Read Thado Chin 2 Samuel 11 Bible Online

2 Samuel 11 - Thado Chin bible

2 Samuel 11

¹ Chuin ahitin ahi, kum ahung kichaina, lengho galkon phat laitah-in, David'in Joab le aumkhompi asote chule Israel mite chu asolin; chuin amahon Ammon chate asumangun, Rabbah khopi aum uvin ahi. Ahinla David Jerusalem'a aum jingin ahi.

²Chuin nilhah langin ahitin ahi, David chu alupna-a konin athoudoh-in, leng in chunga chun avahle len ahi. Chuin aman in chunga konchun numei khat akisilpet amun, chule hiche numeinu chu vetdinga melhoitah ahi.

³Chuin David'in mi asolin amanu thudol agakholchil sah-in ahi. Chuin mikhatnin, Hichehi Hit mi Uriah inneipi Eliam chanu Bathsheba hilouham? ati.

⁴Chuin David'in thupole ho khat asolin, amanu agapuisah tan; chule amanu ahenga ahungin, aman amanu aluppitan ahi; ajehchu amanu chu athen louna-a kona kisuthenga ahin: chuin amanu a-in lama akile kittan ahi.

⁵Chuin amanun nao avop phatnin, David henga mi asolin, Nao kavoptai, agati sah-e.

⁶Chuin David'in Joab thu athotnin, Hit mi Uriah chu neihin solpeh-in, ati. Chuin Joab'in Uriah chu David henga ahin soltan ahi.

⁷Chuin Uriah ahenga ahung phatnin, David'in Joab le mipite chu iti naovem, chule galchu itobanga machal jinga hinam tin adongin ahi.

⁸Chuin David'in Uriah jah-a, Na-in lama chesuh inlang, nakeng kisilin, ati. Chuin Uriah chu lengpa in'a konin akipatdoh-in, chule lengpa-a kona nehding thilpeh ho-in anung ajuisuh paijin ahi.

⁹Ahivangin Uriah chu lengpa in kotkhah bula chu a-pakaipa sohte chutoh alum denin, a-in lama chun achesuhpon ahi.

¹⁰Chuin amahon Uriah chu a-in lama achetapoi tia David aseipeh phatnun, David'in Uriah jah-a, Nakholjin na-a kona nahung hilouham? ipidinga na-in lama chu chesuh louva nahim? ati.

¹¹Chuin Uriah chun David henga, Pathen thingkhong le Israel chule Judah pon in'a aumun; chule ka pakaipa Joab le ka pakaipa sohten gamlah-a gebuh akisonun; keima ane dingle adonding, chule kaji toh lumkhom dinga ka-in'a kache dingham? Nangma nahina nalhagao ahinlaisen keiman hiche tobang thil hi bolponge ati.

¹²Chuin David'in Uriah henga, Tunin jong hiche mun'a hin umkit tan, chule jing tengle keiman kipatdohsah nange ati. Hijeh chun Uriah chu Jerusalem'a hicheni chun chule ajing geijin aumtan ahi.

¹³Chuin David'in ama akou phatnin, aman ama masanga chun anen adonin, chuin aman ama chu adonkhamsah tan ahi. Chuin nilhah lamin a-pakaipa sohtetoh jalkhuna lum dingin achen, ahin a-inlanga vang achesuh pon ahi.

¹⁴Chuin jingkah-in ahitin ahi, David'in Joab henga dingin lekha khat asunin, hichu Uriah khutna athottan ahi.

¹⁵Chuin aman lekha chunga chun asunin, Uriah chu galmun khohpen masanga chun pansah-in, amachu akisuhkhah -a athitheina dingin, ama-a konin kinung chonun, ati.

¹⁶Chule ahitin ahi, Joab'in khopi chu aum laijin, Uriah chu galhat miho umna-a ahet munkhatna chun apansah-in ahi.

¹⁷Chuin khopi sunga um miho chu apotdoh-un, Joab toh akisat taovin ahi: chule hiche mun'a chun David sohte mipi ho lah-a phabep khat alhutaovin; chule Hit mi Uriah jong chu athitai.

¹⁸Chuin Joab'in gal chung chang thu jouse David gaseipeh dingin mi asoltan;

¹⁹Chuin aman thupolepa chu thu apen, Nangman lengpa henga gal umchan thuho jouse nagasei soh tengle,

²⁰Lengpa alunghana, nahenga, Ipidinga kisatpi dinga khopi chu nachuti nailut jengu ham? Banga kona nahin kap dingu chu nanghon nahetlouvu ham?

²¹ Jerubesheth chapa Abimelech chu koiham athatna? Banga kona numei khatnin sumheisong halkhat aselhah khumleh ama chu Thebez mun'a thia hilouham? Ipi dinga nangho bang naija nacheu ham? tia asei tengle nangman, Nasoh Hit mi Uriah jong athitai, tia nasei ding ahi, ati.

²²Chuin thupolepa chu achen, Joab'in asol lona jouse chu David henga aseitan ahi.

²³Chuin thupolepa chun David henga, Tahbeh-in miho chun keiho eihinjou jouvin, chule loujaova keiho lah-a lama ahungpotnun, keihon amaho chu kotpi phung lutna geijin kanung delun ahi.

²⁴Chuin thalkap hon kulbanga konin nasohte lah ahin kapmun ahile lengpa soh phabep khat athitan, chule nasoh Hit mi Uriah jong chu athitan ahi, ati.

²⁵Chujouvin David'in thupolepa henga, Nangman Joab henga, Hicheho hin nangma nalungkham sah dahen, ajehchu chemjamin mikhat ahiloule adangkhat athateiji mong ahi: khopi douna-a chun nagalsat hatsah cheh inlang, khopi chu suse-in, tia naseija amachu natilkhou ding ahi, ati.

²⁶Chuin Uriah jinun ajipa Uriah athitai ti ajah phatnin, ajipa pul adoutan ahi.

²⁷Chuin alunghemna akichai phatnin, David'in amanu chu a-in'a agapuilut sah-in, chule amanu chu a-inneipi ahung hitan, chuin ama dingin chapa khat ahinpeh-in ahi. Ahin David thilbol chun Pakai alung lhaisah tapon ahi.