Read Thado Chin 2 Samuel 20 Bible Online

2 Samuel 20 - Thado Chin bible

2 Samuel 20

¹ Chuin Benjamin Bikhri chapa Sheba kiti boinasem mikhat ana umin ahi. Chuin aman sumkon amutnin, Eihon David'a chan ineipouve, chule Jesse chapa-a konin jong goulo ding ineipouve: Vo Israel, naponbuh cheh uva chetaovin, ati.

²Hitichun Israel mite jousen David adalhaovin, chuin Bikhri chapa Sheba chu ajuitaovin ahi. Ahivangin Jordan'a pat Jerusalem geija Judah mite vangchu alengpaova dingin apangdetnun ahi.

³ Chuin David Jerusalem'a a-in ahung lhungin, chuin lengpan a-inngah dinga adalhah, numei thaikem somho chu insung dan khatna akoijin, avah-in, ahin amaho koma chun alut tapon ahi. Hitichun amaho chu athi nikho geijun khakhumin aumun, meithai bangin ahing taovin ahi.

⁴Chujouvin lengpan Amasa henga, Nithum sungin Judah mite neikhop khompeh inlang, chule nangma tahjong umin, ati.

⁵Hijeh chun Amasa chu Judah mite khom dingin achen: ahinla David'in atepeh phat sangchun ahung geijotan ahi.

⁶Chuin David'in Abishai henga, Tu-a hi Bikhri chapa Sheba hin Absalom'in eibolnao sanga khohjo cheh-a eiboldiu hitam? Napakai sohte kipuijin lang ama chu nungdelin, achuti loule khopi kul kikai khum khat kimuntin, eihoa konin sohcha getninte, ati.

⁷Chule ama nunga chun Joab miho, Chereth mite, Peleth mite le mihat ho jouse acheuvin; chuin amaho Bikhri chapa Sheba nung del dingin Jerusalem'a konin akipat doh-un ahi.

⁸Amaho Gibeon mun songpilen phunga aumlaijun, Amasa chu amasanguva ahungin ahi. Tun Joab chu galvon'a kivon ahin, chule chu-a chu konggah um, chule akonga chu chemjam apaija kiheng kikhaija ahi; chuin ama malama achea ahile hichu ahung kitanglhan ahi.

⁹Chuin Joab'in Amasa henga, Kasopi pa, nadam hinam? ati. Chuin Joab'in Amasa chop dingin akhut jetlama akhamulin amanin ahi.

¹⁰Ahivangin Amasa chun Joab'in akhutna chemjam achoi chu ahepon ahi. Chuin aman hichea chun a-oipoh asut peh-in ahile, agil tolla alonglhan, avelin asunkit tapon; chuin ama athitan ahi. Hitichun Joab le sopipa Abishai chun Bikhri chapa Sheba chu anungdel lhontan ahi.

¹¹Chule Joab miho khat chu Amasa koma adingin, Joab khohsah jouse le, David langa pang jouse chu Joab nunga cheohen, ati.

¹²Chuin Amasa chu lamlhong lailunga athin achupmin ahi. Chuin mipa chun mipi adinden chu amuphatnin, Amasa chu lamlhonga konin gamlah-a achondoh-in, chule akom hinhopa jouse adin dennu chu amuphatnin, ama chu ponkhat akhukhumin ahi.

¹³Ama lamlhonga akichondoh phatnin, mijouse Bikhri chapa Sheba nung del dingin Joab nunga acheuvin ahi.

¹⁴Chule ama Abel gei le Beth-maachah geijin Israel phung jouse henga le Ber mite jouse henga achen ahi. Chuin amaho akikho khomun ama nung ajuitaove.

¹⁵Chuin amaho ahungun amaho chu Beth-maachah'a um Abel mun'a chun aumkolun, chule amahon khopi dounan leibang asepmun, chule hichu kiselna leiko-a dinga ahin: Joab toh umkhom mipi jouse chun kulbang chu suhchim dingin asusepan ataovin ahi.

¹⁶Hichun khopi-a konchun numei chingtah khatnin ahin samin, Ngaijun, ngaijun; Joab henga katao ahi, nangma toh kakihou theina din, hilam hin naijin, ati.

¹⁷Chuin amapa amanu henga ahungnai phatnin, numeinu chun ahenga, Nangma Joab nahim? ati. Chuin aman adonbutnin, Keima ama chu kahi, ati. Hichun amanun ajah-a, Nasohnu thusei ho hi ngaijin, ati. Chuin aman Kangaije, atin adonbutnin ahi.

¹⁸Hichun amanun, Masanglai chun min, Amahon thonlouva Abel kho-a thumop adoh teidiu ahi, tin anasei jiuvin: chule hitichun thu chu achai jiuvin ahi.

¹⁹Keima Israel sunga chamna deile tahsan ho lah-a khat kahi. Nangman khopi khat le Israel minu khat suhmangdin naholin ahi. Ipidinga nangman Pakai goulo chu naval lhum ding ham? ati.

²⁰Chuin Joab'in adonbutnin, Keiman kaval lhum ding ahiloule kasuhmang ding chu keija konin gamlahen, keija konin gamlahen.

²¹Athu chu chuti ahipoi: ahin Ephraim molsana kon mikhat Bikhri chapa amin Sheba chun David lengpa dounan akhut alamin ahi. Ama changseh chu hinpe doh-un, chule keiman khopi hi dalhatange, ati. Chuin numei nun Joab henga, Ven aluchang chu bang chunga kona kahin selhahpeh ding nahi, ati.

²²Hichun numeinu chu chingtheitah in mipi ho jouse henga chun achen ahi. Chuin amahon Bikhri chapa Sheba chu alu atanun, Joab henga asepdoh taovin ahi. Chuin aman sumkon amutnin, chuin amaho khopi-a konin ama ama pon-in cheh-a akile taovin ahi. Chuin Joab lengpa henga Jerusalem'a ahung kiletan ahi.

²³Tun Joab chu Israel janel chunga ahin: chule Jehoiada chapa Benaiah chu Chereth mite le Peleth mite chunga ahi.

²⁴Chule Adoram chu kaidong pipu ahin; chule Ahilud chapa Jehoshaphat chu thuching ahi.

²⁵Chule Sheva chu danthusun ahin; chule Zadok le Abiathar chu thempu ahilhone.

²⁶Chule Jair mi Ira chu David dinga vaihom pipu ahi.