Read Thado Chin 2 Samuel 2 Bible Online

2 Samuel 2 - Thado Chin bible

2 Samuel 2

¹Chuin hiche jouchun ahitin ahi, David'in Pakai adongin, Judah khopiho khatpena chu kachetou dingham? ati. Chuin Pakaiyin ajah-a, Chetouvin, ati. Chuin David'in hoilama kachetou ding ham? ati. Chuin aman, Hebron, ati.

² Hijeh chun David chukom mun jonin ajiteni Jezreel mi Ahinoam le Karmel mi Nabal jinu Abigail toh achetou tai.

³Chule David'in aumpi amite, amitakip a-insung mite toh ahin puitouvin, chuin amaho Hebron khopiho-a chun acheng taove.

⁴ Chuin Judah miho ahungun, David chu hikoma chun Judah insung pumpi chunga leng dingin thao ahungnu taovin ahi. Chuin amahon David henga, Saul vuija pangho chu Jabesh-gilead miho ahi ti aseipeh-un ahi.

⁵Chuin David'in Jabesh-gilead mite henga sottol ho asollin, ahenguva, Pakaiyin phatthei naboh uhen, ijeh inem itile nanghon hitobang lungset themna chu napakai pau Saul navetsah-un, navui jun ahi.

⁶Chule tun Pakaiyin nangho-a lungset themnale thutah namusah taohen: Chule nanghon hiche thilhi nanabol jeh uva keiman jong nangho ding thilpha kabolding ahi.

⁷Hijeh chun tun nabanthau hatdoh sah-un lang, chule hangsanun; ajehchu napakai pau Saul chu athitan; chujongle Judah insung miten achunguva leng dingin keima thao einutaovin ahi, ati.

⁸Ahinla Ner chapa Abner, Saul janel gal lamkaipa chun Saul chapa Ishbosheth chu Mahanaim'a ahinpuitan ahi.

⁹Chuin amachu Gilead Ashurim Jezreel, Ephraim chule Benjamin le Israel pumpi chunga lengin apansahtan ahi.

¹⁰Saul chapa Ishbosheth'in Israelte chunga vai ahomchun kum somli ahitan, chule kumni aleng changin ahi. Ahivangin Judah insung mi ten vang David ajuijun ahi.

¹¹Chule David Hebron khopi-a Judah insung pumpi chunga lenga apansung chu kum sagile lhagup ahi.

¹²Chuin Ner chapa Abner chule Saul chapa Ishbosheth soh ho chu Mahanaim'a konin Gibeon'a apotdoh-un ahi.

¹³Chule Zeruiah chapa Joab le David soh ho akondoh-un, Gibeon twikul panga akisutou vin ahi: chuin khat ho chu twikul pang langkhatna atouvun, chule khat langho chu twikul pang langkhatna atouvun ahi.

¹⁴Chuin Abner'in Joab jah-a, Tun gollhangho chu kipatdoh-u henlang, imasanguva kideluhen, ati. Chuin Joab'in, Amahochu kipatdoh-u hen, ati.

¹⁵Chuin Saul chapa Ishbosheth langa konin Benjamin mi somleni akipat doh-un, chule David sohte-a konin somleni akipat doh-un ahi.

¹⁶Chuin mikhat chehchun agolpao luchang chu atuh-un, chule aloipa pangpeh chehchu chemjamin akisunto uvin; hitichun amaho thakhatnin alhutaovin ahi. Hijeh chun hiche munchu Helkath-hazzurim asahtaove. Hichu Gibeon'a um ahi.

¹⁷Chule hiche nikho-a galkisat chu anasalheh jengin, Abner le Israel miho chu David sohte masanga agal lel taovin ahi.

¹⁸Chule chumuna chun Zeruiah chapa thumho: Joab, Abishai chule Asahel ajaovun, chule Asahel kaljandan chu gamlah sakhipi tobang ahi.

¹⁹Chuin Asahel chun Abner nungchu adelin, chule achepumin jetle veija kihei louvin Abner nungchu ajuipeh-in ahi.

²⁰Chuin Abner akinung heijin, Nangma Asahel nahilouham? ati. Chuin aman adonbutnin, Kahinai, ati.

²¹Chuin Abner'in ajah-a, Najetlam ahiloule naveilama kiheijin lang nagollhangho khatchu manin lang, agalvon chu lahpeh-in; ati. Ahinla Asahel chun ama ajuina-a konchun akiheidoh dehpon ahi.

²²Chuin Abner'in Asahel jah-a aseikitnin, Keima neijuina-a konin kiheidohtan: keiman nangma ibola hiche munahi kathading nahim? Achutile kamai chu nasopipa Joab angsunga iti kalah dingham? ati.

²³Ahivangin ama kiheimang ding anompon; hijeh chun Abner'in atengcha lhumkeijin amapa nahgu ngachanna noitah chu asunin ahile anunglanga apaidoh jengin ahi: chuin ama alhun, hiche munna chun athitan ahi, chuin ahitin ahi, Asahel alhuh-a athina mun hin phapa chanchu adingden jengun ahi.

²⁴Ahin Joab le Abishai chun Abner nungchu adel lhonin: chule Giah masanga um Gibeon gamthip jotna lampia um Ammah lhang ahung lhunun nisa alhumtan ahi.

²⁵Chuin Benjamin chate chu Abner nung chun akikhom khomun, chule amaho chu galsatmi honkhat akisouvin, lhang chunga adingun ahi.

²⁶Chuin Abner'in Joab chu akouvin, ajah-a, chemjam hin a-itih-a avallhum jingding hitam? Khonung akichaina le lungjinna ahung hi ding chu nahetlou ham? Namiho chu asopihou nung adelnauva kona akinungle kitna diuva naseipehna ding phat chu itih hiding ham? ati.

²⁷Chuin Joab'in, Hingjing Pathen mina kasei ahi, Nangman ima na naseilou, hile thonlouva jingkah lama chu amitakipmin asopi nung adellou dingu ahitai, ati.

²⁸Hijeh chun Joab'in sumkon amutnin ahile mijouse adingden taovin; chule Israel nung chu adeltapouvin, chule satjong akisatpi tapouvin ahi.

²⁹Chuin Abner le aloiho chu hiche jan chun phaicham ajot peh-un, chule Jordan agalkaijun, Bithron pumpi achonsoh-un, Mahanaim'ah ahungtaovin ahi.

³⁰Chuin Joab chu Abner ajuina-a konin ahung kinungle kittan, miho jouse chu akhop khoma ahile, David sohte mi somleko toh Asahel chu alhasamtan ahi.

³¹Ahinla David sohte chun Benjamin mi Abner miho chu jathum le somgup athatnun ahi.

³²Chuin amahon Asahel longchu apuvin, Bethlehem'a um apa kivuina ding lhanna chun avuitaovin ahi. Chuin Joab le amite jankhon akitolun, jingkho vah-in Hebron ahunglhung taovin ahi.