Read Thado Chin 2 Samuel 12 Bible Online

2 Samuel 12 - Thado Chin bible

2 Samuel 12

¹ Chuin Pakaiyin David henga Nathan asolin, chuin ama ahenga ahungin, ajah-a, Khopi khatna hin mini aumin, khatchu ahaovin, khatjohpa chu avaichan ahi.

²Mihaopa chun kelngoi honle ganchahon tamtah aneijin:

³Ahinla mivaichapan akichoh-a avah kelngoinou anu khat tilouvin imacha aneipon ahi. Chule hiche kelngoinou amale achate toh thakhatna hungkhang len ahin, chule ama an ngei chu aneh-a, akhontah-a twi adona, ama angsunga lumma, chule amadinga chanu khat tobang hija ahi.

⁴Chuin mihaopa koma chun kholjin vahlekhat ahungin, chuin aman akelngoi honho lah-a khatjeng chajong chu hiche kholjin ahung lhungpa thapeh dingchun aphalpon; ahin mivaichapa kelngoi chu alan, chuin aman ahenga hung mipa ding chun athapehtan ahi, ati.

⁵Hiche mipa chunga chun David lunghana chu akoujah jengin, chuin aman Nathan henga, Hingjing Pakai mina kasei ahi, hitobang thil bolla michu thiteiding ahi:

⁶Chule hitobang abola, khotona anei loujeh-a, kelngoi chu ajatlia aleding ahi, ati.

⁷Chuin Natha'in David henga, Hiche mipa chu nangma nahi. Israel Pakai Pathen'in hitin aseije, Keiman nangmahi Israel chunga leng dinga thao kanua, chule Saul khutna kona kahuh doh-a;

⁸Chule napakai pa insungle ajiteho chu nangma kapeh-a, chule Israel le Judah insung jong nangma kapeh nahin; ahin hiche chu lhombehseh ahia ahile, keiman nangma adang dang jong kapehbe nalai ding ahi.

⁹Ipidinga nangman amitmua thilphalou bolna dinga Pakai thupeh chu nahsah louva nabol ham? Nangman Hit mi Uriah chu chemjamin nathatnin, a-inneipi chu naji dingin nakipuijin, chule ama Ammon chate chemjamin nathatnin ahi.

¹⁰Hijeh chun tu-a hi na-insunga kona chemjam kiladoh louding ahi; ajehchu nangman nahsahmon neibolin, Hit mipa Uriah inneipi chu najidingin nakipuijin ahi.

¹¹ Pakaiyin hitin aseije, Vetan, Keiman nangma douna-a na-insunga thilphalou khat kasodohsah ding, chule najiteho chu namitmu-a kalahpeh-a, amaho chu na-inhengho kapeh ding, chule aman najiteho chu sunchang noija aluppi dingu ahi.

¹²Ajehchu nangman hichehi guhthima nabol ahin; ahinla keiman hichehi Israel jouse masangle sunchang noija kabol ding ahi, ati.

¹³Chuin David'in Nathan henga, Keima Pakai dounan kachonse tai, ati. Chuin Nathan'in David henga, Pakaiyin jong nachonsetna aladohtai, nangma nathi louding ahi.

¹⁴Hijeng jongle hiche nathilbola konahi Pakai melmaten Pathen ataitomna ding uva phat gomkom napeh ahi jeh-in, nangma-a dinga penga nachapa chu thitei ding ahi, ati.

¹⁵Chuin Nathan chu a-in'a dingin akipatdoh tan ahi. Chuin Pakaiyin Uriah inneipin David ahinpeh chapang chu adengin ahile, hanatnin anatan ahi.

¹⁶Chuin David chapang dingchun Pakai henga ataovin; chule David'in an angolin, chuin insunga alutnin, jankhovah-in tolla alumin ahi.

¹⁷Chuin a-insung upaho akipat doh-un, tolla kona ama gathoudoh dingin ahenga acheuvin ahi: ahinla ama thodoh ding anompon, chule amahotoh anjong anepon ahi.

¹⁸Chuin ahitin ahi, nisagi lhinin chapang chu athitan ahi. Chule David sohte chun naosen athitai tia ama seipeh ding chu akichalheh jengun ahi. Ajehchu amahon, Veuvin, chapang chu ahin laija bon ahenga thu iseijuva ahile, aman ithuseiju anangai lou ahin: chapang chu athi tin seipeh leuhen, khohjo cheh louding ham? atiu ahi.

¹⁹Ahin David'in asohho kihou lhih chu amu phatnin, David'in naosen chu athi ahi ahetai. Hijeh chun David'in asohte henga, Chapang chu athi hitam? ati. Chuin amahon, Ama athitai, atiuve.

²⁰Hichun David tolla konin athoudoh in, akisilin, thao akinun, chuin avon akikhelin, Pakai in'a ahung lutnin, Pathen ahou tan ahi. Chuin a-in lama ahung kilen; chuin aman angaichat phatnin amahon a-angsunga an aluipeh-un ahile aman anetai.

²¹Chujouvin asohten ahenga, Ipibola hitia hi chona nahim? chapang chu ahinlaisen ama dingin an nangolin nakapmin, ahin chapang chu athi phatnin nathou doh-in an nanen ahi, atiuve.

²²Chuin aman, Chapang chu ahinlaijin keiman an kangol-in, kakapmin ahi: ajehchu keiman, Pathen'in eilungsetna chapang chu hunghing maithei ahi kon ija aseithei dingham? kati ahi.

²³Ahinla tun ama athitai, ipidinga keiman an kangol dingham? Keiman ama kapuikit theiham? Keima amakoma kache ding ahin; ahinla ama keikoma hung kilethei louding ahitai, ati.

²⁴Chuin David'in a-inneipi Bathsheba chu alhamonin, chule amanu koma chun achen, aluppin ahi: chuin amanun chapa khat ahingin, amapan amin Solomon asahtai: chule Pakaiyin amachu angailun ahi.

²⁵Chuin aman Nathan themgaopa khutna thu athotnin ahile; aman Pakai jal-in aminchu Jedidiah asahtan ahi.

²⁶Chuin Joab'in Rabbah-a Ammon chate dounan gal asatnin, chuin leng khopi chu alatan ahi.

²⁷Chuin Joab'in thupole ho chu David henga asolin, ahenga, Keiman Rabbah kasatnin, chule twipi khopiho chu kalatai.

²⁸Hijeh chun tun mipi adang sese chu khom khomin, chule khopi douna ding chun gebuh kisonun lang, hichu laovin; achutiloule akhopi chu kalah-a kamin kalosah ding ahi, ati.

²⁹Chuin David'in mipi jouse akhom khomin, Rabbah-a achetauve, chule agasatnun, hichu alataovin ahi.

³⁰Chuin aman alengpao lallukhuh chu aluchanga konin aladoh-in, hiche agih dan songmantam toh kihal sana talent khat ahin; chuin hichu David luchanga akhuh peh-un ahi. Chuin aman khopi-a thil kichomdoh tamtah ahinpon ahi.

³¹Chuin aman chua um mipi ho chu ahinpui doh-in, chule amaho chu thing-at, thih loukai le thih heicha semin apansah-in, chule cheh dengin apansah-in: hitichun aman Ammon miho khopi jouse-a chun abolin ahi. Chuin David le mipi ho chu Jerusalem'a ahungkile taovin ahi.