Read Thado Chin 2 Samuel 19 Bible Online

2 Samuel 19 - Thado Chin bible

2 Samuel 19

¹Chuin Joab henga, Ven, lengpa chu Absalom dingin akapmin, alunghemin ahi tin aseipeh-un ahi.

²Chule hiche nikho-a galjona chu mijouse dingin lunghemna asohtan ahi. Ajehchu mipi jousen, Lengpa ichan geija achapa dinga lung gentheija hitam, tia kisei chu ajauvin ahi.

³Chule galmuna kona ajamdoh jeh-a jahchatah-a umho bangin, hiche nikho chun mipi ho chu guhthim chan khopi sunga chun ahung lutnun ahi.

⁴Ahivangin lengpan amai akikhun, awsang tah-in, Vo kachapa Absalom! vo Absalom kachapa, kachapa, tin akapmin ahi.

⁵Chuin Joab chu lengpa in'a ahunglutnin, ajah-a, Nangman tunikho hin nangma hinkho, nachapate hinkho, nachanute hinkho, najite hinkho, nathaikem ho hinkho huhdoh-a nasohte jouse maihi najumson;

⁶Hiche-a hin nangman namelmate nangailun, naloi nagol ho nahotbolin ahi. Ajehchu tuni hin nangman leng chapate le soh ho hi ija naselouna naphongdoh tan: tuni hin Absalom chu hing henlang, keiho jousehi thileuveng nakipah ding ahi ti kamudohtai.

⁷Hijeh chun tun kipatdoh-in, chedoh-in lang nasohte henga lungmona thu gaseijin: ajehchu Pakai mina kihahsel kahi, napotdoh louva ahile, tujan apat khatcha jong nangma toh umlou ding ahitai: chule hichu nakhangdon laija patna tuni geija nachunga thilse anachuho sanga khohjo ding ahi, ati.

⁸Hichun lengpa akipatdoh-in, kotpi phunga chun atoutan ahi. Chuin amahon mipi ho jouse henga chun, Veuvin; lengpa chu kotpi phunga atoutai, atiuve. Chuin mipi chu lengpa masanga ahungun ahi: ajehchu Israelte amitakip ama ama pon-in lam cheh-a jamu ahitai.

⁹Chuin Israel phung jouse lah-a mipi ho chu akiphinun, Lengpan imelmateu khutna konin eihuhdoh-un; chule Philistinte khutna konin eihuhdoh-un; chule tun ama Absalom jeh-in gamsunga konin ajamdoh tai.

¹⁰Chule ichunguva dinga thao inupao Absalom chu galmuna athitan ahi. Hijeh chun tun ipidinga lengpa lepuikit nadinga thu changkhat beh nasei daoham? atiuve.

¹¹Chuin David lengpan Zadok le Abiathar thempu henga mi asolin, ajah-a, Judah upaho henga hitin aseijin, Israelte thusei chu lengpa le a-insung ngei tah-a hunglhung tai ti namu nunguva, ipidinga nanghon lengpa a-in'a lepui kitnadinga anunung pena napan uham?

¹²Nangho kasopite nahiuvin, kaguhole kaphe nahiuve. Chuti ahile ipidinga nangho lengpa lepuina dinga anunungpen nahiu ham?

¹³Chule nanghon Amasa henga, Nangma kagule kaphe nahilouham? Nangma kamasang Joab khela janel gallamkai nahijom jing louva ahile, Pathen'in kachunga hitichun, chule akhohjo cheh-in eibolhen, ati.

¹⁴Chuin aman mikhat lungsung bangin Judah miho jouse lungsung chu asunemin; hitichun amahon lengpa henga thu athotnun, Nangmale nasohteho hungkile taovin, atiuvin ahi.

¹⁵Hitichun lengpa ahungkilen, Jordan ahung lhungtan ahi. Chuin Judah chu lengpa kimutopi ding le Jordan galkaipi dingin Gilgal'a ahungtan ahi.

¹⁶ Chuin Bahurim'a um Benjamin mi Gera chapa Shimei chu Judah miho toh David lengpa kimutopi dingin mangang tah-in ahungsuh-in ahi.

¹⁷Chule ama chu Benjamin mi sangkhat to ahin, Saul insungmi sohpa Ziba le achapa somlenga toh, chule asoh somni toh ahiuvin: chuin amaho chu lengpa masanga chun Jordan agalkaijun ahi.

¹⁸Chuin amaho lengpa insungmi le aman boldinga pha-a agel chu boldingin kongneo khatna agalkaijun ahi. Chuin ama Jordan ahung galkai kaijin, Gera chapa Shimei chu lengpa masanga abohkhup jengin;

¹⁹Chule lengpa henga, Ka pakaiyin khangitlouna chu keija simhih-in, chule ka pakai lengpan Jerusalem adalhah ni-a nasoh kanachonvalna jong chu geldoh danlang, lengpan nalunga jong vophih beh-in.

²⁰Ajehchu nasoh hin chonse kahi ti kakihetne: hijeh chun ven, tunia hi Joseph insung miholah-a ka pakai lengpa kimutopi dinga hungsuh masapen kahi, ati.

²¹Ahivangin Zeruiah chapa Abishai'in adonbutnun, aman Pakai thaonusa agaosap jeh-a Shimei chu thading hilouham? ati.

²²Chuin David'in, Nangho Zeruiah chapate, nangho le keima ipi ikibahnao uma, tunia hi keima douva napan uham? Tunia Israel sunga mi kithat ding ham? tunia hi keiman Israelte chunga leng kahihi kahet louva nabolu ham? ati.

²³Hijeh chun lengpan Shimei jah-a, Nangma nathilou ding ahi ati. Chuin lengpa amahenga akiteptan ahi.

²⁴ Chuin Saul chapa Mephibosheth chu lengpa kimupi dingin ahungsuh-in, chule aman lengpa akipatdoh ni-a pat lungmonga ahungkit nikho tokah-a hi akeng jong asillou, akhamul jong apolou, avonho jong asoplou ahi.

²⁵Chuin ahitin ahi, ama Jerusalem'a lengpa kimutopi dinga ahung chun lengpan ahenga, Mephibosheth ipidinga keima toh kilhonlou nahim? ati.

²⁶Chuin aman adonbutnin, Ka pakai, vo kalengpa, nasohhi kengbai kahi jeh-in keima, Achunga katouva lengpa henga kache theina dingin sangan chu kigotninge kati ahi; hinlah kasohpan eijoulhep ahi

²⁷Chule aman nasohhi ka pakai lengpa henga eihehsen ahi; ahinla ka pakai lengpa hi Pathen vantil tobang ahi. Hijeh chun namitmu-a pha masah dungjuijin boltan.

²⁸Ajehchu kapa insung pumpiho ka pakai lengpa masanga athisa ahitan, hijongle nangman nasohhi nangma dokhanga neho lah-a napan sah-in ahi. Hijeh chun lengpa henga taokitna dinga ipi thaneina kaneijem? ati.

²⁹Chuin lengpan ahenga, Ipidinga nangman nathu chu nasei nahlai ham? Keiman, Nang le Ziba gam chu kihomlhontan tin kanaseije, ati.

³⁰Chuin Mephibosheth'in lengpa henga, Ka pakai lengpa lungmonga a-in'a hung kilekit ahitah jeh-in, abonin aman kilahtahen, ati.

³¹ Chuin Gilead mi Barzillai chu Rogelim'a konin ahungsuh-in chuin, Jordan gal gei gathah dingin, lengpa toh Jordan agalkai lhonin ahi.

³²Tun Barzillai chu mi kum upatah ahitan, kum somget ahitai. Chule aman lengpa Mahanaim'a aumlaija chu nehding ana khan ahi; ajehchu ama mihao tah ahi.

³³Chuin lengpan Barzillai henga, Kakoma hungin lang, Jerusalem'a kakoma na-umlaisen keiman navah nange, ati.

³⁴Chuin Barzillai'in lengpa henga, Keima itih chanpi kahin nahlai ding hija, lengpa toh Jerusalem'a kachetou dingham?

³⁵Tuhin keima kum somget kahitai. Chule keiman apha le ase kalhengkhen thei ding ham? Nasoh hin kaneh dingle kadon ding chu atwi atam kahetthei ding hinam? Numei lasathem le pasal lasathem ho lasah awgin chu kajah thei nalaiding hinam? chuti ahile ipi dinga nasohhi ka pakai lengpa dinga pohgih kibe nabep kahiding ham?

³⁶Nasoh hi lengpa toh Jordan gal themkhat chebeding kahi: ipidinga hitobang thilpeh-a hi lengpan neilethuh got ham?

³⁷Nahenga katao ahi, nasohhi kakhopia kathi-a kanule kapa lhanna kakivui theina dingin, neinungsol tan. Ahinla ven, nasoh Chimham hi; amahi ka pakai lengpa toh lhonhen lang, nangman apha hidinga kilom nasah dungjuijin achunga hin boltan, ati.

³⁸Chuin lengpan adonbutnin, Chimham hi keimatoh kilhon ding ahin, chule keima ama chunga hi apha hidinga kilom kasah dungjuija kabolding ahi. Chule ipi hitajongle keima-a kona nangaichat chu kabolpeh ding nahi, ati.

³⁹Chuin mijouse Jordan agalkai taovin ahi. Chuin lengpa ahung galkai phatnin, lengpan Barzillai chu achopmin, chule phatthei aboh-in; chuin ama aumna lama akile kittan ahi.

⁴⁰Chujouvin lengpa Gilgal'a achen, chule Chimham chu amatoh alhonin ahi. Chuin Judah mijouse le Israel mipi akehkhat chun lengpa ahin puijun ahi.

⁴¹Chuin veuvin, Israel mipi ho jouse chu lengpa henga ahungun, lengpa jah-a, Ipidinga Judah mi kasopi hon nangma naguh manguva, lengpa le a-insungmi chule David'in aumpi miho jouse chu apui galkaiju ham? atiuve.

⁴²Chuin Judah miho jouse chun Israel miho chu adonbutnun, Lengpa hi kakinaipiu ka-insungmiu ahijeh ahi. Chuti ahile ipidinga nangho hiche jeh-a hi lunghanga nahiuvem? Lengpa chohsa ne-a kahiuvem? ahiloule aman keiho thilpeh eipeh khah uvem? atiuve.

⁴³Chuin Israel miho chun Judah miho chu adonbutnun, Keihon lengpa-a chansom kaneijun, chule keihon nangho sangin David'a thaneina kaneijouvin ahi. Chuti ahile ipidinga lengpa galepui kitna dinga keiho thuhil chu masajo ahi chu i-sah louva bol nahiuvem? tiuve. Ahinla Judah miho thusei chu Israel miho thusei sangin ahatjon ahi.