Read Thado Chin 2 Samuel 13 Bible Online

2 Samuel 13 - Thado Chin bible

2 Samuel 13

¹Chuin hicheho jouse nunghin ahitin ahi, David chapa Absalom chun Tamar kiti sopi nungah hoitah khat aneijin, chule David chapa Amnon chun amanu chu adeicha lheh jengin ahi.

²Chule Amnon chu anaonu Tamar jehchun agenthei lheh jengin anatlo tan ahi; ajehchu amanu nungah thengsel ahin; chule Amnon'in amanu chunga thilkhat abolding chu amadingin hahsa asalheh jengin ahi.

³Ahin Amnon'in David sopipa Shimeah chapa Jonadab kiti gol khat aneijin: Jonadab hi mi lungthim themtah khat ahi.

⁴Chuin aman ajah-a, Nangma lengpa chapa hija ipidinga ani ania nagon cheh cheh ham? neiseipeh louding ham? ati. Chuin Amnon'in, ajah-a, Keiman kasopipa Absalom naonu Tamar kadeichai, ati.

⁵Chuin Jonadab'in ajah-a, Najalkhuna luminlang kinatsah-in: chule napa nave-a ahung tengle, ajah-a, Nahenga katao ahi, kasopinu Tamar chu hunghen lang nehding eihung pehen, chule amanu khutna kona kaneh theina dingin kamitmu in nehding eihung sempeh hen, tin seijin, ati.

⁶Hitichun Amnon alumin, chule akinat sahtan ahi. Chuin lengpa avedinga ahung phatnin, Amnon'in lengpa henga, Nahenga katao ahi, kasopinu Tamar chu hung henlang, akhutna kona kaneh theina dingin kamitmu-a changlhah phengni eihung sempeh hen, ati.

⁷Hichun David'in in'a Tamar henga mi asolin, ajah-a, Nangma tun na-upa Amnon in'a chenlang, anehding an gagotpeh in, ati.

⁸Hitichun Tamar chu asopipa Amnon in'a achen ahile, ama analumin ahi. Chuin amanun changbong alan, ameh-in, amitmun changlhah phabep asemin, chuin changlhah chu akangin ahi.

⁹Chuin aman khangbel khat alan, chule hicheho chu a-angsunga asunglhan; ahinla ama nehding anompon ahi. Chuin Amnon'in, Pasal jouse kakoma konin soldoh-in, ati. Chuin amaho amitakip ama koma konin achedoh taovin ahi.

¹⁰Chuin Amnon'in Tamar henga, Nakhutna kona kaneh thei nadingin, nehding chu indan sunga hinchoi lutnin, ati. Chuin Tamar'in achanglhah semho chu alan, hicheho chu indan sunga a-upa Amnon henga ahinchoitan ahi.

¹¹Amanun hicheho chu ama nehdinga ahinchoi phatnin, aman amanu chu amanin, ahenga, Kanaonu, hungin neiluppin, ati.

¹²Chuin amanun adonbutnin, Ahipoi, he-o, pumhatnin neibol hih-in; ajehchu hitobang thil hi Israelte lah-a akibol ngaipoi: hiche ngol hoitah thil hi bolhih-in.

¹³Chule keiman kajumna hi hoija kachepi ding ham? chule nangma jong Israel sunga mingol khat banga naum ding ahi. Hijeh chun tun, nahenga katao ahi, lengpa henga seijin, ajehchu aman nangma dingin ei-it louding ahi, ati.

¹⁴Ahivangin aman amanu thusei chu angaipeh pon: amanu sanga hatjoh ahijeh-in, pumhatnin abolin, amanu aluppitan ahi.

¹⁵Hiche jouchun Amnon'in amanu chu hahotnin ahotan, hitichun aman amanu ahotna chu angailutna sangin alenjotan ahi. Chuin Amnon'in amanu jah-a, Thoudoh inlang chemangtan, ati.

¹⁶Chuin amanun ajah-a, Hichehi angai ahipoi: hitia dihlou tah-a neisol mang hi kachunga nathilbol khatjo sanga chu phaloujo ahi, ati. Ahinla aman amanu thusei chu angaipeh pon ahi.

¹⁷Hichun aman ama jenlea pang asohpa chu akouvin, ajah uva, Hiche numei nuhi kakoma konin kaidoh inlang, amanu nunga kot kamun, ati.

¹⁸Chule amanu chun sangkhol jatchom choma pol khat aki-ah ahi: ajehchu hitobang sangkhol chu leng chanu nungahthengho von ahi. Chujouvin asohpa chun amanu chu ahinpui doh-in, amanu nunga kotchu akamtan ahi.

¹⁹Chuin Tamar'in aluchunga vut akinun, chule amanun asangkhol jatchom choma polchu abotkeh-in, alujanga akhut akoijin, kap pumin achemang tan ahi.

²⁰Chuin asopipa Absalom'in amanu jah-a, Nasopipa Amnon chun naum khompi ham? Ahinla tun, kasopinu lung mongin umin: ama nasopipa ahi; hiche thilhi lungnat nan neihih-in, ati. Hitichun Tamar chu asopipa Absalom in'a chun thomhao tah-in aumtan ahi.

²¹Ahinla David lengpan hicheho jousehi ajah phatnin, ama alunghang lheh jengin ahi.

²²Chule Absalom'in asopipa Amnon henga ase jong apha jong imacha aseipon ahi. Ahin Amon'in asopinu Tamar pumhatna abol jeh chun, Absalom'in Amnon chu ahon ahi.

²³Chuin kumni lhingset jouvin ahitin ahi, Absalom'in Ephraim koma um Baal-hazor mun'a kelngoimul avouvin: chule Absalom'in lengchapaho jouse chu akouvin ahi.

²⁴Chuin Absalom chu lengpa henga ahungin, Tun vetemin, nasoh hin kelngoimul kavo ding ahin; katao ahi, lengpa hu nasoh hito lhonin cheohite, ati.

²⁵Chuin lengpan Absalom henga, Ahipoi, kachapa, tun eiho ibonun chepou hite, achuti loule nanga dingin pohgih hikhao vinge, ati. Chuin aman amachu angeh kitnin, ahivangin ama cheding anompon, phatthei aboh jotan ahi.

²⁶Hichun Absalom'in, Chuti ahilou dingle, nahenga katao ahi, kasopipa Amnon hi keihotoh lhonkhom hen, ati. Chuin lengpan ajah-a, Ipidinga amachu nangma toh lhonkhom dingham? ati.

²⁷Ahinla Absalom'in angeh teiteijin ahile, aman Amnon le lengpa chapateho jouse chu amatoh alhonkhom sahtan ahi.

²⁸Tun Absalom'in asohho chu thu apeh-a, hitia asei ahi, Amnon lungthim chu ju-a akipasah tengleh nanghon melchih-un, chule keiman naheng uva, Amnon chu thatnun; kati tengle, amachu thatnun, kicha hih-un: keiman nangho kathupeh nahiu hilouham? hangsanun lang hatnun, ati.

²⁹Chuin Absalom soh ho chun Absalom'in athupeh bangu chun Amnon chunga abol taovin ahi. Chuphatnin lengpa chapateho jouse akipat doh-un, amitakip asangan chunga atoudoh-un, ajam taovin ahi.

³⁰Chuin ahitin ahi, amaho lampia achepetnun, Absalom'in lengpa chapate jouse athat gamin, amaho khatcha jong ahingdoh aumpoi, tithu David heng ahung lhungtan ahi.

³¹Hichun lengpa akipat doh-in, aponsil abotkeh-in, tolla alumin; chule asohte jousenjong aponsilu abotkeh-un akoma adingun ahi.

³²Chuin David sopipa Shimeah chapa Jonadab'in adonbutnin, Ka pakai amahon lengpa chapate khangthah jouse atha sohkeijin ngaito hih-in, ajehchu Amnon sehseh bou athin ahi. Ajehchu aman asopinu Tamar pumhatna anabol ni-a patna, Absalom thupeh dungjuija hichehi hung kigong pana ahitai.

³³Hijeh chun tun ka pakai lengpan lengchapate jouse thia ahi tin nalungin ngaito hih-in: ajehchu Amnon sehseh bou thi ahi, ati.

³⁴Hichun Absalom ajamtan ahi. Chuin gollhang khongah-a pangpa chu akhoda-a, avetna ahile, veuvin, anunglam molpang lampia chu mitamtah ahung amun ahi.

³⁵Chuin Jonadab'in lengpa henga, Ven, Lengpa chapate ahunguve: nasoh-in asei bangbang chu ahi, ati.

³⁶Chuin ahitin ahi, aman thu asei joujou chun, veuvin, lengpa chapate ahung lhungun, chuin awsang tah-in akapmun ahi: chule lengpa le asohte jong hakan akap taovin ahi.

³⁷ Ahinla Absalom chu ajam mangin, Geshur lengpa Ammihud chapa Talmai henga achetan ahi. Chuin David chu achapa jeh-in niseh-in alunghemin ahi.

³⁸Hitichun Absalom ajamin, Geshur'a achen, chua chun kumthum aumin ahi.

³⁹Chule David lengpa hinna chu Absalom henga achenom lheh jengin ahi. Ajehchu ama Amnon thi chung changa ana lungmonga ahitai.