Read Thado Chin 2 Samuel 17 Bible Online

2 Samuel 17 - Thado Chin bible

2 Samuel 17

¹Hicheng tilou chun Ahithophel'in Absalom henga, Tun keima mi sangsom le sangni lhendoh ingting, tujan mama hin kipatdoh ingting, David ganungdel inge:

²Chule ama athachola akhuttha alhompet tahle achunga kachuh ding, kasuh kichat ding: chutengle aumpi miho jouse chu jam mang untin, keiman lengpa bouchu katha ding ahi.

³Chule mipi jouse chu nahenga kahin lepuiding ahi. Nangman naholpa tailou adang jouse ahung kilekit teng, mijouse chu lung mong diu ahi, ati.

⁴Chule akisei chun Absalom le Israel upaho jouse chu alunglhaisah lheh-in ahi.

⁵Chujouvin Absalom'in, Tun Arch mipa Hushai jongchu kouvun, chule eihon ama thusei jongchu ngaiju hite, ati.

⁶Chuin Hushai chu Absalom henga ahung phatchun, Absalom'in akihoupin, Ahithophel'in hitihin aseije: aman asei bangahi iboldiu ham? Ahilouva ahile, nangman hinseijin, ati.

⁷Chuin Hushai'in Absalom henga, Ahithophel thumop hi tuphatna dingin aphapoi.

⁸Hushai'in aseiben, Ajehchu nangman napale amiho chu gal hat ahiu, chule vompi gamlah-a anou kilahpeh banga alungsung uva lungsa ahiu nahen ahi; chule napahi galsat mi ahin, miho lah-a jong gehlou ding ahi.

⁹Ven, amahi tu-a leiko khat sung, ahiloule munchom dang khatna kisel ding ahi: chule hung hitiding ahi, amaho lah-a themkhat ahung lhuh masah tengule, hiche jaho jouse chun, Absalom nungjui miho lah-a kitha chapna aumtai atidiu ahi.

¹⁰Chutengle mihangsan tah, alungchang keipi lungchang tobang jong chu junlha ding ahi: ajehchu Israelte jousen napa chu mihat ahi ahetnu ahin, chule aumkhompi miho chu mihangsan jeng ahiuve.

¹¹Hijeh chun Dan'a pat Beersheba geija Israelte jouse luipikama neldi jat banga nahenga nakhop khoma, chule nangmatah chu gala nakon ding chu kathumop nahi.

¹²Hiti achu eiho ama kimunathei ding mun'a chu ihungdiu, chule daitwi tolla alhah banga eiho ama chunga ichuh jeng dingu ahi. Chule amale aumpi miho jouse khatcha jong kidalha louding ahi.

¹³Hicheng chungchona chu, ama khopi sung khat touva alutna ahile, Israelte jousen hiche khopi lama chu khao ahinchoidiu, chule khopi chu song halkhat cha akimulou kahse-a vadung sunga ikailut dingu ahi, ati.

¹⁴Chuin Absalom le Israel mipi jouse chun, Arch mipa Hushai thumop hi Ahithophel thumop sangin aphajoi, atiuvin ahi. Ajehchu Pakaiyin Absalom chunga thilphalou ahinlhun sahna dinga, Pakaiyin Ahithophel thumop phaho jona dinga tohgon ananeisa ahitai.

¹⁵Hichun Hushai'in Zadok le Abiathar thempupa henga, Hiti khati hin Ahithophel'in Absalom le Israel upaho athumopmin; hiti tihin keiman kathumop in ahi.

¹⁶Hijeh chun tun gangtah-in solin lang, David henga, Tujan gamthip phaicham ho-a chun gehhihhen, ahinla mangang tah-in galkaijin; achutiloule lengpa le aumpi miho jouse chu val lhuma umkha diu ahi, tin gaseisah-in, ati.

¹⁷Tun Jonathan le Ahimaaz chu khopisung ahunglut lhon akimulouna dingin Enrogel'a aumlhonin ahi: chuin soh numei khat achen amani agaseipeh-in; chuin amani ache lhonin David lengpa agaseipeh lhontan ahi.

¹⁸Ahijeng vangin pasal chapang khatnin amaho chu anamun, Absalom chu aseipehtan ahi. Ahin amani mangang tah-in achemang lhonin, chuin Bahurim'a ahongsunga twikul neikhat in'a ahung lhonin; hia chun akumlha lhontan ahi.

¹⁹Chuin numeinu chun twikul kamchu asingin, chuin achunga chun chang aphouvin ahile, hichu akihedoh pon ahi.

²⁰Chuin Absalom sohte numeinu in'a ahung phatnun, ahenga, Ahimaaz le Jonathan chu hoilama umham? atiuve. Chuin numei nun ajah uvah, Amani vachadung galkailhon tante, ati. Chuin amahon aholmo phatnun Jerusalem'a ahungkile taovin ahi.

²¹Chuin ahitin ahi, amaho chedoh nungin, amani twikul'a konin ahungdoh lhonin, achelhonin David lengpa henga agaseipeh lhonin, ajah-a, Kipatdoh inlang mangang tah-in twi chu galkaijin; ajehchu Ahithophel'in nangma douna-a hitia hi athumop ahitai, atilhonne.

²²Hichun David le aumkhompi miho jouse chu akipat doh-un, Jordan agalkaijun: jingkho vah-in amaho Jordan galkailou khatcha aumtapouvin ahi.

²³Chuin Ahithophel'in athumop akijuilou amuphatnin, asangan pho kigotnin, akipatdoh-in, akhopi a-in lama achen, a-insung asemtupmin, chuin amale ama akikhailih-in, athin, apa lhanna akivuitan ahi.

²⁴Hichun David Mahanaim'a ahung lhungin ahi. Chule Absalom le aumpi Israel mite jouse chu Jordan agalkai taovin ahi.

²⁵Chuin Absalom'in Joab khelin Amasa chu janel lamkaijin apansahtai: Hiche Amasa kitipa hi chu Joab nu Zeruiah sopinu Nasah chanu Abigail galuppi pa Israel mi Jithra kitipa chapa ahi.

²⁶Hitichun Israel le Absalom'in Gilead gama chun pon in akison taovin ahi.

²⁷Chuin ahitin ahi, David Mahanaim ahunglhun phatnin, Ammon mi Rabbah kho-a cheng Nahash chapa Shobi le, Lodebar kho-a cheng Ammiel chapa Machir toh, Rogelim kho-a cheng Gilead mi Barzillai'in,

²⁸Jalkhunho, twikhonho, leibelho, suhlou chang, sakolchang, changbong, changkanpoh, bepaiho, bechim, belheng kikangho,

²⁹Chule khoiju, bongnoi thao, kelngoi le bongnoihaho chu David le aumpi miho nehdingin ahinpouvin ahi: ajehchu amahon, Mipi hi gamthipma gilkel, thachol le dangchah-a umu ahi, atiuve.