhonin; chule athilhonin jong akikhen lhonpoi; amani muvanlai sangin amangang jolhonin, keipi bahkaiho sangin jong ahat lhonin ahi.

²⁴Nangho Israel chanute, dei umtah ponsanthipma natompao, sana-a najempao Saul dingin kapmun.

²⁵Iti ahat ho galmuna lhujenga hitam! Vo Jonathan, namun sangho chunga chun nangma nakithat tai.

²⁶Kasopipa Jonathan, nangma jeh-in kalung agenthei lheh-in ahi: Keima dingin kipa umtah chu nanahin, keima neingailutna akidangin, numei ho ngailutna sangin asangjon ahi.

²⁷Ahat ho iti lhuh-a, chule gal manchah ho iti manthah jenga hitam!