Read Thado Chin 2 Samuel 18 Bible Online

2 Samuel 18 - Thado Chin bible

2 Samuel 18

¹Chuin David'in aumkhopi miho chu asimin, chuin aman sangkhat chung lamkai le jakhat chunga lamkai ding alhengdoh-in ahi.

²Chule David'in mipi hopthum-a hopkhat chu Joab khut noija asoldoh-in, hopthum-a hopkhat chu Zeruiah chapa Joab sopipa Zeruiah chapa Abishai khut noija asoldoh-in, chule hopthum-a hopkhat chu Git mi Ittai khut noija chun asoldoh-in ahi. Chuin lengpan mipi ho henga, Keima tahjong thonlouva nang hotoh kalhonkhom ding ahi, ati.

³Ahinla mipin adonbutnun, Nangma nakondoh louding ahi: ajehchu keiho jamta leoveng, amahon keiho gelkhoh-a einei loudiu; chule keiho akehkhat thijong leoveng, amahon keiho gelkhoh-a einei loudiu ahi. Ahinla tun nangma keiho sangsom toh kibang nahi: hijeh-a chu nangman tu-a khopi sunga naum hi phajo ahi, atiuve.

⁴Chuin lengpan ajah uva, Nanghon aphapen dinga nagelu chu kabol ding ahi, ati. Chuin lengpa kotpi phung koma chun adingin, mipi jouse chu jakhat cheng le sangkhat chengin ahungdoh-un ahi.

⁵Chuin lengpan Joab, Abishai chule Ittai chu thu apen, ajah uva, Keima ding ngaitonan gollhangpa, Absalom ngeichu lungneng tah-in hindemun, ati. Chule miho jouse chun lengpan Absalom chung changa ja lamkaiho athupeh chu ajaovin ahi.

⁶Hitichun mipi chu gamlah-a Israelte doudin achedoh taovin ahi. Chuin gal chu Ephraim gammanga kisat uva ahi;

⁷Hiche mun'a chun Israel mipi ho chu David sohte masanga akithat chap taovin, chule hiche nikho chun mi sangsomni athin ahi.

⁸Ajehchu gal chu gamsung jouse-a akithechan soh-a ahitan: chule hiche nikho chun chemjam'a kithat sangin, gammang lah-a ohlih atamjouvin ahi.

⁹Chuin Absalom'in David sohte chu atohkha tan ahi. Chuin Absalom chu sangan chung khatna touva ahin, chule sangan chu gangpi lentah abah kibom noija chun achen ahile, alu chu gangpi-a chun a-ohdentan; chuin ama vanle lei kikah-a akikhai denin; anoija um sangan chu achemang tan ahi.

¹⁰Chuin mikhatnin hichu amun, Joab jah-a, Ven, keiman Absalom gangpi phunga akikhai kamun ahi, ati.

¹¹Chuin Joab'in aseipehpa henga, Ven, nangman ama namu ahin, ipidinga amachu tolla satlhalou nahim? chutile keiman nangma dangka Shekel somleh konggah khat nape tadinga, ati.

¹²Chuin mipa chun Joab henga, Keiman dangka Shekel sangkhat kakhutna kasan ding hijongleh, keiman lengpa chapa dounan kakhut kalha louding ahi; ajehchu keiho jah tah-in lengpa nangma le Abishai chule Ittai nathu peh-un, Gollhang Absalom chu koimachan natohkhah louna dingun chingtheijun, ati.

¹³Achuti louva ahile kahinkho douna-a dihlou tah-a na katohding ahi: ajehchu lengpa-a kona ki-ima imacha aumpon, nangmatah ngeijong keima douva nahung panding ahi, ati.

¹⁴Hichun Joab'in, Keima nangma toh hitihin umthei ponge, ati. Chuin aman akhutna tengcha thum alan, Gangpi thing lah-a ahinga ana umnalai Absalom alungchang chu asun pailetnin ahi.

¹⁵Chuin Joab galmanchah po-a pang gollhang mi somho chun Absalom chu a-umkimvelun, avouvin, athat taovin ahi.

¹⁶Chuin Joab'in sumkon amutnin ahile, mipi chu Israelte anungdel naova konin ahungkile taovin ahi; ajehchu Joab'in mipi chu akhamtang ahitai.

¹⁷Chuin amahon Absalom chu alauvin, gammang lah kotong lentah khat aseplutnun, chule achunga songlhuh lentah-in aseuvin ahi. Chuin Israelte chu amitakip ama ama ponbuh lam cheh-a ajamtaovin ahi.

¹⁸Tun Absalom'in ahinlaijin lengpa phaichama chun amadingin khompi khat anatung doh-in ahi. Ajehchu aman, keiman kamin geldoh jingna dinga koiding chapa kaneipoi, ati: chuin aman khompi chu ama-min aputsah-in ahi. Chule hichu tunigeijin Absalom mun tin akisahtai.

¹⁹Chujouvin Zadok chapa Ahimaaz'in, Tun keima lhaijing kating, Pakaiyin melmaho chunga iti phu analah hitam, lengpa koma athu hi galhut inge, ati.

²⁰Chuin Joab'in ahenga, Tunia hi nangman thu napoh theilou ding, amavang nidang tengle napoh ding ahi. Tunia vanghi nangman thu napoh louding ahi, ajehchu lengpa chapa thia ahi, ati.

²¹Chujouvin Joab'in Cushi henga, Chenlang nathilmu hi lengpa gaseipehtan, ati. Chuin Cushi chu Joab anga akunin, alhaijeltan ahi.

²²Hichun Zadok chapa Ahimaaz chun Joab henga aseikitnin, Ahile hitante, nahenga katao ahi, Cushi nunga chun lhaijing kate, ati. Chuin Joab'in, Kachapa, athupoh ding umlouva ipi dinga lhaiding nakigot jengham? ati.

²³Ahinla aman, Ahile hitante, lhaijeng inge, ati. Hichun aman ajah-a, Lhaitan, ati. Hichun Ahimaaz chu phaicham lampia chun alhaijin Cushi chu akhelpatan ahi.

²⁴Chule David chu kotpi teni kikah-a chu touva ahi. Chuin khongahpa chu kotpi phung bang chunga chun akaldoh-in, akhodah in ahile, veuvin, mikhat achanga hunglhai amun ahi.

²⁵Chuin khongahpa chun asamin, lengpa henga aseipehtan ahi. Chuin lengpan, Ama achang ahile, akama thu ahinpoh hinte, ati. Chuin ama kintah-in ahunglhaijin ahungnai chehcheh-in ahi.

²⁶Chuin khongahpa chun michom dang khat hunglhaija amukitnin: chuin khongahpa chun kotngahpachu akouvin, ahenga, Ven, michom dang khat jong ahunglhaije, ati. Chuin lengpan amajong thu ahinpoh ahi, ati.

²⁷Chuin khongahpan, Keiman ahunglhai masapenpa chu Zadok chapa Ahimaaz lhai danin kahen ahi, ati. Chuin lengpan, Amachu mipha ahin, chule thupha toh hungtha ahi, ati.

²⁸Chuin Ahimaaz'in ahin samin, lengpa henga, Imajouse aphasoh keinai, ati. Chuin aman lengpa masang tolla chun amai asulutnin, Ka pakai lengpa douna akhut lamho jouse pedoh-a Pakai na Pathen chu nunnom hen, ati.

²⁹Chuin lengpan ajah-a, Gollhang Absalom chu hoidoh nam? ati. Chuin Ahimaaz'in adonbutnin, Joab'in lengpa sohpa le nasoh keima eisol lhonchun, keiman mipi boilah lah chu kamun, ahinla hichu ipi ahi kahepoi, ati.

³⁰Chuin lengpan ajah-a, Kikhindoh inlang, hikoma hin dingin, ati. Chuin ama akikhindoh-in, ading thimbeh-in ahi.

³¹Chuin veuvin, Cushi ahung lhungin; chule Cushi'n, ka Pakai lengpa thu kahinpoi; ijeh inem itile nangma doudinga kipatdoh ho jouse chunga tuni hin Pakaiyin phu alatai, ati.

³²Chuin lengpan Cushi henga, Gollhang Absalom chu hoidoh nam? ati. Chuin Cushi'n adonbutnin, Ka pakai lengpa melmaho jouse, chule nangma suhkhah nadinga nangma douna kipatdoh jouse chu gollhangpa chutoh bangcheh hen, ati.

³³Chuin lengpa chu alung analheh jengtan, kotpi phunga dan chunga chun akaldoh-in, akaptan ahi: chuin aman achepumin, Ohe! kachapa Absalom! kachapa, kachapa Absalom! Pathen'in nangma khela eithisah joh hile ong! ohe Absalom, kachapa, kachapa, atin ahi.