Read Thado Chin 2 Samuel 10 Bible Online

2 Samuel 10 - Thado Chin bible

2 Samuel 10

¹Chuin hiche jouchun ahitin ahi, Ammon chateho lengpa chu athitan ahile achapa Hanun chun ama khelin lengvai apotan ahi.

²Chuin David'in, Apan kachunga hepina eimusah banga, keima jong Nahash chapa Hanun chunga hepina kamusah ding ahi, ati. Hitichun David'in apa chungchanga ama lhamon ding chun asohte asoltan ahi. Chuin David soh ho chu Ammon chate gama chun ahunglut taovin ahi.

³Chule Ammon chate pipuho chun apakaipao Hanun jah-a, David hin napa ajana jala lhamonsah hohi ahinsol ahi hinte tia nagelem? David hin khopi hi ajotheina dinga akholtoh dingle, avelhi ding joh-a ahinsol hilou ham? atiuve.

⁴Hijeh chun Hanun'in David soh ho chu amanin, akhamulu akeh langkhat avolhahpeh-in, chule aponchenu chu akimlaitah, ato don laitah-u chu achetanpeh-in; chuin amahochu asolmang tan ahi.

⁵Chuin hichehi David aseipeh phatnun, aman amaho kimupi ding asolin ahi, ajehchu miho chu jahcha lheh jengu ahi: chuin lengpan, Nakhamulu asaodohkit kahsen Jericho-a umunlang, ahung saodoh tengle hung kinunglekit taovin, ati.

⁶Chuin Ammon chaten David angsung kidah umtah ahiu amudoh phatnun, Ammon chate chun Bethrehob'a um Syria mite, Zobah'a um Syria mite keng sepai sangsomni, Maakah lengpa-a kon mi sangkhat, chule Ishtob'a kon mi sangsom le sangni athalah-un ahi.

⁷Chuin David'in hichu ajah phatnin, Joab le amihat janelho chu asoltan ahi.

⁸Chuin Ammon chate chu ahung kondoh-un, kotpi phung lutna-a chun galsat dingin akigolun: Zobah'a um,Rehob'a um, Ishtob'a um le Maakah'a um Syria mite chu amaho le amaho loujaova aumun ahi.

⁹Joab'in galchu anung le ama-a aum amu phatnin, Israel mi lhentum cheh chu alhengdoh-in, amaho chu Syria te toh kisat dingin akigolsah-in:

¹⁰Chule adangho sese chu asopipa Abishai khutna Ammon chate toh kisat dinga agoltoh dingin apedoh-in ahi.

¹¹Chuin aman, Syria te chu keija dinga ahat behseh uva ahile, nangman neikithopi ding; ahia Ammon chate chu nanga dinga ahat behseh uva ahile, keima kahunga kahung kithopi ding nahi.

¹²Hangsanun, eiho imiteu dingleh i-Pathen'u khopiho-a dingin pangu hite: chule Pakaiyin amitmu-a pha asah bang bangin bolhen, ati.

¹³Chuin Joab le aumpi miho chu Syria mite to kisat dingin galmun anailut taovin ahile, amaho chu amasanga chun ajam taovin ahi.

¹⁴Chuin Ammon chate chun Syria mite jam chu amu phatnun, amaho jong Abishai masanga chun ajamun, khopi sungah aluttaovin ahi. Hitichun Joab chu Ammon chate-a konchun ahung kinunglen, Jerusalem'a ahungtan ahi.

¹⁵Chuin Syria miten Israelte masanga agal lel'u chu amuphatnun, amaho akikhom khom taovin ahi.

¹⁶Chuin Hadadezer'in mi asolin, luipi galla um Syria mite chu agapuidoh-in ahi. Chuin amaho Helam'a ahungun, chule Hadadezer janel gal lamkai Shobach chu amaho masanga achen ahi.

¹⁷Chule hichethu hi David aseipeh phatnun, aman Israelte jouse akhom khomin, Jordan agalkaijun, Helam mun'a ahungun ahi. Chuin Syria mite chu David doudingin amaho le amaho akigol toh-un, ama chutoh akisat taovin ahi.

¹⁸Chuin Syriaho chu Israel masanga chun ajam taovin; chule David'in Syria miho sakol kangtalai tolmi jasagi le sakol sepai sangsomli, chule ajanelhou lamkai Shobach jong chu athatnin, hiche mun'a chun athitan ahi.

¹⁹Chuin Hadadezer soh-a um lengho jouse chun Israelte masanga agal lel'u chu amu phatnun, Israelte toh chamna abollun, amaho jenle-in apang taovin ahi. Hijeh chun Syria miten Ammon chateho kithopi kit ding chu akicha taovin ahi.